Matheus Lynnong 13

1 Ha kata hi ka sngi u Jisu U la mih na ïing bad u la leit sharud ka duriaw.

2 U paidbah, uba lum sawdong jong U, u la bun katta katta haduh ba Um banse ban kiew ha ka lieng, bad U la shong ha ka, katba u paidbah u la ïeng ha ryngkew ha thmit ka duriaw.

3 U la hikai ïa ki bun kiei kiei da ki pharshi. “La don uwei u briew uba la leit ban bet.

4 Katba u dang bet ïa u symbai ha ka lyngkha, katto katne ki la hap ha lynti, bad ki sim ki la wan ban puh ïa ki.

5 Don ruh uba hap ha ka ’dewmaw, ha kaba duna khyndew. Ki symbai ki la mih kloi kloi namarba ka khyndew kam jylliew.

6 Haba ka sngi ka la ïeng, ka thang ïa ki seilung, bad namarba ki thied kim da jylliew bha, ki jynthung ki la tyrkhong shisyndon.

7 Katto katne ki symbai ki la hap hapdeng ki shiah, kiba la san bad kjap ïa ki jynthung.

8 Hynrei katto katne ki la hap ha ka khyndew ka babha, bad ki la sei soh; don kiba sei shispah shah, don kiba sei hynriewphew shah, bad don kiba sei laiphew shah.”

9 Bad u Jisu U la pynkut, “Uta uba don ki shkor ban sngap, to un shah shkor!”

10 Te ki synran ki la wan sha u Jisu bad ki la kylli ïa U, “Balei sha Me kren ha ki paidbah da ki pharshi?”

11 “Ïa ki jingmaïa jong ka Hima bneng la pyntip tang ha phi, ym ha ki,” la jubab u Jisu.

12 “Ha u briew uba la don ei ei, yn dang ai shuh, kumta ba un dup pahuh; hynrei na u briew ubym don ei ei, yn shim noh wat ïa ka khyndiat kaba u dang don.

13 Nga sa kren ha ki da ki pharshi na kane ka daw: namar ki peit, hynrei kim ïohi; ki ïohsngew, hynrei khlem pynshah shkor ne sngewthuh.

14 Kumta ka jingïathuh lypa u Isaïa ka la urlong thik thik ha ki: ‘Phin sngap sa sngap hynrei khlem sngewthuh; phin peit sa peit hynrei khlem ïohi.

15 La pynmyllen ïa ka dohnud une u paid; la pynkyllut ïa ki shkor jong ki; la pynkhap ïa ki khmat jong ki. Kumta kim lah ban ïohi da la ki khmat, Kim lah ban ïohsngew da la ki shkor, bad kim lah shemphang da ki dohnud jong ki: kumta kim lah ban phai sha Nga—ong u Trai—ba Ngan dup pynkoit ïa ki.’

16 Ma phi te, katno phi donbok! Ki khmat jong phi ki ïohi, ki shkor jong phi ki ïohsngew.

17 To kynmaw ïa kane: bun ki nongïathuhlypa bad bun ki briew u Blei ki la kwah dik dik ban ïohi ïa kata kaba phi ïohi, hynrei kim ïoh; ne ban ïohsngew ïa kata kaba phi ïohsngew, hynrei kim shym ïoh.”

18 “To sngapthuh bha, namarkata, ïa ka pharshi jong u nongbet.

19 Kito kiba ïohsngew ïa ka khubor shaphang ka Hima u Blei khlem sngewthuh, ki long kum u symbai uba hap ha lynti. U Bymman u wan bad u rong noh ïa kaba la bet ha ki.

20 U symbai uba hap ha ka ’dewmaw u kdew ïa kito kiba ïoh pdiang ïa ka khubor da ka jingkmen, tang shu ïohsngew ïa ka.

21 Hynrei um ngam jylliew ha ki, bad kim neh slem. Haba wan ka jingjynjar ne ka jingbánbeiñ na ka bynta ka khubor, ki ieh noh dak ïa ka.

22 U symbai uba hap hapdeng ki shiah u kdew ïa kito kiba ïohsngew ïa ka khubor, hynrei ki jingkhuslai jong ka jingim bad ka jingieid spah ki kjap ïa ka khubor, kumta kim sei soh ei ei.

23 U symbai pat uba la bet ha ka khyndew ka babha u kdew ïa kito kiba ïohsngew ïa ka khubor bad ki shemphang ïa ka: kine ki sei soh, don kiba sei haduh shispah shah, don kiba sei hynriewphew shah, bad kiba sei laiphew shah.”

24 Sa kawei pat ka pharshi u Jisu U la ïathuh ha ki: “Ka hima bneng ka long kum u briew uba la bet ïa u symbai u babha ha la ka lyngkha.

25 Mynmiet haba ki la ïohthiah baroh, u nongshun u la wan bad u la bet da u kynbat hapdeng u kew, bad u la leit noh.

26 Ynda ki jynthung ki la khie bad ki la sdang ban met soh, u kynbat u la paw.

27 Ki shakri uta u briew ki la wan sha u bad ki la ong, ‘Ma, phi la bet da u symbai u babha ha ka lyngkha jong phi; te na-ei u la mih u kynbat?’

28 ‘Don mano re mano ba la leh dusmon ïa kane,’ u la jubab. ‘Phi kwah ban ngin leit thiew noh ïa u kynbat?’ ki la kylli ïa u.

29 ‘Em’, u la jubab, ‘namar haba phi thiew ïa u kynbat, ïoh phi kum jynrat ïa u kew de.

30 Ieh u kew bad u kynbat kin ïasan lang haduh ka por ot, bad ngan sa ong ha ki nongot; To phut nyngkong ïa u kynbat, bad teh song ban thang, nangta sa lum ïa u kew bad thep ïa u ha ka thiar jong nga.’ ”

31 U Jisu U la ïathuh ha ki sa kawei pat ka pharshi: “Ka hima bneng ka long kum u symbai sinapa, u symbai u barit tam;

32 u briew u shim bad u bet ïa u ha la ka lyngkha, bad ynda u la san u long u jynthung u baheh tam. U kylla long u kynja dieng, haduh ba ki sim ki ïawan thaw skum ha ki tnat jong u.”

33 U Jisu U la ïathuh ha ki sa kawei pat ka pharshi: “Ka hima bneng ka long kum u thiat. Kawei ka kynthei ka shim bad ka btep ïa u bad lai pyrha u purew, haduh ba un da sieb baroh.”

34 U Jisu U la pyndonkam da ki pharshi ban ïathuh ïa kine kiei kiei baroh ha ki paidbah, bad khlem ka pharshi Um shym la kren ha ki.

35 Kumta la urlong kata kaba u nongïathuhlypa u la ong: “Ngan pyndonkam da ki pharshi haba nga kren ha ki, ngan ïathuh ha ki ïa kiei kiei ki barieh naduh ba seng ïa ka pyrthei.”

36 Te u Jisu U la phah noh ïa ki paidbah bad u la rung hapoh ïing. Ki synran jong U ki la wan kylli ïa U, “Batai seh ha ngi ïa ka pharshi u kynbat ha ka lyngkha.”

37 U Jisu U la jubab: “U briew uba la bet ïa u symbai babha u long u Khun u Briew;

38 ka lyngkha ka long ka pyrthei; u symbai babha pat ki long ki trai shnong jong ka hima; u kynbat u long ki khun jong u Bymman;

39 bad u dusmon uba la bet ïa u kynbat u dei u Soitan hi. Ka aïom ot ka long ka jingwai jong ka pyrthei bad ki nongot ki long ki angel.

40 Kumba la lum bad la thang ïa u kynbat, kumta kan long ynda wai ka pyrthei:

41 u Khun u Briew Un phah ïa la ki angel ban lum na ka Hima jong U ïa ki nongpynthut bad ki ’riewsniew baroh.

42 Kin bret ïa ki ha ka lawarding; hangta kin sa lynñiar bad kyriat bniat.

43 Ki paid u Blei pat kin sa phyrnai kum ka sngi ha ka hima u Kpa jong ki. Uba don ki shkor ban sngap, to un shah shkor!”

44 “Ka Hima bneng ka long kum ka spah ba la buhrieh ha ka lyngkha. U briew u kum lap ryngkhat ïa ka, kumta u buhrieh biang ïa ka. U la kmen haduh katta katta ba u leit die baroh katba u don, nangta u wan phai bad thied ïa kata ka lyngkha.

45 Ka hima bneng ka ïasyrïem ruh ïa u nongkhaïi uba wad ïa ki mawlynnai ki babha.

46 Ynda u shem uwei uba kham kordor, u leit die baroh katba u don, bad u thied ïa uta u mawlynnai.

47 “Ka hima bneng ka ïasyrïem ruh ïa ka jar ba la pynnoh ha ka duriaw; ki jait dohkha baroh ki ngat ha ka.

48 Ynda ka la dap, ki nongtong dohkha ki la ring ïa ka sha ryngkew, bad ki ïashong ban ïabate ïa ki dohkha: ïa ki babha ki thep ha ki jyndiang, ïa ki basniew ki pret noh.

49 Kan long kumjuh ynda wai ka pyrthei: ki angel kin leit ban lum ïa ki briew ki basniew napdeng ki babha,

50 bad kin lynsher ïa ki sha ka lawarding. Hangta kin sa lynñiar bad kyriat bniat.

51 “Hato phi sngewthuh ïa kine kiei kiei?” u Jisu U la kylli ïa ki. “Hooid” ki la jubab.

52 Kumta U la phai ktien, “Kata ka mut ba man u stad-aiñ uba kylla long u synran jong ka hima bneng, u long kum u trai ïing uba sei na ka khuiñ jong u ïa kiei kiei ki bathymmai bad ki barim.”

53 Ynda u Jisu U la dep ïathuh ïa kine ki pharshi, U la mih na kata ka jaka,

54 bad U la leit phai sha ka shnong lajong. U la hikai ha ka sinakok jong ki, bad kiba la ïohsngew ïa U ki la sngewlyngngoh. “Na-ei U la ïoh kat kane ka jingstad bad ka bor leh kam phylla?” ki la kylli.

55 “Hato Um dei u khun jong u misteri dieng? Hato Um dei u khun ka Maria, shipara bad u Jakob, u Joseph, U Simon bad u Judas?

56 Te kumta ki la kyntait ïa U. U Jisu U la ong ha ki: “U nongïathuhlypa u ïoh burom kylleng sawdong, lait tang ha shnong lajong bad hapdeng la ki kur ki jait.”

57 Te kumta ki la kyntait ïa U. U Jisu U la ong ha ki: “U nongïathuhlypa u ïoh burom kylleng sawdong, lait tang ha shnong lajong bad hapdeng la ki kur ki jait.”

57 Um shym leh bun ki kam phylla hangta namar ka jingbymngeit jong ki.