Matheus Lynnong 22

 

1 U Jisu U la kren biang ha ki paidbah da ki pharshi.

2 “Ka Hima bneng ka syrïem ïa uwei u syiem uba la pynkhreh ïa ka jingkhawai poikha poiman u khun.

3 U la phah ïa la ki shakri ban khot ïa ki balawer sha ka jingkhawai, hynrei kim treh wan.

4 Kumta u la phah sa kiwei pat ki shakri, u ong, ‘ïathuh ïa ki balawer: La khreh ïa ka jingkhawai jong nga; la pynïap ïa ki masi bad ki mrad ba la pynsngaid, bad la taïar baroh. Ale sha ka jingkhawai!’

5 Hynrei kiba la wer kim patiaw, bad ki la leit sha la ka kam ka kam: uwei sha bri, uwei sha ki khaïi pateng,

6 katba kiwei pat ki la kem ïa ki shakri jong u, ki la shoh ïa ki, bad ki la pynïap.

7 U syiem u la shla, bad u la phah ïa la ki shipai ban pynïap ïa kine ki ’riewdakaid bad ban thang-duh ïa  ka shnong jong ki.

8 Nangta u la ong ha la ki shakri. ‘Ïa ka jingkhawai la khreh, hynrei la shem ba kiba la wer kim long kiba bit.

9 Leit mynta sha ki lad ki lynti bad, kat ïa kiba phi lap, to khot sha ka jingkhawai.’

10 Kumta ki shakri ki la leit sha ki lynti ki syngkien bad ki la lum baroh kat kiba ki ïakynduh, bad babha bad basniew; bad ka kamra jingkhawai ka la khapngiah da ki briew.

11 “U syiem u la leit peit ïa kiba shong bam, bad u la ïohi ba don uwei u briew ubym shym la riam la beit katkum ka rukom.

12 U syiem u la ong ha u, ‘Ko lok, kumno phi wan rung hangne khlem da riam da beit?’ Uta u briew u sngap la ka sngap.

13 Te u syiem u la ong ha ki shakri, ‘Khum ïa u bad kti bad kjat, bad bret ïa u shabar ha ka jingdum. Hangta un lynñiar bad u kyriat bniat.’ ”

14 Bad u Jisu U la pynkut, “Bun la khot, hynrei khyndiat la jied.”

15 Ki Pharisi ki la leit noh bad ki la ïasylla ban riam ïa u Jisu da ki jingkylli.

16 Ki la phah katto katne ngut ki synran jong ki bad ki Herodian sha u Jisu, bad ki la ong, “Ko Nonghikai, ngi tip ba Me long Uba hok: Me hikai shida ïa ka mon u Blei, khlem tieng ne ñiew shiliang khmat ïano ïano.

17 Ha ïathuh ïa ngi, kumno Me pyrkhat? Ka bit ne em ban siew khajna ha u Kaisar?”

18 U Jisu U la tip ïa ka buit tuh jong ki, bad U la jubab: “Arsap! Balei phi pyrshang ban riam ïa Nga?

19 Ha wan rah ka tyngka khajna ba Ngan peit!” Ki la wan rah ha U kawei, 20bad U la kylli, “Kane ka dur bad ka jynthoh jongno?”

20 bad U la kylli, “Kane ka dur bad ka jynthoh jongno?”

21 “Ka jong u Kaisar,” ki la jubab. Kumta u Jisu U la ong, “Te to siew ha u Kaisar ïa ka jong u Kaisar, bad ha u Blei ïa ka jong u Blei.”

22 Ynda ki la ïohsngew ïa kane, ki la dumbuit jlang; bad ki la leit noh bak.

23 Ha kata kajuh ka sngi, ki Sadusi ki la wan sha u Jisu. (Ki dei kito kiba ong ba ym don jingmihpat.)

24 “Ko Nonghikai,” ki la kylli, “U Moses u la ong: ‘Lada u briew u ïap khlem khun, u para jong u u dei ban shim lok ïa kata ka ’riewkynthei, khnang ban pynkha khun ïa la u hynmen.’

25 Te ki la ïadon hynñiew ngut shipara. U hynmen duh u la ïoh lok bad u la ïap khlem khun, kumta u la ieh noh ïa ka ’riewkynthei ha la u para.

26 La jia kajuh ïa u ba-ar, ïa u balei, bad ter ter haduh u bahynñiew.

27 Khatduh eh, la ïap sa ka kynthei.

28 Mynta, ha ka sngi jingmihpat kan long ka tnga jongno? Baroh hynñiew ngut ki la ïashong bad ka!”

29 U Jisu U la jubab ïa ki: “Katno phi bakla! Dei namarba phim tip ïa ki jynthoh ne ïa ka bor u Blei.

30 Naba, ynda ki baïap ki la mihpat kin long kum ki angel ha bneng, khlem ïapoikha poiman ne pynïapoikha poiman shuh.

31 “Mynta, shaphang ka jingmihpat: Hato phim pat ju pule aïu u Blei U ïathuh ïa phi,

32 ‘Nga long u Blei u Abraham, u Blei u Isaak, bad u Blei u Jakob?’ Kata ka mut ba U long u Blei jong ki ba-im, ym jong ki baïap.”

33 Haba ki paidbah ki la ïohsngew ïa kane, ki la lyngngoh ïa ka jinghikai jong U.

34 Haba ki Pharisi ki la ïohsngew ba u Jisu U la pynduh nia ïa ki Sadusi, ki la wan shikynhun,

35 bad uwei na ki, u Stad-aiñ, u la pyrshang ban riam ïa U da kane ka jingkylli,

36 “Ko Nonghikai, kano ka hukum ka bakongsan tam ha ka Aiñ?”

37 U Jisu U la jubab, “ ‘Phi dei ban ïeid ïa u Trai u Blei jong phi da ka dohnud jong phi baroh, da ka mynsiem jong phi baroh, bad da ka jingmut jong phi baroh.’

38 Kane ka long ka hukum ka bakhraw bad bakongsan tam.’

39 Ka ba-ar ka ïasyrïem ïa kane” ‘Phi dei ban ieid ïa la u para briew kum ïa lade hi.’

40 Harlor kine ki ar tylli ki hukum la seng nongrim ïa ka Aiñ jong u Moses baroh kawei bad ïa ka jinghikai jong ki nongïathuhlypa.”

41 Haba ki Pharisi ki la ïalum lang, u Jisu U la kylli ïa ki:

42 “Phi pyrkhat kumno shaphang u Messiïa? U khun u ksiew jongno?” “U jong u Dabid,” ki la jubab.

43 U Jisu U la kylli biang, “Te balei u Dabid, da ka jingpyrsad u Mynsiem, u khot ‘Trai’ ïa U? Namar u Dabid u la ong,

44 “U Ïahwe U la ong ha u Kynrad jong nga, ‘To shong ha kti kamon jong Nga, haduh ba Ngan da pyndem ïa ki nongshun jong Me hapoh ki slajat jong Me.’

45 Te lada u Dabid u khot ‘Trai Kynrad’ ïa U, kumno u Messiïa U long u khun jong u?”

46 Ym don ba lah ban jubab ïa u Jisu shikyntien ruh, bad naduh kata ka sngi kim shlan shuh ban kylli jingkylli ïa U.