Markus Lynnong 1

​

1 Ka jingsdang ka Khubor Babha u Jisu Khrist, u Khun u Blei.

2 Kumne la thoh u nongïathuhlypa Isaïa: “Nga phah ïa u nonglam khubor jong Nga—ong u Trai—ha shuwa jong Me, ban pynkhreh ïa ka lynti jong Me;

3 Don uba pyrta ha ri kynjah: ‘To pynkhreh ïa ki lynti jong u Trai, to pynbeit ïa ki lynti syngkien jong U.’ ”

4 Kumta u Ïoannis u la paw ha ri kynjah, u da ïalap: “Ka jingkylla kaba mut ban ïoh ïa ka baptisma, bad ka jingmap ïa ki pop.”

5 Man la u briew na ka thaiñ Judea bad ka nongbah Jerusalem u la leit ban sngap ïa u Ïoannis. Ki la phla ïa la ki pop, bad u la pynbaptis ïa ki ha ka wah Jordan.

6 U Ioannis u la phong da ki sopti snieh ut, bad la u panpoh snieh ha ka syngkai jong u; u la bam da ki puit bad ka ngap khlaw.

7 U la pynbna ha ki paidbah: “Uta Uban wan hadien jong nga U kham khraw bor ban ïa nga; ngam long u babit wat ban dem bad ban law ïa ki saijuti jong U.

8 Nga pynbaptis ïa phi da ka um, hynrei Une Un pynbaptis ïa phi da u Mynsiem Bakhuid.”

9 Ym slem hadien, u Jisu U la wan na Nazareth kaba ha ka thaiñ Galilea, bad u Ïoannis u la pynbaptis ïa U ha ka Jordan.

10 U Jisu U tang shu kiew na ka um, U la ïohi ïa ka bneng kaba plie bad ïa u Mynsiem Uba wan hiar halor jong U kum ka paro.

11 Te ka sur ka la wan na bneng: “Me long u Khun ba-ieid jong Nga. Nga da hun eh ïa Me.”

12 Markumta u Mynsiem U la ïalam ïa U sha ri kynjah.

13 U la sah hangta sawphew sngi, bad u Soitan u la pynshoi ïa U. La don ruh ki mrad khlaw, bad ki angel ki la wan ai bam ai dih ïa U.

14 Ynda la thep phatok ïa u Ïoannis, u Jisu U la leit sha Galilea bad U la ïalap ïa ka Khubor Babha na u Blei.

15 “Ka ïá ka babiang ka la poi,” U la ong, “bad ka Hima u Blei ka la jan ! To kylla ka bamut bad to ngeit ïa ka Gospel !”

16 Katba u Jisu U la dang ïaid harud ka Pung Galilea, U la ïohi ar ngut ki nongtong dohkha, u Simon bad u para jong u u Andreas, ba ki ïatong dohkha ha ka pung da ka jar.

17 U Jisu U la ong ha ki, “Ale bad Nga, bad Ngan pynlong ïa phi ki nongtong briew.”

18 Markumta ki la ieh noh ïa la ki jar bad ki la bud ïa U.

19 U la leit kham shakhmat bad U la ïohi sa kiwei pat ar ngut shipara, u Jakob bad u Ïoannis, ki khun u Zebedi. Ki la dang ïasyrdep ïa ki jar ha ki lieng jong ki.

20 U Jisu, U tang shu ïohi ïa ki, U la khot ïa ki; te ki la ieh noh ïa u kpa jong ki u Zebedi ha ka lieng lem bad ki nongbylla, bad ki la bud ïa u Jisu.

21 Ki la poi ha Kapernaum, bad mar ïawan ka sngi sabath, U Jisu U la leit rung ha ka sinakok bad U la sdang ban hikai.

22 Ki briew kiba la ïohsngew ïa U ki la sngewbang bad sngewphylla ïa ka rukom hikai jong U. Um shym la hikai kum ki Stad-aiñ, hynrei kum uba don ka bor.

23 Markumta u briew uba shongksuid u la wan rung ha ka sinakok bad u la kyrkait;

24 “Me kwah aïu na ngi ko Jisu Nazareth? Me wan hangne ban pynjot ïa ngi ? Nga tip Me dei Uei: Me long u Bakhuid jong u Blei !”

25 U Jisu U la dumok ïa u ksuid: “Sngap jar, bad to mih noh na u briew !”

26 U mynsiem bymman u la pynkyrthat ïa uta u briew, u la lynñiar bad u la mih na u.

27 Baroh ki briew ki la lyngngoh jlang bad ki la sdang ban kylli para ma ki, “Kaei kane? Ka jait jinghikai ka bathymmai? Une u briew U don ka bor ban ai hukum wat ïa ki mynsiem bymkhuid, bad ki kohnguh ïa U !”

28 Te mar mar ka nam jong u Jisu ka la phriang kylleng ka thaiñ Galilea.

29 Ki la mih na ka sinakok bad ki la leit beit beit sha ïing u Simon bad u Andreas; u Jakob bad u Ïoannis ki la bud ïa ki.

30 Ka syngken kurim u Simon ka la thiahpang khieshoh, bad ki la ïathuh ha u Jisu tang mar shu poi.

31 U la leit sha ka, bad U la pynïeng ïa ka da kaba bat ïa ka na ka kti. Ka khieshoh ka la pyllait ïa ka bad shisyndon ka la sdang ban pynkhreh jynbam ïa ki.

32 Ynda premmiet, tang shu sep ka sngi, ki briew ki la wan rah ha u Jisu ïa kiba pang bad kiba shongksuid

33 Baroh ki trai shnong ki la ïalum hakhmat kata ka ïing.

34 U Jisu U la pynkoit bunbah kiba pang har rukom, bad U la beh noh bun ki ksuid. Um shym la shah ba ki ksuid kin kren ei ei, namar ki la tip U dei U ei.

35 Ynda U la khie dang step phyrngap, u Jisu U la mih na ïing bad U la leit sha ka jaka kynjah ban duwai.

36 Simon bad ki lok jong u ki la leit wad ïa U;

37 haba ki la shem ïa U ki la ong, “Baroh ki ïawad ïa Me.”

38 Hynrei u Jisu U la phai ktien: “Ngi dei ban leit sha kiwei pat ki shnong bamarkhap. Nga dei ban ïalap ha ki ruh, namar Nga la wan na ka bynta kane.”

39 Kumta U la leit kylleng ka Galilea, U da ïalap ha ki sinakok bad U beh noh ïa ki ksuid.

40 Uba pang ’ñianglyngkut u la wan sha u Jisu, bad, da kaba dem khohsiew, u la kyrpad jingïarap na U, “Lada Me mon,” u la ong, “Me lah ban pynkhuid ïa nga.”

41 U Jisu pat U la sngewsynei ïa u, U la kner ïa la ka kti bad U la ktah ïa u. “Nga mon,” U la jubab. “To khuid noh !”

42 Markumta u ’ñianglyngkut u la jah na u, bad u la khuid.

43 U Jisu U la bidong tyngeh ïa u bad U la phah noh ïa u shisyndon.

44 “Peit, wat ïathuh briew,” U la ong, “Khie leit bak bak sha u lyngdoh ba un peit-thuh ïa phi bad to tyrwa ïa ka jingainguh kaba u Moses u la hukum. Kane kan sakhi ba phi la khuid.”

45 Uta u briew u la leit noh bad u la sdang pynban ban pynphriang ïa kane ka khubor kylleng kylleng. U la pynbna paidbah haduh katta katta ba u Jisu Um lah shuh ban leit rung ha ki nongbah ha ka bapaw. Hynrei U la sah ha ki jaka kynjah, bad ki briew ki la wan sha U na kylleng.