Matheus Lynnong 19

​

1 Ynda u Jisu U la dep kren ïa kine kiei kiei, U la mih na Galilea bad U la leit phai sha ka thaiñ Judea, sha shiliang ka wah Jordan.

2 Bunbah u paidbah u la bud ïa U, bad U la pynkoit ïa ki hangta.

3 Katto katne ngut ki Pharisi ki la wan sha U bad ki la tynjuh ïa U da kaba kylli, “Ka bit ne em ïa u briew ban pyllait ïa la ka tnga na kano kano ka daw?”

4 U Jisu U la jubab; “Phim pat shym pule ïa kane ka jynthoh? ‘Ha ka basdang u Nongthaw U la thaw ïa ki, shynrang bad kynthei,

5 bad U la rai: Na kane ka daw u shynrang un ieh noh ïa la u kpa bad ka kmie bad un ïasoh lang bad la ka tnga, bad ki ar ngut kin kylla long kawei.’

6 Kumta kim long shuh ar ngut, hynrei kawei. Namarkata u briew um dei ban pynïakhlad ïa kaba u Blei U la pynïasoh lang.”

7 Ki Pharisi ki la kylli shuh shuh, “Te balei u Moses u la hukum ba, lada ïapyllait tnga, dei ban da ai ïa ka kot ïapyllait?”

8 U Jisu U la jubab: “U Moses u la shah ïa phi ban ïapyllait tnga namarba phi eh dohnud. Hynrei kam shym la long kumta ha ka basdang.

9 Nga  ïathuh ïa phi, namarkata, ba uno uno u briew uba pyllait  ïa la ka tnga—Ngam kren hangne shaphang kito kiba shu ïashong—u klim lada u  ïashong bad kawei pat ka kynthei; bad uta uba shim tnga ïa kaba la ïapyllait, u klim.”

10 Ki synran jong U ki la ong ha U, “Lada ka long kumne hapdeng u shynrang bad ka tnga jong u, ka bha ban ym ïapoikha poiman.

11 U Jisu U la jubab: “Ym baroh ki peiphang bad pdiang ïa kane, hynrei tang kito ïa kiba u Blei U la mang.

12 Naba don kiba ym lah ban ïapoikha namarba la kha ïa ki kumta: don kiwei pat, namarba ki briew ki la pynlong ïa ki kumta, don sa kiwei pat kibym ïapoikha na ka bynta ka hima bneng. Te jar kiba lah ban peiphang ïa kane, to kin pdiang ïa ka.”

13 Don ki briew kiba la wan ïalam ki khynnah rit sha u Jisu ba Un buh ïa la ki kti halor jong ki, bad Un duwai, hynrei ki synran ki la mai ïa ki.

14 U Jisu U la ong, “Shah ba ki khynnah rit kin wan sha Nga. Wat khang ïa ki, namar ka Hima bneng ka dei ïa kum kine.”

15 U la buh ïa la ki kti halor jong ki, bad U la leit noh.

16 Uwei u briew u la wan sha u Jisu. U la kylli, “Ko Nonghikai, ka kam babha aïu nga dei ban leh ban ïoh ïa ka jingim bymjukut?”

17 “Balei phi kylli ïa Nga shaphang ka babha?” la ong u Jisu. “Don tang Uwei u babha. Lada phi kwah ban rung ha ka jingim, to sumar ïa ki hukum.”

18 “Ki hukum aïu?” u la kylli, U Jisu U la phai ktien: “Wat pynïap; wat klim; wat tuh; wat shukor;

19 to burom ïa la u kpa bad ka kmie; bad to ieid ïa la u para briew kum ïa lade.”

20 “Nga la kohnguh ïa kine ki hukum baroh,” la jubab uta u samla. “Te sa kaei shuh nga dei ban leh?”

21 U Jisu U la ong ha u, “Lada phi kwah ban long u bajanai, khie bad die baroh katba phi don, bad ai ïa ki pisa ha ki baduk, bad phin sa ïoh ka spah ha bneng; nangta ale, to bud ïa Nga.”

22 Haba uta u samla u la ïohsngew ïa kane, u la thangïong bad u la leit noh, namar u la long u bariewspah shibun.

23 Te u Jisu U la ong ha la ki synran: “Nga ong ha phi, kan long ka ba-eh da shisha ïa u bariewspah ban rung ha ka Hima bneng.

24 Sa kane Nga ong ha phi: ka kham suk ïa ka ut ban rung lyngba i thliew thyrnia ban ïa u ’riewspah ban rung ha ka hima u Blei.”

25 Haba ki synran ki la ïohsngew ïa kane ki la lyngngoh ngaiñ. “Mano te ba lah ban lait-im?” ki la kylli.

26 U Jisu U la peit thlip ïa ki bad U la jubab, “U briew um lah ïa kane; hynrei u Blei U lah baroh.”

27 Te u Petrus u la kem ktien, “Hakhmih, ngi la ieh noh lut ban bud ïa Me. Ngin ïoh aïu?”

28 U Jisu U la phai ktien ha ki: “Shisha Nga ong ha phi: ha ka Juk Bathymmai, ynda u Khun u Briew Un shong ha ka khet baphyrnai jong U, phi kiba la bud ïa Nga phin shong ha ki khat-ar khet ban bishar ïa ki khat-ar jait Israel.

29 Bad jar uba la ieh noh ïa la ki ïing ki sem, ïa la ki hynmen ki para, ïa la ki kmie ki kpa, ne ïa la ki khun, ne ki lyngkha na ka bynta jong Nga, un ïoh shispah shah, bad un ïoh ka jingim bymjukut.

30 “Bun ki banyngkong kin sa long khatduh bad ki bakhatduh kin sa long nyngkong.”