Markus Lynnong 7

 

1 Ki Pharisi bad katto katne ki Stad-aiñ kiba la wan na Jerusalem ki la ïalang sawdong u Jisu.

2 Ki la ïohi ba don ki synran jong U kiba ïabam jynbam da ki kti ‘bymkhuid’—kata ka mut, khlem thet.

3 Ki Pharisi bad ki Ju baroh ki bud ïa ka dustur ki longshuwa; kim ju bam khlem da thet bha ïa la ki kti;

4 haba ki wan na ïew ruh, lymda ki sum shuwa, kim bam. Ki bud bun kiwei pat ki dustur kiba ki la ïoh pateng, kum kaba sait ïa ki khuri, ki khiew, ki khuri tama, bad ki jynthiah.

5 Kumta ki Pharisi, bad ki Stad-aiñ ki la kylli ïa u Jisu, “Balei sha ki synran jong Me kim bud ïa ka jinghikai ba la ai pateng da ki longshuwa jong ngi, hynrei pynban ki bam da ki kti bymkhuid?”

6 U Jisu U la jubab ïa ki” “U Isaïa u la ïathuh lypa ka badei shaphang jong phi ki ’riew-arsap. ‘U ong u Blei, Kine ki briew ki burom ïa Nga da ka rymmiang shyntur, ka dohnud jong ki pat ka jngai na Nga.

7 Ki mane thala ïa Nga, namar ki hikai ïa ka aiñ thaw briew kumba ki long ki hukum u Blei!’ ”

8 Bad u Jisu U la ong, “Phim kheiñ snep ïa ka hukum u Blei, bad phi kohnguh ïa ka dustur ki briew.”

9 Bad U la pynbud: “Phi don ka buit sian ban ïaid lait ïa ka aiñ u Blei khnang ban pynneh ïa la ka jong ka jinghikai!

10 Naba u Moses u la hukum, ‘To burom ïa la u kpa bad la ka kmie,’ bad ‘Jar uba kren pyrshah ïa la u kpa bad ka kmie u dei ban shah ïap.’

11 Phi pat phi hikai ba lada u briew u don ei ei kaba u dei ban ïarap ïa la u kpa ne ka kmie, u ong pynban, ‘Kane ka long Korban’ (kata ka mut, nga la tyrwa ha u Blei),

12 u lait na kaba ïarap ïa la u kpa ne ka kmie.

13 Da kumne phi pynlehnoh-ei ïa ka ktien u Blei na ka bynta ka dustur hiar pateng jong phi. Bad bun kiei kiei kiba kum kine phi leh.”

14 Nangta u Jisu U la khot biang ïa u paidbah bad U la ong ha ki: “To sngap ïa Nga phi baroh, bad to pyrshang ban sngewthuh.

15 Ym don ei ei nabar kaba rung hapoh jong u briew kaba lah ban pyntngit ïa u. Pynban, dei kata kaba mih na u briew keiñ kaba pyntngit ïa u.

16 Lada uno uno u don ki shkor ban sngap, to un shah shkor!”

17 Haba U la ieh noh ïa u paidbah, U la leit rung hapoh ïing, bad ki synran jong U ki la kylli shaphang kane ka pharshi.

18 “Phi ruh ki baluiñ jingmut kum kiwei pat mo?” u Jisu U la ong ha ki. “Phim sngewthuh? Ym don ei ei kaba rung ha u briew nabar, kaba lah ban pyntngit ïa u,

19 namar kam leit ha ka dohnud jong u, hynrei ha ka ’nierbah bad nangta ka mih noh haba leit rud.” (Kumta u Jisu U la kheiñ khuid ïa ki jynbam baroh.)

20 Nangta U la pynbud: “Kata kaba mih na u briew kata keiñ kaba pyntngit ïa u.

21 Naba na shapoh—na ka dohnud u briew—ki mih ki jingkwah ki basniew kiba ïalam ïa u ban tuh, ban pynïap briew,

22 ban klim, ban khwan lalot, bad ban leh ki kam sniew har rukom; ka jingshukor, ka jingkhlemraiñ, ka jingpihuiñ, jingthadrong, ka jinghangamei, bad ka jingmutlop biej—

23 baroh kine ki jingsniew ki mih na shapoh u briew bad ki pyntngit ïa u.”

24 Nangta u Jisu U la leit sha ka thaiñ Tirus bad Sidon. U la leit rung ha kawei ka ïing bad Um shym la kwah ban tip mano mano ruh; hynrei um lah ban rieh.

25 Kawei ka kynthei, kaba don ka khun kaba shongksuid, ka la ïohsngew shaphang u Jisu, ka la wan shisyndon bad ka la dem khrup ha ki kjat jong u.

26 Ka la long ka kynthei jentil, ba la kha ha Phenisha, ri Siria. Ka la kyrpad ïa u Jisu ban beh noh ïa u ksuid na ka khun jong ka.

27 Hynrei u Jisu U la jubab, “Shuh ngin ai bam shuwa ïa ki khun; kam long ka badei ban shim ïa ka jynbam jong ki khun bad ban bret ha ki ksew.”

28 “Ko Kynrad,” ka la jubab “wat ki ksew ïing hapoh ka miej, ki bam ïa ki lyngkhot lyngkhai ba bret ki khun!”

29 Te u Jisu U la phai ktien ha ka, “Haduh katta phin ong! To khie leit suk sha ïing; u ksuid u la mih na ka khun jong phi!”

30 Kumta ka la leit phai sha ïing bad ka la shem ba ka khun ka thiah ha jynthiah; u ksuid u la mih noh da shisha na ka.

31 U Jisu nangta U la mih na ki thaiñ Tirus, U la ïaid lyngba ka Sidon shaduh ka Pung Galilea, da kaba ïaid lynti na ka ilaka Shiphew Shnong.

32 Don kiba la wan rah sha U uwei u briew u bakyllut bad u bymnangkren, bad ki la kyrpad ba Un buh ïa la ka kti halor jong u.

33 Te u Jisu U la ïalam ïa u marwei, pajih na u paidbah; U la buh ïa la ki shympriah’ti ha ki shkor jong u, U la biah, bad U la pyndei ïa u thylliej jong u da ka umbiah.

34 Nangta u Jisu U la khmied sha bneng, U la ud, bad U la ong ha uta u briew, “Ephphatha!” (kaba mut, ‘To long balaplie!’).

35 Mar kumta ki shkor uta u briew ki la plie, u thylliej jong u u la lait, bad u la sdang ban kren beit.

36 U Jisu U la hukum ïa ki baroh ban ym ïathuh briew; hynrei katba u nang adong ïa ki, katta ki nang pynbna.

37 Kat kiba la ïohsngew ki la lyngngoh jlang. “Katno U leh bha nadong shadong!” ki ïa-ong. “U pynïohsngew ïa ki bakyllut bad pynkren ïa ki bymnangkren!”