Matheus Lynnong 11
1 Ynda u Jisu U la dep sneng ïa la ki khat-ar ngut ki synran. U la mih na kata ka jaka bad U la leit ban hikai bad ban ïalap ha ki shnong jong ki.
2 Haba u Ïoannis Baptist u la ïohsngew na byndi shaphang ki jingleh jingkam u Khrist, u la phah katto katne ngut ki synran ban kylli ïa U,
3 “Dei ma Me Uba dei ban wan, ne ngin ap ïa uwei pat?”
4 U Jisu U la phai ktien: “Khie leit phai ban ïathuh ha u Ïoannis ïa kaba phi la ïohsngew bad la ïohi:
5 ki matlah ki ïohi biang, ki dkhoh ki ïaid biang, kiba sa-’ñianglyngkut ki la khuid, ki kyllut ki ïohsngew, ki baïap ki la khie im biang, bad ïa ka Khubor Babha, la ïalap ha ki baduk.
6 Suk u briew ubym thut namar jong Nga!”
7 Haba ki nonglam ktien ki la leit noh, u Jisu U la kren shaphang u Ïoannis ha ki paidbah. “Mynba phi la leit sha u Ïoannis ha ri kynjah, phi la khmih lynti ban ïohi aïu? Ïa u khah ba pynkhih ka lyer?
8 Te ïa-ei phi la ïaleit peit? Ïa u briew uba kup da ki jaiñ ni? Ki briew kiba riam kumta ki shong ha ki ïing syiem!
9 Ha ïathuh ïa Nga, ïa-ei keiñ phi la khmih lynti ban ïohi? Ïa u nongïathuhlypa? Hooid, Nga ong ha phi—phi la ïohi ïa u ba kham palat ban ïa u nongïathuhlypa.
10 Naba u Ïoannis u long uta ïa uba ki jingthoh ki kren: ‘Nga phah ïa u nonglam khubor jong Nga ha shuwa jong me—ong u Trai—ban pynkhreh ïa ka lynti jong me.
11 Nga ong ha phi, ym pat ju don briew ba la kha na ki kynthei, uba khraw kat u Ïoannis Baptist. La jar katta u barit tam ha ka Hima bneng u palat ïa u.
12 Naduh ka por ba u Ïoannis u la sdang ban ïalap haduh mynta, ka Hima bneng ka la shah thom bor, bad kiba ïaw mynsiem ki knieh ïa ka.
13 Baroh ki nongïathuhlypa bad ka Aiñ u Moses ki la ïathuh lypa haduh ka por u Ïoannis;
14 bad lada phi kloi ban pdiang ïa ka jingïathuh lypa jong ki, u Ïoannis keiñ u dei u Elija uban sa wan.
15 Uta uba don ki shkor ban sngap, to un shah shkor!”
16 “Bad ei Nga lah ban ïanujor ïa ki briew ka juk mynta? Ki long kum ki khynnah kiba shongkai ha ïew; ki ïapyrta uwei ïa uwei pat,
17 ‘Ngi la put la tem na ka bynta jong phi bad phim shym la shad! Ngi la rwai bynñiaw hynrei phim shym la ïam!’
18 U Ïoannis u la wan, u la shah jingit bad um dih waiñ, te baroh ki ïa ong, ‘u king khlieh!’
19 U Ïoannis u la wan, u la shah jingit bad um dih waiñ, te baroh ki ïa ong, ‘u king khlieh!’
20 Te u Jisu U la sdang ban tim ïa ki shnong ha kiba U la leh bun ki kam phylla, namarba ki briew kim treh ban kylla ka bamut.
21 “Kordit ïa pha, Khorasin! Kordit ïa pha, Bethsaida! Naba lada ïa ki kam phylla ba la leh ha phi la leh ha Tirus and Sidon, la slem kin jin da la kylla ka bamut da kaba phong jaiñ byrni bad da kaba ber dpei ïa lade!
22 Nga ong ha phi” ba ha ka akher ka sngi u Blei Un sa kham isynei ïa ki Tirus bad ki Sidon ban ïa phi!
23 Ma pha pat ko Kapernaum, hato yn kyntiew ïa pha haduh bneng? Yn sa pynnoh arsut ïa pha sha dujok! Lada ïa ki kam phylla ba la leh ha pha la leh ha Sodom, kan da la sah haduh mynta!
24 To kynmaw te ba ha ka akher ka sngi u Blei Un sa kham isynei ïa ka Sodom ban ïa pha!”
25 Ha kata ka por u Jisu U la ong: “Nga ainguh ïa Me, ko Kpa, ko Trai ka bneng bad ka khyndew, naba Me la buhrieh ïa kine kiei kiei na ki bastad bad ki basian, bad Me la pynpaw ïa ki ha ki rit ki ria.
26 Hooid, ko Pa, Me la ibit kumta.”
27 Ïa kiei kiei baroh la pynkhamti ha Nga da u Kpa jong Nga. Ym don, ba ithuh ïa u Khun lait tang u Kpa, bad ym don ba ithuh ïa u Kpa lait tang u Khun, bad kito ha kiba u Khun U ibit ban pynpaw ïa U.”
28 “To wan sha Nga phi baroh kiba shitom bad kiba khia jingkit, bad Nga Ngan pynjahthait ïa phi.
29 To bah ïa ka lyngkor jong Nga, bad to hikai na Nga naba Nga long u bajemnud bad u basngewrit ka dohnud. Te ka mynsiem jong phi kan shem jingjahthait
30 naba ka lyngkor jong Nga ka long ka basuk, bad ka jingkit jong Nga ka long ka basting.”