Markus Lynnong 10

 

1 U Jisu U la leit nangta sha ka thaiñ Judea, bad U la jam ïa ka Jordan. Ki paidbah ki la ïalum biang ïa U bad U la hikai ïa ki, kumba U ju leh.

2 Katto katne ngut ki Pharisi ki la wan sha U bad ki la tynjuh ïa U da kaba kylli, “Ha ïathuh ïa ngi, ka bit ne em ïa u briew ban pyllait ïa la ka tnga?”

3 U Jisu U la jubab da kawei pat ka jingkylli: “U Moses u la hukum aïu ïa phi?”

4 Ki la ong, “U Moses u la shah ban thoh ïa ka kot ïapyllait, bad ban phah noh ïa ka tnga.”

5 U Jisu U la phai ktien: “U Moses u la thoh ïa kane ka hukum namarba phi long kiba eh dohnud.

6 Hynrei naduh basdang ka pyrthei (kumba ngi shem ha ka jynthoh) ‘u Blei U la thaw ïa ki, shynrang bad kynthei.

7 Te na kane ka daw u briew un ïeh noh ïa la u kpa bad ïa la ka kmie, bad un ïasoh bad la ka tnga,

8 bad ki ar ngut kin long kawei.’ Kumta kim long shuh ar, hynrei kawei.

9 Te u briew um dei ban pynkhlad ïa kaba u Blei U la pynïasoh lang.”

10 Ynda ki la leit phai shapoh ïing, ki synran ki la kylli ïa u Jisu shaphang kane ka kam.

11 U la ong ha ki: “U briew uba pyllait ïa la ka tnga bad u shim tnga da kawei pat ka kynthei, u klim ïa ka tnga lajong.

12 Ha kajuh ka rukom, ka kynthei kaba pyllait ïa la u tnga bad ka shim tnga da uwei pat u briew, ka klim.”

13 Ki briew ki la wan ïalam ïa ki khynnah sha u Jisu ba Un ktah ïa ki, hynrei ki synran ki la mai ïa ki.

14 Haba u Jisu U la ïohi ïa kane, U la dom bad U la ong ha la ki synran: “Shah ba ki khynnah rit kin wan sha Nga! Wat khang ïa ki, namar ka Hima u Blei ka dei ïa kum kine.

15 Da kynmaw bha ba jar ubym pdiang ïa ka Hima u Blei kum u khynnah rit un ym ïoh rung ha ka.”

16 Nangta U la kdup ïa ki khynnah ha la ki ksangti, bad U la kyrkhu ïa ki, da kaba buh ïa la ki kti halor jong ki.

17 Katba u Jisu U dang mih ban leit jingleit, uwei u briew u la wan mareh, u la dem khohsiew hakhmat jong U, bad u la kylli ïa U: “Ko Nonghikai babha, nga dei ban leh aïu ban ïoh ïa ka jingim bymjukut?”

18 “Balei phi khot ïa Nga u babha?” la kylli u Jisu. “Ym don u babha lait tang u Blei marwei.

19 Phi tip ïa ki hukum: “Wat pynïap; wat klim, wat tuh; wat lamler; wat leh klop; burom ïa la u kpa bad ïa la ka kmie.”

20 “Ko Nonghikai,” uta u briew u la ong, “naduh dang khynnah nga la kohnguh ïa kine ki hukum baroh.”

21 U Jisu U la peit ieid ïa u bad U la ong: “Sa tang kawei ba phi dang duna. Khie, leit die baroh katba phi don, bad ïasam ha ki baduk, kumta phin sa kynshew spah ha bneng. Nangta ale, to bud ïa Nga.”

22 Haba uta u briew u la ïohsngew ïa kane, u la thangïong ka khmat bad u la leit noh da ka jingsngewsih, namar u la long uba ’riewspah shibun.

23 Te u Jisu U la peit sawdong, u la ong ha la ki synran, “Katno ka long ka ba-eh ïa ki bariewspah ban rung ha ka Hima u Blei!”

24 Ki synran ki la sngewkyndit ïa kine ki ktien, hynrei u Jisu U la ïaibán: “Ko khun jong Nga, katno ka ba-eh ban rung ha ka Hima u Blei!

25 Ka kham eh shibun ïa u bariewspah ban rung ha ka Hima u Blei, ban ïa ka ut ban bsut lyngba i thliew thyrnia.”

26 Mar ïa-ong kumta, ki synran ki la lyngngoh ngaiñ bad ki la kylli para ma ki, “Mano te ba lah ban lait im?”

27 U Jisu U la peit tliw ïa ki bad U la jubab: “U briew um lah, hynrei u Blei U lah. Ha u Blei kaei kaei baroh ka long ka balah.”

28 Te u Petrus u la kem ktien, “Hakhmih ngi la ieh noh ïa kiei kiei baroh, bad ngi la bud ïa Me.”

29 “Hooid,” u Jisu U la phai ktien, “bad Nga ong ha phi: jar uba ieh noh ïa la ka ïing ka sem, ïa la ki hynmen ki para shynrang ne kynthei, ïa la ka kmie ne u kpa, ïa la ki khun ne ki bri ki khyndew na ka bynta jong Nga bad na ka bynta ka Gospel,

30 un ïoh mynta shispah shah ki ïing, ki para shynrang bad kynthei, ki kmie, ki khun bad ki bri ki khyndew lang bad ki jingshah bánbeiñ; bad ïa ka jingim bymjukut ha ka pyrthei kaban sa wan.

31 Bun ki banyngkong kin sa long khatduh, ki bakhatduh pat kin sa long nyngkong.”

32 Ki la dang ïaleit kiew sha Jerusalem. U Jisu U la ïaid hakhmat. Ki synran ki la dap da ka jingsngew lyngngoh, ki paidbah pat ki bud nadien bad ki ïatieng. Sa shisien u Jisu U la khot kyrpang ïa ki khat-ar ngut ki synran bad U la kren shaphang kiei kiei kiban sa jia ha U.

33 “Ngin ïaleit sha Jerusalem. Hangta ïa u Khun u Briew yn sa aiti noh ha ki rangbah lyngdoh bad ha ki Stad-aiñ. Kin sa pynrem ïa U ban ïap bad kin sa aiti ïa U ha ki jentil.

34 Kine kin rkhie beiñ ïa U, kin bynthiew ïa U, kin sympat ïa U, bad kin pynïap ïa U. Hadien lai sngi Un sa mihpat.”

35 Te u Jakob bad u Ïoannis, ki khun u Zebedi, ki la wan sha u Jisu. “Ko Nonghikai,” ki la ong, “ngi kwah ba Men leh ei ei na ka bynta jong ngi.”

36 Te phi kwah Ngan leh aïu?” la kylli u Jisu.

37 Ki la jubab: “Ynda Me shong ha ka khet jong ka Hima jong Me, ngi kwah ba Men pynshong ïa ngi, uwei sha kamon bad uwei sha kadiang jong Me.”

38 U Jisu U la ong ha ki: “Phim tip aïu phi ïapan. Phi lah mo ban dih ïa ka khuri kaba nga dei ban dih? Phi lah mo ban shah pynbaptis da kajuh ka baptisma da kaba Ngan sa shah pynbaptis?”

39 “Ngi lah,” ki la jubab. U Jisu U la ong ha ki: “Ñiuma, phin sa dih ïa ka khuri kaba ma Nga Ngan dih bad shah pynbaptis da kajuh ka baptisma kumba shah ma Nga,

40 hynrei ban ai jaka ïa phi sha kamon ne sha kadiang, kam dei ka kam jong Nga: ki dei na ka bynta kito ïa kiba la mang lypa.”

41 Haba kiwei pat ki shiphew ngut ki synran ki la ïohsngew shaphang kane, ki la ingkhong ïa u Jakob bad ïa u Ïoannis.

42 Kumta u Jisu U la khot lang ïa ki baroh bad U la ong: “Ma phi phi tip kumno kito kiba don ka bor synshar, hapdeng ki ’riewpyrthei, ki pynsngew ïa la ka bor halor jong ki, bad ki bakhraw batri ki leh traikhlieh halor jong ki.

43 Kane kam dei ban long ka rukom leh hapdeng jong phi. Lada uno uno u kwah ban long heh u dei ban long u shakri ïa kiwei pat.

44 Lada uno uno u kwah ban long u khlieh duh, u dei ban shakri ïa baroh.

45 Wat u Khun u Briew Um shym la wan ba yn dup shakri ïa U; U la wan ban shakri bad ban ai ïa la ka jingim ban siewspah ïa ki babun.”

46 Ki la wan poi ha Jerikho. Katba u Jisu U dang mih nangta lang bad ki synran bad ki paidbah babun, uwei u matlah uba kyrteng u Bartimeus, U khun u Timeus, u la shong pankhrong harud lynti.

47 Haba u la ïohsngew ba dei u Jisu Nazareth, u la sdang ban pyrta, “Ko Jisu, ko Khun u Dabid, to isynei ïa nga!”

48 Bun ki la kynhied ïa u ba un sngap jar. Hynrei u la nang kham pyrta jam pynban, “Ko Khun u Dabid, to isynei ïa nga!”

49 U Jisu U la sangeh bad U la phah khot ïa u. Te ki la khot ïa u matlah, “Wat khuslai!” ki la ong. “Ïeng joit, U khot ïa phi.”

50 U la bret bak ïa la ka jaiñkup, u la ïeng kynsan bad u la wan sha u Jisu.

51 “Phi kwah ba Ngan leh aïu ïa phi?” la kylli u Jisu. “Ko Nonghikai,” la jubab u matlah, “nga kwah ban ïohi.”

52 “Khie”, u Jisu U la ong ha u, “ka jingngeit jong phi ka la pynkoit ïa phi.” Te markumta hi u la ïohi, bad u la bud ïa u Jisu ha kata ka lynti.