Matheus Lynnong 21

 

1 Haba ki la poi hajan Jerusalem, ki la rung ha Bethphaje ha u lum Olib. Nangta u Jisu U la phah ar ngut ki synran jong U shakhmat,

2 U da ong: “Khie leit sha katai ka shnong hamar pyrshah jong phi, bad phin lap shisyndon kawei ka kada ba la teh, ryngkat bad u khun jong ka. Loit ïa ki bad ïalam ïa ki sha Nga.

3 Lada don ba ong ei ei ïa phi, ïathuh ba u Kynrad U donkam ïa ki; bad un shah ba kin wan shisyndon.”

4 Kane ka la jia ban pynurlong ïa kaba u nongïathuhlypa u la lah ong:

5 “To ïathuh ha ka nongbah Zion: Mynta u Syiem jong pha U wan sha pha. U long U bajemnud bad U shong halor ka kada, halor u khun kada, u khun jong ka mrad kit jynkit.”

6 Kumta ki synran ki la leit bad ki la leh kumba u Jisu U la bthah ïa ki.

7 Ki la wanlam ïa ka kada bad u khun, ki la tap ïa ki da la ki jaiñkup, bad u Jisu U la kiew ban shong.

8 U paidbah babun u la ïasiang ïa la ki jaiñ ha lynti, kiwei pat ki la khyllad da ki tnat dieng bad ki la siang ïa ki ha lynti.

9 Ki paidbah kiba ïaid hakhmat u Jisu bad kiba ïaid hadien, ki la ïaipyrta, “Risa ïa u Khun u Dabid! Ïaroh jam ïa Uta Uban wan ha ka kyrteng jong u Trai! Risa ïa u Blei shajrong!”

10 Haba u Jisu U la rung ha Jerusalem, ka nongbah baroh kawei ka la khynwin jlang. Ki briew ki la kylli, “Uei sha Une?”

11 Ki paidbah ki la jubab, “U dei u Jisu, U nongïathuhlypa na Nazareth Galilea.”

12 U Jisu U la leit rung ha ka Tempyl bad U la beh noh ïa kiba ïadie ïathied hangta. U la theh khongpong ïa ki miej jong ki nongïapeiñ sbai bad ïa ki lyngknot jong ki nongdie paro.

13 U la ong ha ki: “Ngi shem ha ka Jynthoh ba u Blei U la ong, ‘Ïa ka ïing jong Nga yn khot ka ïing jingduwai. Hynrei ma phi pat phi la pynkylla ïa ka ka krem ki nongtuh!’ ”

14 Ki bamatlah bad ki badkoh ki la wan sha U ha ka Tempyl, bad U la pynkoit ïa ki.

15 Ki rangbah lyngdoh bad ki Stad-aiñ ki la bitar haba ki la ïohi ïa ki kam phylla ba U leh, bad ba ki khynnah ki la pyrta ha ka Tempyl, “Risa ïa u Khun u Dabid!”

16 Kumta ki la ong ha u Jisu, “Me ïohsngew aïu ki ong?” “Hooid keiñ!” la jubab u Jisu. “Phim pat ju pule ïa ki Jynthoh kiba ong, ‘Na ka shyntur jong ki khynnah bad ki khunlung Me la sei ka jingïaroh ka bajanai?’”

17 U Jisu U la mih nangta bad U la leit sha shnong Bethania ban sah miet hangta.

18 Kum lashai, haba ki la wan phai sha ka nongbah, u Jisu U la thngan,

19 U la ïohi ïa u dieng dymbur harud surok bad U la leit sha u, hynrei Um shem soh ei ei lait tang ki sla. Kumta U la ong ha u dieng, “Men yn met soh shuh!” Te kumta kumta hi u dieng dymbur u la ïaptram.

20 Ki synran ki la ïohi ïa kane bad ki la sngewphylla ki ong, “kumno u dieng dymbur u la tram shisyndon?”

21 “To kynmaw ïa kane!” u Jisu U la jubab. “Lada phi ngeit bad phim artatien, phi lah ban leh kumba Nga la leh ïa une u dieng dymbur. Ym tang kane: phin lah ban ong wat ha une u lum, ‘To ïeng bad to noh sha duriaw, bad un noh.’

22 Lada phi ngeit, phin ïoh katba phi pan da ka jingduwai.”

23 U Jisu U la wan phai sha ka Tempyl; katba U dang hikai, ki rangbah lyngdoh bad ki tymmen ki san jong u paidbah ki la wan sha U ban kylli, “Me don hok aïu ban leh ïa kine kiei kiei? Mano ba la ai ha Me ïa kane ka bor?”

24 U Jisu U la phai ktien: “Nga ruh Ngan kylli ïa phi kawei ka jingkylli, bad lada phi jubab ïa Nga, Ngan ïathuh ïa phi da ka bor aïu Nga leh ïa kine kiei kiei.

25 Ha ïathuh ïa Nga, nangno ka wan ka bor u Ïoannis ban pynbaptis: na u Blei ne na ki briew?” Ki la sdang ban ïatwad jingmut para ma ki: “Ngin ong kumno? Lada ngi ong, ‘Na u Blei,’ Un ong ha ngi, ‘Te balei phim shym ngeit ha u Ïoannis?’

26 Hynrei lada ngi ong, ‘Na u briew,’ ngi khaw-eit ïa u paidbah, namar baroh ki ñiew ïa u kum U nongïathuhlypa.”

27 Kumta ki la jubab ïa u Jisu, “Ngim tip.” Bad u Jisu U la phai ktien ha ki, “Nga ruh Ngam ïathuh ïa phi da ka bor aïu Nga leh ïa kine kiei kiei.”

28 “Phi pyrkhat kumno shaphang kane? Uwei u briew u la don ar ngut ki khun. U la leit sha u banyngkong, u la ong, ‘Ko khun, khie leit trei mynta ka sngi ha ka brisoh waiñ.’

29 ‘Ngam treh,’ u la jubab, hynrei hadien u la babe bad u la leit trei.

30 Nangta u kpa u leit sha uwei pat u khun, bad u la ong kumjuh. U khun u la jubab, ‘Ngan leit pa,’ hynrei um shym leit.

31 Uno na kine ki ar ngut u la leh ïa ka mon jong u kpa?” “U banyngkong,” ki la jubab. Te u Jisu U la ong ha ki: “Kynmaw ïa kane: ki nongkhrong khajna bad ki nuti kin rung shuwa ïa phi ha ka Hima u Blei.

32 Namar u Ïoannis Baptist u la wan ban kdew ha phi ïa ka lynti ka hok, bad phim ngeit ha u, hynrei ki nongkhrong khajna bad ki nuti ki la ngeit ha u. Wat ynda phi ïohi ïa kane, phim shym kylla ka bamut bad ngeit ha u.”

33 “Sngap sa kane kawei ka pharshi,” u Jisu U la ong. “La don u trai khyndew uba la thung ka brisoh waiñ; u la ker ïa ka baroh sawdong; u la tih thliew na ka bynta ka kor tylliat, bad u la tei ka kut. Nangta u la ai wai ïa ka brisoh ha ki nongrep bhura bad u la leit jingleit.

34 Haba la poi ka por kheit soh, u la phah ïa la ki shakri sha ki nongrep bhura ban shim ïa la ka bynta.

35 Ki nongrep bhura ki la kem ïa ki shakri, ki la shoh ïa ki, ki la pynïap ïa uwei, bad ki lynthem maw ïa uwei pat.

36 Uta u briew u la phah da kiwei pat ki shakri, kham bun ban ïa mynshuwa, bad ki nongrep bhura ki la leh ïa ki kumjuh.

37 Khatduh eh u la phah ïa la u khun, namar u la pyrkhat, ‘Khlem pep kin burom ïa u khun jong nga.’

38 Hynrei haba ki nongwai ki la ïohi ïa u khun, ki la ïa ong para ma ki, ‘Une u long u nongïoh pateng. Ïa ngin ïapynïap noh ïa u, bad ngin ïoh ei ïa ka khyndew jong u !’

39 Kumta ki la kem ïa u khun, ki la shop ïa u shabar ka brisoh bad ki la pynïap ïa u.

40 “Te haba u trai ka brisoh waiñ un wan, un leh aïu ïa kito ki nongrep?” la kylli u Jisu.

41 “Khlem pep un pynïap ïa kito ki ’riewsniew,” ki la jubab, “bad un ai wai ïa ka brisoh ha kiwei pat ki nongrep, kiban ai ïa ka bynta kaba hap ha u, ha ka por ka badei.”

42 U Jisu U la ong ha ki, “Phim pat ju pule aïu ki Jynthoh ki ong? ‘U maw ïa uba ki nongtei ki la kyntait kum u bymlarkam, u la kylla long u mawdong. Dei u Trai Uba la leh ïa kane. Katno ka long ka baphylla!’

43 Te kumta Nga ong ha phi, la pynbud u Jisu, “Ïa ka hima u Blei un shim noh na phi bad yn ai ha ki briew kiban pynmih ki soh ki badei.

44 (Jar uba hap ha une u maw, un kheiñ lyngkhot lyngkhai; bad lada une u maw u hap hano hano, un pynlwet thiaw ïa u.)”

45 Ki rangbah lyngdoh bad ki Pharisi ki la ïohsngew ïa ki pharshi u Jisu, bad ki la tip ba U la kren shaphang jong ki.

46 Kumta ki la pyrshang ban kem ïa U. Hynrei ki la sheptieng ïa ki paidbah kiba la ñiew ïa u Jisu kum u Nongïathuhlypa.