Markus Lynnong 9

 

1 U Jisu U la ong ruh: “To kynmaw ïa kane! Don na phi hangne kiban ym ïap haduh ba kin da ïohi ïa ka Hima u Blei ba ka wan da ka bor.

2 Hynriew sngi hadien, u Jisu U la khot lang bad U ïa u Petrus, u Jakob bad u Ïoannis, bad U la ïalam kyrpang ïa ki halor u lum bajrong. Katba ki dang ïapeit, U la kylla dur,

3 bad ki jaiñ jong U ki la tyngshaiñ bad ki la lieh phalang kham palat ban ïa kaba uno uno u nongsaitjaiñ u lah ban pynlieh.

4 Ki lai ngut ki synran ki la ïohi ïa u Elija bad u Moses ba ki ïakren bad u Jisu.

5 U Petrus u la ong ha u Jisu: “Ko Nonghikai, ka bha ba ngin sah noh hangne. Ngin ïathaw lai tylli ki ïing trep, kawei ïa Me, kawei ïa u Moses bad kawei ïa u Elija.”

6 Um tip aïu u ong; baroh ki la tieng haduh katta katta.

7 U lyoh u la paw bad u la kah syrngiew ïa ki, bad kawei ka sur ka la wan na uta u lyoh: “Une U long u Khun ba-ieid jong Nga—to sngap ïa U!”

8 Markumta haba ki la peit sawdong kim shym la ïohi shuh ïano ïano, lait tang ïa u Jisu.

9 Katba ki dang wan hiar na u lum, u Jisu U la bidong ïa ki ban ym ïathuh hano hano ïa kata kaba ki la ïohi, tat ynda u Khun u Briew U la mihpat na ka jingïap.

10 Ki la kohnguh ïa ka hukum jong U, hynrei para ma ki ki la ïatainia ka mut aïu kane ka ‘jingmihpat na ka jingïap.’

11 Te ki la kylli ïa u Jisu “Balei ki Stad-aiñ ki ong ba u Elija u dei ban wan shuwa?”

12 U la jubab: “U Elija un wan shuwa keiñ ban pynkhreh ïa kiei kiei. Te balei ki jynthoh pat ki ong ba u Khun u Briew Un shah shitom shibun bad Un shah kyntait?

13 Nga ïathuh ïa phi ba u Elija u la lah wan, bad ba ki briew ki la leh ïa u kat kaba ki kwah, thik kumba ki ong ki jynthoh shaphang jong u.”

14 Haba ki la ïakynduh ïa kiwei pat ki synran, ki la ïohi ïa u paidbah byllien hangta. Ki Stad-aiñ ki ïatainia bad ki synran.

15 Ki paidbah ki tang shu ïohi ïa u Jisu, ki la kyndit thret bad ki la ïamareh ban ai khublei ïa U.

16 U Jisu U la kylli ïa ki synran jong U, “Phi ïatainia aïu bad ki?”

17 Uwei u briew napdeng u paidbah u la jubab, “Ko Nonghikai, nga la wan ïalam sha Me ïa u khun jong nga, namarba la kem ksuid ïa u bad um lait ban kren.

18 Wei ba u kem ïa u, u lympat ïa u ha khyndew, u khynnah pat u sei tyrtho na ka shyntur, u kyriat ki bniat, bad u eh ka met baroh shirynïeng. Nga la ong ïa ki synran jong Me ban beh ïa u ksuid hynrei kim lah.”

19 U Jisu U la ong ha ki: “Phi ki briew kibym don jingngeit! Sa katno Ngan dang dei ban sah bad phi? Sa katno Nga dei ban ïaishah ïa phi? Wanlam ïa u khynnah sha Nga!”

20 Ki la wanlam ïa u sha u Jisu. U ksuid u tang shu ïohi ïa u Jisu, u la pynring kyrthat ïa u khynnah haduh ba u la kyllon ha khyndew, bad u la tyllun sawdong sawdong, u da sei tyrtho ha ka shyntur.

21 “Naduh mynno u la long kumne?” u Jisu U la kylli ïa u kpa, “Naduh dang khynnah,” u la jubab.

22 “Bunsien u ksuid u la pyrshang ban pynïap ïa u da kaba lympat ïa u ha ka ding bad ha ka um. To isynei ïa ngi bad to ïarap ïa ngi, lada Me lah!”

23 “Lada Nga lah? Baroh ka long ka balah ïa uta uba ngeit!” la ong u Jisu.

24 U kpa shisyndon u la pyrta jam, da kaba jaw ummat: “Nga ngeit ko Trai, to pynkhlaiñ ïa ka jingtlot jingngeit jong nga. To ïarap seh ïa nga!”

25 U Jisu U la ïohi ba u paidbah u ïawan tur shajan, kumta U la dumok ïa u mynsiem bymman. “Ko mynsiem kyllut bad teh thylliej” U la ong, “Nga hukum ïa me: To mih noh na u khynnah bad wat rung shuh hapoh jong u!”

26 Da kaba lynñiar, u ksuid u la pynkyrthat ïa u khynnah bad u sa mih. U khynnah u la long kum u baïap, haduh ba baroh ki la ong, “U la ïap!”

27 Hynrei u Jisu U la shim ïa u khynnah na ka kti, U la khyllie ïa u, bad une u la ïeng.

28 Ynda u Jisu U la rung hapoh ïing, ki synran ki la kylli ïa u jar jar: “Balei ma ngi ngim shym lah ban beh noh ïa u ksuid?”

29 U Jisu U la jubab: “ïa kane ka jait ksuid ym lah ban beh satia da-ei da-ei, lait tang da ka jingduwai (bad ka jingshah jingit).”

30 Ki la mih na kata ka jaka bad ki la leit lyngba ka Galilea. U Jisu Um shym kwah ba ki briew kin tip ha-ei U don,

31 namar U la dang hikai ïa la ki synran: “Ïa u Khun u Briew yn sa aiti ha kito kiban pynïap ïa U; hynrei lai sngi hadien, Un sa mihpat.”

32 Kim shym sngewthuh ka mut aïu kane ka jinghikai, bad ki la khaw-eit ban kylli ïa U.

33 Ki la wan poi sha Kapernaum, bad ynda ki la rung hapoh ïing, u Jisu U la kylli ïa la ki synran: “Phi ïasaid aïu ha lynti?”

34 Hynrei kim treh ban jubab ïa U, namar ha lynti ki la ïasaid para ma ki u-ei u bakhraw tam

35 U Jisu U la shong, U la khot ïa ki khat-ar ngut ki synran bad U la ong ha ki: “Jar uba kwah ban long u banyngkong, u dei ban kheiñ ïa lade u bakhatduh eh bad ban long u shakri ïa baroh.”

36 U la shim ïa uwei u khynnah bad U la pynïeng ïa u hakhmat jong ki. Nangta U la piam ïa u bad U la ong ha ki,

37 “Jar uba pdiang sngewbha ïa uwei na kine ki khynnah rit ha ka kyrteng jong Nga, u pdiang ïa Nga; jar uba pdiang ïa Nga, um pdiang tang ïa Nga, hynrei ïa Uta ruh Uba la phah ïa Nga.”

38 U Ïoannis u la ong ha u Jisu, “Ko Nonghikai, ngi la ïohi ïa u briew uba beh ksuid ha ka kyrteng jong Me, bad ngi la khang ïa u namar um dei u jong ngi.”

39 “Wat khang ïa u,” u Jisu U la jubab, “namar ym don u briew uba leh kam phylla ha ka kyrteng jong Nga, uba, ha kajuh ka por, un kren sniew artat ïa Nga.

40 Jar ubym long pyrshah ïa ngi, u long bad ngi.

41 Uno uno uba ai ïa phi ka um ban dih namarba phi dei ki jong u Khrist, un ym pep ban ïoh ïa la ka bainong.

42 “Shaphang kine ki khynnah rit kiba ngeit ha Nga—kan kham bha ïa u briew ba yn teh da u maw tylliat ha ka ryndang jong u bad ba yn pynnoh hapoh duriaw, ban ïa kaba un pynthut ïa uwei uba kum kine.

43 Kumta lada ka kti jong phi ka pynleh pop ïa phi, to ot noh ïa ka! Ka kham bha ïa phi ban rung dkoh ha ka jingim, ban ïa kaba don ar tylli ki kti ban leit sha dujok, sha ka ding bymjulip

45 Bad lada ka kjat jong phi ka pynleh pop ïa phi, to ot noh ïa ka! Ka bha ïa phi ban rung dkoh ha ka jingim ban ïa kaba don ar tylli ki kjat ban shah bret sha dujok.

47  Bad lada ka khmat jong phi ka pynleh pop ïa phi, to khlaw noh ïa ka! Ka kham bha ïa phi ban rung ha ka Hima u Blei tang shiliang ka khmat, ban ïa kaba don ar tylli ki khmat ban shah bret sha dujok,

48  ha kaba u ksaiñ jong ka um ïap bad ka ding kam lip.

49 “Ïa uwei pa uwei yn pynkyllan mluh da ka ding.

50 Ka mluh ka bha. Hynrei lada ka mluh ka kylla blad, da-ei yn pynbang pat ïa ka? To don mluh ha la ka dohnud, bad phin ïasuk para ma phi.”