Matheus Lynnong 25

 

1 “Ka hima bneng ka syriem ïa ki shiphew ngut ki theisotti kiba la shim ïa la ki sharak bad ki la leit shaw ïa u nongleitkurim.

2 San ngut na ki ki la long ki babiej, bad kiwei pat san ngut ki bastad.

3 Ki babiej ki la shim ïa la ki sharak khlem umphniang,

4 katba ki bastad ki la rah umphniang ha la ki jyndiang lem bad ki sharak.

5 U nongleitkurim u la slem ban wan, kumta ki theisotti ki la sdang ban kohnguh samthiah.

6 “Ynda shiteng synñia,la don ka jingpyrta. ‘U nongleitkurim u la wan! Ale, leit tan ïa u!’

7 Ki theisotti baroh ki la khie thiah bad ki la pynkhreh ïa la ki sharak.

8 Ki babiej ki la ong ha ki bastad, ïa ai umphniang lem seh khyndiat, namar ki sharak jong ngi ki la lip.’

9 ‘Em, em,’ ki bastad ki la jubab, ‘ïoh ym dap ïa phi bad ïa ngi. Khie leit sha dukan bad thied hi ïa lade.’

10 Kumta katba ki dang leit thied, u nongleitkurim u la poi, bad ki theisotti kiba la khreh ki la leit rung lang bad u sha ka jynkhawai. Bad la khang ïa ka jynkhang.

11 “Hadien, la wan poi sa kiwei pat ki theisotti. ‘Ko Trai, ko Trai! Shah ngin rung!” ki la pyrta.

12 ‘Ngam ithuh ïa phi,’ la jubab u nongleitkurim.

13 “To sharai, namarkata, naba phim tip ia ka sngi lymne ka por.”

14 “Ka hima bneng ka syrïem ïa u briew uba la jan mih na ïing ban leit jingleit. U la khot ïa la ki shakri bad u la pynkhamti ha ki ïa la ka spah ka hajar.

15 U la ai ha uwei pa uwei katkum ka sap jong ki: ha uwei u la ai san talen, ha uwei pat ar talen, sa ha uwei pat shi talen. Nangta u la leit noh.

16 U shakri uba la ïoh san talen, u la leit khaïi bad u la ïohnong sa san talen.

17 Kumjuh u shakri uba la ïoh ar talen, u la ïohnong sa ar talen.

18 Hynrei u shakri uba la ïoh shi talen, u la leit noh, u la tih ka thliew ha ka khyndew bad u la buhrieh ïa ka.

19 “Slem hadien, u kynrad jong kita ki shakri u la wan phai bad u la ïakheiñ ïadiah bad ki.

20 U shakri uba la ïoh san talen u la wan ai sa san talen. ‘Phi la ai ïa nga san talen, ko kynrad,’ u la ong. ‘Peit, nga la kamai sa san talen.’

21 ‘Shabas, ko shakri basmat bad babha!’ u la ong u kynrad jong u. ‘Phi long uba lah ban shaniah ha ki kam ki barit, kumta ngan pynkhamti ha phi ïa ki kam ki jam ki bakhraw. Ale rung ban ïakmen lang bad u kynrad jong phi!’

22 La wan sa u shakri uba la ïoh ar talen, bad u la ong, ‘Phi la ai ïa nga ar talen, ko kynrad. Peit, nga la kamai sa ar talen.’

23  ‘Shabas, ko shakri basmat bad babha!’ u la ong u kynrad jong u. ‘Phi long uba lah ban shaniah ha ki kam ki barit, kumta ngan pynkhamti ha phi ïa ki kam ki jam ki bakhraw. Ale rung ban ïakmen lang bad u kynrad jong phi!’

24 Nangta la wan sa u shakri uba la ïoh shi talen, bad u la ong, ‘Ko kynrad, nga tip ba phi long u briew u ba pyrkhing: phi ot na kaba phim shym la thung, bad phi kheit na kaba phim shym la bet

25 Nga la khaw-eit, kumta nga la leit buhrieh ïa ka talen jong phi hapoh khyndew. Shim, kane ka pisa jong phi.’

26 ‘Ko shakri jaipdeh bad bymlarkam!’ la ong u kynrad jong u. ‘Phi la tip ba nga ot na kaba ngam shym thung, bad nga kheit na kaba ngam shym bet.

27 Te phi la dei ban ai sut ïa ka tyngka jong nga, bad ngan jin da la ïoh bad sut bad trai ynda nga la wan phai.

28 Te mynta to knieh noh na u ïa ka talen, bad ai ïa ka ha uto uba don shiphew talen.

29 Naba ha uta uba don, yn dang ai shuh bad un pahuh pahai; hynrei ha uta ubym don, wat ïa ka khyndiat ba u don, yn knieh noh na u.

30 Ïa une u shakri bymlarkam pat—to shop noh shabar ha ka jingdum; hangta un sa lynñiar bad kyriat bniat.’”

31 “Haba u Khun u Briew Un wan kum u Syiem bad la ki angel, Un shong halor ka khet da ka burom,

32 bad ki bynriew baroh jong ka pyrthei kin ïalum hakhmat jong U. Hangta Un pynkhlad ïa ki, ar kynhun, kumba leh u nongap ïa ki langbrot bad ki blang:

33 Un buh ïa ki langbrot ha kamon lajong bad ïa ki blang ha kadiang.

34 “Nangta u Syiem Un ong ha ki briew kiba ha kamon jong U: ‘Phi kiba la kyrkhu u Kpa jong Nga, ale, to shimti ïa ka hima ba la khreh lypa ïa phi naduh ba la seng ïa ka pyrthei.

35 Naba Nga la thngan, te phi la ai ïa Nga ban bam; Nga la sliang, te phi la ai ïa Nga ban dih; Nga la long u mynder, te phi la khot ïing ïa Nga;

36 Nga la lyngkhuit, te phi la pynkup pynsem ïa Nga; Nga la pang, te phi la wan jngoh ïa Nga; Nga la shah set byndi, te phi la wan peit ïa Nga.”

37 Ki bahok hangta kin jubab ïa U: ‘Mynno keiñ, ko Kynrad, ngi la ïohi ba Me thngan bad ngi la ai bam ïa Me, lane ba Me sliang bad ngi la ai dih ïa Me?

38 Mynno ngi la ïohi ba Me long u mynder bad ngi la khot ïing ïa Me, ne ba Me lyngkhuit bad ngi la pynkup pynsem ïa Me?

39 Mynno ngi la ïohi ba Me pang ne Me shah set byndi, bad ngi la wan peit ïa Me?’

40 U Syiem Un jubab, ‘Shisha Nga ong ha phi: katta sien ba phi la leh ha iwei na kine ki para barit eh jong Nga, phi la leh ïa Nga!’

41 “Nangta Un ong ha kito kiba ha kadiang jong U: ‘Phi kiba la tim, khie noh na Nga sha ka ding bymjulip, kaba la khreh na ka bynta u ksuid bad ki nongbud jong u!

42 Naba Nga la thngan, te phim shym la ai bam ïa Nga; Nga la sliang, te phim shym la ai dih ïa Nga;

43 Nga la long mynder, te phim shym la khot ïing ïa Nga; Nga la lyngkhuit, te phim shym la pynkup pynsem ïa Nga; Nga la pang bad la shah set byndi, te phim shym la wan peit ïa Nga.”

44 Kumta ki ruh kin sa phai ktien ïa U: ‘Ko Kynrad, mynno ngi la ïohi ba Me thngan, ne ba Me sliang, ne ba Me long u mynder, ne ba Me lyngkhuit, ne ba Me pang, ha byndi, bad ngim shym la shakri ïa Me?’

45 Te u Syiem Un jubab ïa ki, Katta sien ba phim shym la leh ha iwei na kine ki barit eh, phim shym la leh ïa Nga ruh.’

46 Ïa kine yn phah noh sha ka jingshitom bymjukut; ki bahok pat kin leit sha ka jingim bymjukut.”