Markus Lynnong  15

 

1 Tang shu kynjat shai mynstep, ki rangbah lyngdoh ki la ïakynduh kyrkieh bad ki tymmen ki san, ki Stad-aiñ, bad ka Dorbar baroh kawei, ban ïarai lang. Ki la teh la khum ïa u Jisu, ki la ïalam noh ïa U bad ki la aiti ïa U ha u Pilatus.

2 U Pilatus u la kylli ïa U: “Me long u syiem ki Ju?” U Jisu U la jubab: “Hooid, ka dei kumba me ong.”

3 Ki rangbah lyngdoh ki la mudui bun kiei kiei pyrshah ïa u Jisu,

4 kumta u Pilatus u la kylli biang ïa U: “Mem jubab ei ei? Peit katno ki jingmudui pyrshah ïa Me!”

5 U Jisu U la sngap la ka sngap, bad u Pilatus u la lyngngoh ngaiñ.

6 Man la ka sngikhawai, u Pilatus u la ju pyllait uwei u koidi kat uba ki pan.

7 Ha kata ka por la don ha byndi uwei u briew uba kyrteng u Barabbas, ïa uba la set lang bad ki ’riewdakaid kiba la pynïap briew ha ka jingkhihwin.

8 Haba u paidbah u la ïalum lang bad u la kyrpad ïa u Pilatus ban leh kumba u ju leh,

9 u Pilatus u la kylli ïa ki: “Phi kwah ba ngan pyllait ïa u Syiem ki Ju?”

10 U la tip shai ba ki rangbah lyngdoh ki la aiti ïa u Jisu ha u namarba ki bishni.

11 Hynrei ki rangbah lyngdoh ki la kynshoit ïa u paidbah ban pan ba un pyllait ïa u Barabbas pynban.

12 U Pilatus u la kren ïa u paidbah: “Te phi kwah ban ngan leh aïu ïa Une Uba phi khot u Syiem ki Ju?”

13 Ki la ïapyrta jam “Sahnarphna ïa U!”

14 ”Hynrei U la leh sniew aïu?” la kylli u Pilatus. Ki la nangpyrta jam pynban, “Sahnarphna ïa U!”

15 U Pilatus pat, ba u kwah ban pynhun ïa u paidbah, u la pyllait ïa u Barabbas. Nangta u la phah sympat ïa u Jisu, bad u la aiti ba kin sahnarphna ïa U.

16 Ki shipai ki la ïalam ïa u Jisu sha phyllaw ïing u lat bad ki la khot lang ïa ka kynhun baroh kawei.

17 Ki la pynkup ïa u Jisu da ka jaiñsaw, ki la thaiñ ka pansngiat shiah, bad ki la pynphong ïa ka ha ka khlieh jong U.

18 Nangta ki la sdang ban khublei ïa U: “Khublei, ko Syiem ki Ju!”

19 Ki la tied ïa U na ka khlieh da u khah, ki la bynthiew ïa U, bad da kaba dem khohsiew hakhmat jong U, ki la leh mynleh kum ban nguh syiem ïa U.

20 Ynda ki la lah rkhie beiñ ïa U, ki la weng noh ïa ka jaiñsaw na U bad ki la pynkup da ki jaiñ jong U hi. Hadien kata ki la ïalam noh ïa U ban sahnarphna.

21 Ha lynti ki la ïakynduh ïa uwei u briew uba kyrteng u Simon, uba dang wan phai na lum; te ki la pynbor ïa u ban bah ïa ka diengphna u Jisu, (Une u dei u Simon uba na Kirini, u kpa u Aleksander bad u Ruphus).

22 Ki la ïalam ïa u Jisu sha ka jaka ba la khot Golgotha, kaba mut, ‘Ka jaka Maloikhlieh.’

23 Ki la pyrshang ban ai ïa U ka waiñ ba la khleh bad ka mir, hynrei u Jisu Um treh dih.

24 Kumta ki la sahnarphna ïa U, bad ki la ïasam ïa ki jaiñ jong U da kaba ïakhalai nusib kat u badonbok.

25 Ka la long khyndai baje mynstep haba ki la sahnarphna ïa U.

26 Ki la thoh ïa ka jingmudui pyrshah ïa U, “U Syiem ki Ju

27 Sha kadiang bad sha kamon u Jisu, ki la sahnarphna ïa ar ngut ki dakaid.

29 Ki briew kiba ïaid lynti ki la kyrngah khlieh, ki la kyrkoh ïa u Jisu: “Kok khai! Me Uba la mut ban pyntwa ïa ka Tempyl bad ban tei ïa ka ha ki lai sngi!

30 Hiar mynta na kato ka diengphna bad pyllait ïa lade!”

31 Ha kajuh ka rukom ki rangbah lyngdoh bad ki Stad-aiñ ki la rkhie beiñ ïa u Jisu da kaba ïa-ong para ma ki: “Ïa kiwei U la pynim, hynrei ïa lade te Um lah!

32 Shuh ngin ïapeit ïa u Khrist, u Syiem ka Israel, ba U hiar mynta na ka diengphna, bad ngin ïangeit ïa U!” Bad ki ar ngut kiba la shah sahnarphna lang, ki ruh ki la kren beiñ ïa U.

33 Ha ka por shiteng sngi, ka ri baroh kawei ka la dum tliw haduh lai kynta.

34 Ha ka por lai baje u Jisu U la pyrta da ka sur ka bajam, ‘Eloi, Eloi, lama sabakhthani’? (Kaba mut, “Ko Blei jong nga ko Blei jong Nga, balei Me la ieh noh lyndet ïa Nga?”)

35 don na kiba ïaïeng hangta kiba la ïohsngew ïa U, bad ki la ong, “Ha sngap, U khot ïa u Elija!”

36 Uwei na ki u la mareh ban shim u sponj, u la wieh ïa u ha ka sirka, bad u la sieh ha tduh u dieng. Nangta u la pyndei ha ki rymmiang shyntur u Jisu, u ong, “Shuh, ngin ïapeit lada u Elija un wan ban pynhiar ïa U na ka diengphna!”

37 U Jisu U la pyrta jam, bad U la dkhut mynsiem.

38 Ka pyrda jong ka Tempyl ka la kad ar liang naduh khlieh haduh trai.

39 U rangbah shispah uba la ïeng mar pyrshah ka diengphna bad uba la ïohi kumno u Jisu U la ïap, u la phla, “Une U dei shisha u Khun u Blei!”

40 La don ruh ki kynthei hangta, kiba ïapeit na jngai. Hapdeng jong ki la don ka Maria Magdalena, ka Maria ka kmie u Jakob khynnah bad u Joses, bad ka Salome.

41 Kine ki la shait bud ïa u Jisu mynba U la don ha Galilea, bad ki la shakri ïa U. La don ruh kiwei pat ki kynthei hangta, kiba la wan bad U sha Jerusalem.

42 Ka la premmiet haba u Joseph na Arimathea u la poi.

43 U la long u rangbah shong dorbar badonburom uba la khmih lynti ïa ka jingwan ka Hima u Blei. Ka la long ka Sngi Pynkhreh (kata ka mut, ka sngi shuwa ka sabath); kumta u Joseph u la leit da kaba shlur hakhmat u Pilatus bad u la pan ïa ka met u Jisu.

44 U Pilatus u la lyngngoh ban ïohsngew ba u Jisu U la da ïap. U la khot ïa u rangbah shispah bad u la tohkit na u lada u Jisu U la ïap.

45 Haba u la tip na u rangbah shispah, u Pilatus u la ai ïa ka met ha u Joseph.

46 Une u la thied ka jaiñ linen, u la pynhiar ïa ka met u Jisu, u la spaiñ ïa U da ka jaiñ, bad u la buh ïa U ha ka jyntep ba la khlong ha u mawsiang. Nangta u la pyntyllun ïa u maw sha ka jynkhang jyntep.

47 Ka Maria Magdalena bad ka Maria ka kmie u Joses ki la peit-thuh bad ki la ïohi hangno la buh ïa u Jisu.