Markus Lynnong 12

 

1 U Jisu U la kren biang ha ki da ki pharshi: “La don uwei u briew uba la rep ka brisoh waiñ, u la ker baroh sawdong, u la tih thliew na ka bynta ka korkhem umsoh waiñ, bad u la tei ka ïing ap-phira. Nangta u la ai wai ïa ka brisoh ha ki nongrep, bad u la leit jingleit.

2 Ha ka aïom soh, u la phah ïa u shakri sha ki nongrep wai ban shim ïa la ka bynta na ka jingkheit soh,

3 ki la kem ïa u shakri ki la shoh ïa u bad ki la phah thylli.

4 Te u trai u la phah sa da uwei pat u shakri; ki la shoh ïa u ruh na ka khlieh bad ki la lehbeiñ ïa u.

5 U trai u la phah sa da uwei pat u shakri, bad ki la pynïap ïa u; bad ki la leh kumjuh ïa bun kiwei pat; don kiba ki shoh, don kiba ki pynïap.

6 Dang sah sa tang uwei ban phah, u khun thep-mynsiem jong uta u briew. Te khatduh khatwai u la phah ïa la u khun sha ki. ‘Nga ngeit skhem kin burom ïa u khun jong nga,’ u la ong.

7 Hynrei kita ki nongshim wai ki la ïa-ong para ma ki, ‘Une u long u nongïoh pateng. Ïa ngin pynïap noh ïa u, bad ka brisoh waiñ kan long ka jong ngi!’

8 Kumta ki la kem ïa u khun bad ki la pynïap ïa u, bad ki la bret ïa ka met jong u shabar ka brisoh.

9 “Haba kumta, u trai ka brisoh un leh aïu ?” la kylli u Jisu, “Un wan bad un pynïap ïa kita ki briew, bad un ai ïa ka brisoh waiñ ha kiwei pat ki nongtrei wai.

10 Khlem pep phi la pule ïa kane ka Jynthoh: ‘U maw ïa uba ki nongtei ki la kyntait, u la kylla long u mawdong jong ka ïing.

11 Dei u Trai Uba la leh ïa kane. Katno ka long ka baphylla!’ ”

12 Ki rangbah Ju ki la wad lad ban kem ïa u Jisu, namarba ki la tip ba U la ïathuh khnang ïa kane ka pharshi pyrshah ïa ki. Hynrei ki la sheptieng ïa u paidbah, kumta ki la ieh noh ïa U bad ki la leit noh.

13 La phah katto katne ngut ki Pharisi bad ki Herodian sha u Jisu ban ïoh kem daw ïa U ha ka jingkren.

14 Ki la wan sha U bad ki la ong: “Ko Nonghikai, ngi tip ba Me long u bahok, Ubym salia ïa kaba ki briew ki pyrkhat. Mem ñiew shiliang khmat ïano ïano ruh, hynrei Me hikai shida ïa ka mon u Blei. Ha ïathuh ïa ngi, ka bit ne em ban siew khajna ha u Kaisar? Ngi dei ban siew ne em?”

15 U Jisu U la ïohi lyngba ïa ka buit-tuh jong ki bad U la jubab: “Balei phi pyrshang ban riam ïa Nga? Ha wan rah ka tyngka rupa ba Ngan peit.”

16 Ki la wan rah ha U kawei, bad U la kylli, ‘Kane ka dur bad ka jynthoh jongno?’ “Ki jong u Kaisar,” ki la jubab.

17 Kumta u Jisu u la ong, “Te to siew ha u Kaisar ïa ki jong u Kaisar bad ha u Blei ïa ki jong u Blei.” Te ki la sngewphylla ïa U.

18 Ki Sadusi ki la wan sha u Jisu. (Dei ma ki kiba ong ba ki briew kin ym mihpat na ka jingïap.)

19 “Ko Nonghikai,” ki la ong, “u Moses u la thoh kane ka aiñ na ka bynta jong ngi: ‘Lada u briew u ïap bad u ieh noh ka tnga khlem khun, u para jong uta u briew u dei ban shim lok ïa kane ka ’riewkynthei, khnang ba kin dup ïoh khun na ka bynta uba la ïap.’

20 Te ki la ïadon hynñiew ngut shipara; u hynmen rangbah u la ïoh lok bad u la ïap khlem khun.

21 Uba bud u la shim tnga ïa kata ka ’riewkynthei, bad u ruh u la ïap khlem khun. Ka la jia kumjuh ha u para u balai,

22 bad nangtra ter ter; baroh hynñiew ngut shipara ki la ïashong bad kata ka kynthei bad ki la ïap khlem khun. Khatduh eh, la ïap ka kynthei.

23 Mynta, ha ka sngi jingmihpat haba ki la khie im baroh, kan long ka tnga jongno? Baroh hynñiew ngut ki la dei lok ïa ka!”

24 U Jisu U la jubab ïa ki: “Katno phi bakla! Phi tip balei? Dei namar ba phim tip ïa ki Jynthoh ne ïa ka bor Blei.

25 Naba ynda ki baïap ki la mihpat, kin long kum ki angel ha bneng; hangta kin ym ïapoikha poiman.

26 Nalor kane, shaphang ka jingmihpat jong ki baïap, hato phim shym la pule ha ka Kitab u Moses shaphang ka ’lawbniap kaba ing? Kumno U Blei U la ong ha u Moses, ‘Nga long u Blei jong u Abraham u Blei jong u Isaak, bad u Blei jong u Jakob.’

27 U long u Blei jong ki ba-im, ym jong ki baïap. Phi la bakla nadong shadong!”

28 U Stad-aiñ uba la don hangta u la ïohsngew ïa kine ki jingïakren. U la ïohi ba u Jisu U la jubab ka badei ïa ki Sadusi, kumta u la wan ban kylli ïa U: “Kaei ka hukum ka bakongsan tam?”

29 “Kane ka long ka bakongsan tam,” la jubab u Jisu. “ ‘To shah shkor, ko Israel! U Trai u Blei jong ngi U long tang ma U u Trai.

30 Te namarkata phi dei ban ieid ïa u Trai u Blei jong phi da ka dohnud jong phi baroh, da ka mynsiem jong phi baroh, da ka jingmut jong phi baroh bad da ka bor jong phi baroh.’

31 Bad kane ka dei ka hukum ka ba-ar; ‘Phi dei ban ieid ïa la u para briew kum ïa lade hi.’ Ym don kano kano kawei pat ka hukum kaba kham kongsan ban ïa kine ar.”

32 Uta u Stad-aiñ u la ong ha u Jisu: “Me la kren ka badei, ko Nonghikai! Da shisha, kumba Me ong, ba don uwei u Blei bad ym don uwei pat lait na U.

33 Kumta u briew u dei ban ieid ïa u Blei da ka dohnud jong u baroh, da ka jingmut jong u baroh, bad da ka bor jong u baroh; bad u dei ban ieid ïa la u para briew kum ïa lade hi. Ka kham bha skikatdei eh ban kohnguh ïa kine ki hukum ar tylli ban ïa kaba wan rah ki mrad ban thang halor ka duwan bad ban tyrwa jynkñia ha u Blei.”

34 U Jisu U la ïohi katno U la ai ka jubab ka bastad, bad U la ong ïa u: “Phim jngai na ka Hima u Blei.” Hadien kane ym don ba nud kylli ei ei shuh ïa u Jisu.

35 Katba u Jisu U dang hikai ha ka tempyl U la buh ka jingkylli: “Kumno ki Stad-aiñ ki lah ban ong ba u Khrist Un hiar pateng na u Dabid?

36 U Mynsiem Bakhuid U la pyrsad mynsiem ïa u Dabid ban ong: ‘U Trai U la ong ha u kynrad jong nga: To shong ha ka kamon jong Nga, tat haduh ba Ngan da buh ïa ki nongshun jong Me hapoh ki slajat jong Me.’

37 U Dabid u la khot ïa U ‘U Kynrad’: te kumno u Khrist U lah ban long u khun u ksiew jong u Dabid?” U paidbah paidsan u la sngap ïa u Jisu da ka jingkmen.

38 Katba U hikai ïa ki, U la ong: “Da husiar bha ïa ki Stad-aiñ, kiba kwah ban ïaid pynnoh jaiñkup bad ba yn ai khublei ïa ki ha ka jaka ïew.

39 Ki wad ki jaka ki bakynsai ha ki sinakok bad ki jaka khmat ha ki jingkhawai.

40 Ki bam-duh ïa ki ’riewkynthei bad ki lute ïa ki ïing jong ki, katba ki leh mynduwai jlan! Kin sa ïoh ka rai pynrem kaba kham jur!”

41 Katba u Jisu u dang shong pyrshah ïa ka jaka thep jingkynshew ha ka Tempyl, U la peit-thuh kumno u paidbah u noh pisa. Bun ki bariewspah ki la noh shibun;

42 nangta la wan kawei ka ’riewkynthei ka baduk, bad ka la noh ar damli kiba shongdor lajan shipisa.

43 U la khot lang ïa ki synran jong U bad U la ong ha ki: “Nga ong ha phi ba kane ka ’riewkynthei ka baduk ka la noh kham bun ha ka jingkynshew ban ïa kiwei pat baroh.

44 Namarba kiwei pat ki la noh ïa kaba tam na ka spah jong ki; hynrei ma ka, namarba ka duk, ka la noh lut katba ka don ei ban im.”