Matheus Lynnong 23
1 Te u Jisu U la kren kumne ha ki paidbah bad ha la ki synran:
2 “Ki Stad-aiñ bad ki Pharisi ki dei ki nongmih bujli jong u Moses
3 Kumta phi dei ban kohnguh bad ban leh kat kaba ki ong ïa phi ban leh; hynrei wat pyrthuh ïa ki kam jong ki, namar ki ong bad kim leh.
4 Ki kynton ki jynkit ki bakhia bad ki teh ha ingdong jong ki briew, ma ki pat kim pynkhih wat ïa i shympriahkti lajong ban kit lem ïa ki.
5 Ïa kaba ki leh, ki leh tang ban ïohi ki briew. Peit kumno ki pynïar ïa la ki philakteri bad ki pynheh ïa ki rymmiang jain jong ki!
6 Ki jied ïa ki jaka ki babha tam ha ki jingkhawai, bad ki jaka khmat ha ki sinakok.
7 Ki sngewtynnat ba yn ai khublei ïa ki ha ki jaka ïew, bad ba yn khot ‘Nonghikai’ ïa ki.
8 Hynrei ma phi wat kwah ba yn khot ‘Nonghikai’, naba phi don tang uwei u Nonghikai, bad phi baroh khoit phi ïalong shipara.
9 Bad wat khot ‘Kpa’ ïano ïano ha ka pyrthei, naba don tang uwei u Kpa jong phi, Uba ha bneng.
10 Lymne wat shah khot ‘Nongïalam’, naba u Nongïalam jong phi U long tang uwei, u Khrist.
11 U bakhraw tam na phi un long u shakri jong phi.
12 Ïa uba pynkhraw ïa lade yn pynrit, bad ïa uba pynrit ïa lade yn pynkhraw.”
13 ‘Kordit ïa phi ki Stad-aiñ bad ki Pharisi arsap! Phi khang ïa ka jynkhang ka Hima bneng na ki briew; namar phi hi ïa lade phin ym rung, bad ïa kiwei ruh kiba kwah rung phim shah!
[14 (Don ki jynthoh kiba bynrap ïa kane: Kordit ïa phi ki stad aiñ bad ki Pharisi, phi ki ar-sap. Phi bam-duh bad ki lute ïa ki ïing jong ki, katba ki leh mynduwai jlan! Kin sa ïoh ka rai pynrem kaba kham jur!]
15 “Kordit ïa phi ki Stad-aiñ bad ki Pharisi arsap! Phi shang kylleng ki ri bad ki duriaw ban pynkylla niam ïa uwei, bad ynda u la kylla, phi pynlong ïa u u khun ka dujok, arshah palat ïa phi!
16 “Kordit ïa phi ki nongïalam bamatlah! Phi hikai, ‘Lada u briew u smai da ka Tempyl, ym don jingteh; hynrei lada u smai da ka ksiar jong ka Tempyl, u dei ban pyndep.’
17 Phi ki anna matlah! Kano kaba kham kongsan, ka ksiar ne ka Tempyl kaba pynkyntang ïa ka ksiar?
18 Phi hikai ruh, ‘Lada u briew u smai da ka duwan, ym don jingteh ïa u; hynrei lada u smai da ka jynai kaba halor ka duwan, u dei ban pyndep.’
19 Katno phi matlah! Kano kaba kham kongsan, ka jynai ne ka duwan kaba pynkyntang ïa ka jynai?
20 U briew uba smai da ka duwan, u smai da ka, bad da ki jynai halor jong ka.
21 U briew uba smai da ka Tempyl, u smai da ka, bad da u Blei Uba shong hangta.
22 Bad haba u briew u smai da ka bneng, u smai da ka khet u Blei, bad da Uta Uba shong ha ka.
23 “Kordit ïa phi ki Stad-aiñ bad ki Pharisi arsap! Phi ai ha u Blei ïa ka bashiphew wat na ki jynthung musla, kum u pudina, ka siasia, bad u jira, katba phi lyndet ïa ki kamram kiba kham khia jong ka Aiñ, kum ka jingleh hok, ka jingleh isynei, bad ka mynsiem bat ktien. Ïa kine phi dei ban leh, khlem da pep ïa kiwei pat.
24 Ko nongïalam bamatlah! Ïa u mait te phi jiar na ka jyndih, hynrei ïa ka ut pat phi nguid!
25 “Kordit ïa phi ki Stad-aiñ bad ki Pharisi arsap! Phi pynkhuid ïa ka khuri bad ka pliang tang na shabar, kaba hapoh pat ka lati da ka jinglute bad ka jingbymkhuid.
26 Ko Pharisi matlah! To pynkhuid shuwa ïa kaba shapoh jong ka khuri bad ka pliang, bad kaba habar kan sa khuid ruh!
27 “Kordit ïa phi ki Stad-aiñ bad ki Pharisi arsap! Phi syrïem ïa ki jyntep ba la pushara, kiba itynnat na shabar, hynrei hapoh ki dap da ka met pyut bad ki shyieng jong ki baïap.
28 Kumjuh nabar phi paw kum kiba hok, hapoh pat phi dap da ka jingarsap bad jingbymman.”
29 “Kordit ïa phi ki Stad-aiñ bad ki Pharisi arsap! Phi tei ki jyntep ki baitynnat ïa ki nongïathuhlypa bad phi pynphuh ïa ki mot jong ki ’riewkhuid,
30 da kaba ong, ‘Lada ngi la im ha ka juk ki kpa tymmen jong ngi, ngin ym da la syllok lang bad ki ban pynïap ïa ki nongïathuhlypa.’
31 Te kumta phi kubur pleng ba phi long ki khun ki ksiew jong kito kiba la pynïap ïa ki nongïathuhlypa!
32 Leh noh ban pyndep ïa kaba ki kpa jong phi ki la sdang!
33 Ko bseiñ, khun ka ’seiñpuh! Kumno phin lait na ka jingpynrem sha dujok?
34 Kumta Nga ong ha phi: Ngan phah sha phi ïa ki nongïathuhlypa, ki ’riewstad bad ki nonghikai; ïa ki katto katne phin pynïap, ïa kiwei pat phin sahnarphna, ïa kiwei phin sympat ha ki sinakok jong phi, bad phin beh na kawei ka shnong sha kawei pat,
35 haduh ba ka jingpynshitom kan lap ïa phi: ka jingpynshitom na ka bynta ka snam ki baluilui baroh, sdang naduh ka jingpynïap ïa u Abel haduh ka jingpynïap ïa u Zekharia, u khun u Barakhia, ïa uba phi la pynïap hapdeng ka jaka kyntang bad ka duwan.
36 Nga ong ha phi: ka jingpynshitom na ka bynta kane baroh kan hap halor kane ka pateng bynriew!”
37 “A Jerusalem, Jerusalem! Pha kaba pynïap ïa ki nongïathuhlypa bad kaba lynthem maw ïa kiba la phah sha pha! Katno sien Nga la kwah ban kdup ïa ki khun jong pha kumba ka syiar ka kdup ïa la ki khun hapoh thapniang, hynrei pham treh!
38 Te ïa ka ïing jong pha yn sa ieh noh kynjah.
39 Naduh mynta phan ym ïohi shuh ïa Nga—Nga ong ha pha—tat haduh ba phan da ong, ‘Suk Uta Uba wan ha ka kyrteng jong u Trai !’”