Search Results

Kitab Matheus Lynnong 26 1 Ynda u Jisu U la pynkut ïa kine ki jingkren baroh, U la ong ha la ki synran, 2 ”Phi tip ba sa ar sngi kan long ka Paskha, bad ïa u Khun u Briew yn aiti noh ba yn sahnarphna.” 3 Te ki rangbah lyngdoh bad ki tymmen ki san jong u paidbah ki la ïalum lang ha ïing jong u lyngdoh rangbah, u Kaïaphas, 4 bad ki la ïasylla kumno ban kem jar jar ïa u Jisu, bad ban pynïap ïa U. 5 “Ym ha ka sngi jingkhawai,” ki la ïa-ong, “ïoh ki paidbah kin ïakhih win.” 6 Haba u Jisu U la don ha Bethania, ha ïing u Simon uba pang ’ñianglyngkut, 7 la wan kawei ka kynthei kaba rah ka jyniwbih ka bakordor ha u khiew pleit, bad ka la theh ïa ka halor ka khlieh u Jisu katba U dang bam. 8 Ki synran ki la ïohi ïa kane bad ki la bitar. “Balei yn pynbijai ei ïa kane baroh?” ki la kylli. 9 “Ban da die ïa kane ka jyniwbih, yn ïoh pisa shibun ban ai ïa ki baduk!” 10 U Jisu U la tip aïu ki la kren, bad U la ong ha ki: “Balei phi ïapyndik ïa kane ka kynthei? Ka la leh ïa ka kam ka babha shibun na ka bynta jong Nga. 11 Ïa ki baduk phi don barabor, hynrei phin ym ïoh barabor ïa Nga. 12 Da kaba theh ïa kane ka jyniwbih ha ka met jong Nga, ka la pynkhreh lypa ïa Nga na ka bynta ka jyntep. 13 To buh jingmut ïa kane: kat haba yn ïalap ïa kane ka Gospel ha satlak ka pyrthei, yn ïathuh ruh ïa kaba kane ka la leh ban sah kynmaw ïa ka.” 14 Te uwei na ki khat-ar ngut ki synran, uba kyrteng u Judas Iskariot, u la leit sha ki rangbah lyngdoh 15 bad u la ong, “Phin ai aïu ïa nga lada nga aiti ïa u Jisu ha phi?” Ki la tyrwa ha u laiphew sbai rupa. 16 Naduh kata u Judas u la wad lad ban aiti noh ïa u Jisu. 17 Ha ka sngi banyngkong jong ka jingkhawai u Kpu khlem thiat, ki synran ki la ïawan sha u Jisu bad ki la kylli ïa U, “Hangno Me kwah ba ngin leit pynkhreh ïa ka jingbam khawai Paskha na ka bynta jong Me?” 18 “Khie leit sha uwei u briew hapoh nongbah,” U la ong ha ki, “bad ïathuh ha u: ‘U Nonghikai U phah ong, ka ïá jong Nga ka la poi; ki synran jong Nga bad Nga Ngin ïabam Paskha ha ïing jong phi.’ ” 19 Ki synran ki la leh kumba la bthah u Jisu ïa ki, bad ki la pynkhreh ïa ka jingkhawai Paskha. 20 Ynda la kem ïongreiñ, u Jisu bad ki khat-ar ngut ki synran ki la ïashongbam. 21 Katba ki dang ïabam, u Jisu U la ong, “Nga ïathuh ïa phi, uwei na phi un sa die noh ïa Nga.” 22 Ki synran ki la kulmar jingmut, bad uwei hadien uwei ki la sdang ban kylli, “Kynrad, dei ma nga mo?” 23 U Jisu U la phai ktien: “U dei uwei uba la wieh kpu ha ka pliang ryngkat bad Nga uban die noh ïa Nga. 24 U Khun u Briew Un ïap kumba ong ki jynthoh, hynrei kordit ïa uta uban die noh ïa u Khun u Briew! Kan jin da la bha ïa uta u briew lada ym shym la kha ïa u!” 25 U Judas, u nongshetkylla, u la kren. “Kynrad, dei ma nga mo?” u la kylli, U Jisu U la phai ktien, “Hooid, ma me keiñ!” 26 Katba ki dang ïabam, u Jisu U la shim ïa u kpu. U la ainguh, U la kdiah, bad U la ai ha la ki synran, U ong: “To shim bad to bam, kane ka long ka met jong Nga.” 27 U la shim sa ïa ka khuri, U la ainguh ïa u Blei, U la ai ha ki, U ong: “To dih na kane ma phi baroh, 28 namar kane ka long ka snam jong Nga, ka snam jong ka jutang, ïa kaba yn pynphlei na ka bynta ki babun ban dup map ïa ki pop. 29 Nga ong ha phi, ba Ngan ym dih shuh na kane ka waiñ haduh kata ka sngi ba Ngan dih ïa ka waiñ bathymmai bad phi ha ka Hima u Kpa jong Nga.” 30 Nangta ki la ïarwai ïa ki psalm bad ki la leit sha u lum Olib. 31 U Jisu U la ong ha ki: “Ha kane hi ka miet ma phi baroh phin sa ieh noh ïa Nga, kumba ong ka jynthoh, ‘Ngan tangon ïa u nongsharai, te ki langbrot kin sa saphret.” 32 Hynrei ynda Nga mihpat Ngan leit sha Galilea ha shuwa jong phi.” 33 U Petrus u la kem ktien bad u la ong ha u Jisu, “Wat la baroh kin thut bad ieh noh ïa Me, nga te ngan ym ieh noh!” 34 “To kynmaw ïa kane!” u Jisu U la ong ha u Petrus. “Shuwa ba u syiar un kynih mynta ka miet, lai wat phin len ïa Nga.” 35 U Petrus u la jubab, “Wat lada nga dei ban ïap bad Me, da lei lei ngan ym len ïa Me!” Ki synran baroh ki la ïa-ong kumjuh. 36 Nangta u Jisu U la leit lang bad ki synran sha ka jaka ba la khot Gethsemani, bad U la ong ha ki “To ïashong hangne katba Nga dang leit hangtai ban duwai.” 37 U la ïalam ryngkat bad U ïa u Petrus bad ki ar ngut ki khun u Zebedi. U la sdang ban sngewsih bad ban sngewpisa, 38 bad U la ong ha ki, “Nga sngewkordit la kumban ïap. To sah hangne bad ïai-ap bad Nga.” 39 U la leit kham pajih na ki, U la dem pyllup ha khyndew, bad U la duwai, “Ko Pa, lada lah, to shim noh ïa kane ka khuri na Nga! Pynban ym kumba Nga mon ma Nga, hynrei kumba Me mon ma Me.” 40 Te U la wan phai bad U la shem ba ki lai ngut ki synran ki ïohthiah. U la ong ha u Petrus: “Kumno phim shym lah ban sharai bad Nga wat shi kynta? 41 To ïai-ap bad to duwai ba phin ym liat ha ka jingpynshoi. Ka mynsiem ka kloi shisha, ka doh pat ka tlot.” 42 Sa shisien u Jisu U la leit bad U la duwai, “Ko Pa jong Nga, lada Ngam lah lait na kane ka khuri khlem da dih ïa ka, to kan long ka mon jong Me.” 43 U la wan biang bad U la lap ba ki synran ki ïohthiah; ki khmat jong ki ki la ring ngai ngai. 44 U Jisu U la ieh noh biang ïa ki, U la leit ban duwai ha kaba lai sien, U da ong ïa kijuh ki ktien. 45 Nangta U la wan phai sha ki synran bad U la ong, “Phi dang ïathiah bad pynjem met? Ka por ka la poi haba ïa u Khun u Briew yn sa aiti noh ha ka bor ki ’riewsniew. 46 Khie joit, ïa ngin ïaleit! Ha peit, u bashetkylla ïa Nga u la wan!” 47 U Jisu U dang ïakren haba u Judas, uwei na ki Khat-ar ngut, u la poi. Ryngkat bad u la don u paid babun ba ïarah ki waitlam bad ki dieng tylli. La phah ïa ki da ki rangbah lyngdoh bad ki tymmen ki san jong u paidbah. 48 U nongshetkylla u la ai dak ïa ki, “U briew uba ngan doh, U dei Uta keiñ. Kem ïa U!” 49 Haba u Judas u la poi, u la leit beit sha u Jisu bad u la ong “Khublei, ko Nonghikai!” Bad u la doh ïa U. 50 U Jisu U la jubab, “Ko lok, me wan lei?” Kumta ki la ïawan, ki la kem ïa u Jisu bad ki la bat khak ïa U. 51 Hynrei uwei na kiba ïadon bad u Jisu, u la sei ïa la ka waitlam bad u la pom ïa u shakri jong u lyngdoh rangbah, bad u la mait ïa ka shkor jong u. 52 Te u Jisu U la ong ha u: “Thep noh ïa ka waitlam, namar kiba shim ïa ka waitlam kin ïap da ka waitlam. 53 Hato phim tip ba Nga lah ban pan jingïarap na u Kpa jong Nga, bad Un phah shisyndon palat khat-ar kynhun ki angel? 54 Haba kumta, kumno heit yn pynurlong ïa ki Jynthoh ba ka dei ban jia kumne?” 55 Nangta u Jisu U la kren ha u paidbah: “Phi da donkam ban wan bad ki waitlam bad ki dieng tylli ban kem ïa Nga, la kumba Nga long u nonglute? Man ka sngi Nga la shong bad Nga la hikai ha ka Tempyl, bad phim shym kem ïa Nga. 56 Hynrei kine baroh ki la jia ban pynurlong ïa ki Jynthoh jong ki nongïathuhlypa.” Te ki synran baroh ki la ieh noh ïa U bad ki la phet ïap. 57 Kito kiba la kem ïa u Jisu ki la ïalam ïa U sha ïing u Kaïaphas, u lyngdoh rangbah, ha kaba ki Stad-aiñ bad ki tymmen ki san ki la ïalum lang. 58 U Petrus u la bud ïa U na jngai haduh ka phyllaw jong ka ïing u lyngdoh rangbah. U la leit rung ha phyllaw bad u la shong ryngkat bad ki nongap-karod, ban dup ïohi kan kut kumno. 59 Ki rangbah lyngdoh bad ka Dorbar baroh kawei ki la pyrshang ban ïoh sabut thok pyrshah ïa u Jisu khnang ban pynïap ïa U, 60 hynrei kim shym shem satia, wat la bun ngut ki la wan ïathuh pharep shaphang jong U. Khatduh khatwai ar ngut ki briew ki la tur shakhmat 61 bad ki la ai sakhi: “Une u briew u la ong, ‘Nga lah ban pynjot ïa ka Tempyl u Blei, bad ban tei biang ïa ka hapoh lai sngi.’ ” 62 U lyngdoh rangbah u la ïeng bad u la ong ha u Jisu, “Mem jubab ei ei ïa kane ka jingmudui pyrshah ïa Me?” 63 U Jisu U la sngap la ka sngap. Sa shiwat u lyngdoh rangbah u la kren ha U: “Ha ka kyrteng u Blei ba-im, nga pynsmai ïa Me: ïathuh ïa ngi lada Me long u Messiïa, u Khun u Blei.” 64 U Jisu U la jubab, “Hooid, Me hi me la ong. Sa kane Nga ong ha phi: Lawei phin sa ïohi ïa u Khun u Briew ba U shong ha kamon jong u Badonbor baroh bad ba U wan ha ki lyoh jong ka bneng!” 65 Hangta u lyngdoh rangbah u la kad ïa la ki jaiñ bad u la ong: “U la kren beiñ blei! Ngi dang donkam sakhi aïu pat? Kumne kumne phi la ïohsngew ïa ka jingkren beiñ blei jong U! 66 Phi ïapyrkhat kumno?” Ki la jubab, “U dawa ban ïap!” 67 Hangta ki la bynthiew ïa U ha ka khmat, bad ki la kura ïa U. Kiwei pat ki la thab ïa U, 68 ki ong, “To ïathuh ha ngi ko Messiïa, mano ba thab ïa Me?” 69 U Petrus u dang shong habar ha phyllaw, haba kawei ka khynnah shakri u lyngdoh rangbah ka la wan sha U, ka ong, “Phi ruh phi la don bad u Jisu Galilea.” 70 Hynrei u la len hakhmat jong ki baroh: “Ngam tip phi kren aïu.” 71 Haba u la leit sha ka khyrdop, kawei pat ka shakri ka la ïohi ïa u bad ka la ong ha ki briew kiba hangta. “Une u la don bad u Jisu Nazareth.” 72 U Petrus u la len biang, “Nga smai nga spot ba ngam ithuh ïa uta u briew!” 73 Hadien shiphang arphang ki briew kiba ïaïeng hangta ki la wan bad ki la ong ha u Petrus. 74 Te u Petrus u la tla bitar bad u la smai, “Ngam ithuh ïa uta u briew!” Kumta kumta hi u syiar u la kynih. U Petrus u la kynmaw ïa kaba u Jisu U la ïathuh ha u, “Shuwa ba u syiar un kynih, lai sien lai wat phin len ïa Nga!” U la mih shabar bad u la ïam kthang.

Matheus Lynnong 8 1 U Jisu U la wan hiar na u lum, bad ki paidbah ki la ïabud lymbung ïa U. 2 Te u bapang ’ñianglyngkut u la wan, u la dem khrup hakhmat jong U, u da ong, “Ko Kynrad, lada Me mon, Me lah ban pynkhuid ïa nga.” 3 U Jisu U la kner bad U la ktah ïa u. “Nga mon,” U la jubab. “To khuid noh.” Markumta u ’ñianglyngkut u la jah na u. 4 Nangta u Jisu U la ong ha u, “Sumar: Wat ïathuh briew, hynrei khie leit bak bak sha u lyngdoh ba un peit-thuh ïa phi; nangta to tyrwa ïa ka jingainguh kaba u Moses u la hukum; kane kan sakhi ba phi la khuid!” 5 Haba U Jisu U la rung ha Kapernaum, uwei u rangbah shispah u la wan kyrpad ïa U: 6 “Ko Kynrad, u shakri jong Nga u thiah pang ha ïing, um lah ban khie, bad u shitom jur.” 7 “Ngan leit ban pynkoit ïa u,” la jubab u Jisu. 8 “Em Kynrad,” u la phai ktien u rangbah shispah. “Ngam long u babit ba Men wan rung hapoh ka ïing jong nga. Shu ai hukum bad u shakri jong nga un sa koit. 9 Nga ruh nga long hapoh la ki rangbah shipai, bad nga don ki shipai hapoh jong nga; nga shu hukum ïa uwei, ‘Khie!’ bad u leit; bad ïa uwei pat, ‘Ale!’ bad u wan; bad nga hukum ïa u shakri jong nga, ‘Leh ïa kane!’ bad u leh.” 10 U Jisu U la lyngngoh haba U ïohsngew ïa kane, bad U la ong ha ki paidbah kiba bud ïa U: “Nga ïathuh ïa phi, Ngam pat ju shem kat kane ka jingngeit ha Israel. 11 Da kynmaw bha! Bun kin ïawan na mihngi bad sepngi bad kin ïashong khawai ha ka Hima bneng bad U Abraham, u Isaak bad u Jakob. 12 Hynrei ïa ki khun jong ka Hima yn sa shop sha ka jingdum habar; hangta yn don ka jingïam bad ka jingkyriat bniat.” 13 Bad u Jisu U la ong ha u rangbah shispah, “Khie leit sha ïing, bad kan long kumba phi la ngeit.” Te u shakri jong uta u rangbah shispah u la koit ha kata hi ka por. 14 U Jisu U la leit rung sha ïing u Petrus, bad U shem ba ka kiaw kurim jong u ka thiah ba ka pang khieshoh. 15 U la ktah ïa ka na ka kti; ka khieshoh ka la pyllait ïa ka. Ka la khie joit bad ka la sdang ban ai bam ai dih ïa U. 16 Ynda premmiet, ki briew ki la wan rah sha u Jisu bun ki bashongksuid. U Jisu U la beh ïa ki mynsiem bymman da kaba hukum, bad U la pynkoit ïa ki bapang baroh. 17 Kumta la urlong kaba u nongïathuhlypa Isaïa u la ong. “U la shim ïa ki jingkhrew jong ngi bad U la kit noh ïa ki jingpang jong ngi.” 18 U Jisu U la ïohi ïa u paidbah sawdong jong U bad U la bthah ban leit sha shiliang ka duriaw. 19 Uwei u stad aiñ u la wan sha U, u ong, “Ko Nonghikai, nga la kloi ban bud ïa Me kat shaba Me leit.” 20 U Jisu U la phai ktien ha u, “Ki myrsiang ki don ki thliew bad ki sim ki don ki skum, hynrei u Khun u Briew Um don jaka thiah.” 21 Uwei pat u briew, u synran, u la ong, “Ko Kynrad, shah ba ngan leit tep ïa u kpa jong nga.” 22 U Jisu U la jubab, “To bud ïa Nga, bad ieh, ïa ki baïap kin tep kito ki balait.” 23 U Jisu U la kiew ha ka lieng, bad ki synran ki la leit ryngkat bad U. 24 Kyndit kyndit ka lyer ka bajur ka la khie ha ka duriaw, bad ki dew ki la sdang ban phaloh ha ka lieng. Hynrei u Jisu U la ïohthiah. 25 Ki synran ki la leit kyrsiew ïa U. “To pynim ïa ngi, ko Kynrad!” ki la ong. “Ngi la ïap!” 26 Balei phi sheptieng katne katne?” u Jisu u la jubab. “Phi ki barit sat ka jingngeit!” Nangta U la khie bad U la hukum ïa ka lyer bad ki dew, bad ki la jem jai. 27 Baroh ki la lyngngoh ngaiñ, ki ong, “U briew aïu Uba kum Une? Wat ka lyer bad ki dew ki kohnguh ïa U!” 28 U Jisu U la wan poi sha ki thaiñ Gadara, sha shiliang ka duriaw, bad la ïakynduh ïa U da ar ngut ki briew kiba mih na ki krem lum jyntep. Kine ki briew bashongksuid ki long ki badom sangriang bad ki bama, haduh bym don ba nud ban ïaid lynti nangta. 29 Markumta ki la kyrkait, “Balei Me wan pyndik ïa ngi, ko Khun u Blei? Me la wan ban pynsaja haba ym pat dei por?” 30 Ym da jngai eh nangta, la don shikynhun bah ki sniang kiba ïabam. 31 Ki ksuid ki la khroh ïa u Jisu, “Lada Me mut ban pynmih noh ïa ngi, phah ngin rung ha katai ka kynhun ki sniang.” 32 “Khie,” U Jisu U la ong ha ki; kumta ki la leit bad ki la rung ha ki sniang. Baroh shikynhun ki la noh khongpong na ka riat sha ka duriaw bad ki la ïap jyllop. 33 Ki nongap sniang ki la phet ïap bad ki la leit sha shnong ban ïathuh ïa kaba la jia baroh, bad shaphang kiba la shongksuid. 34 Kumta baroh shishnong ki la leit ban ïakynduh ïa u Jisu; bad haba ki la ïohi ïa U, ki la kyrpad ba Un mih noh na ka thaiñ jong ki. Kitab

Kitab Matheus Lynnong 14 1 Dei ha kata ka por ba u Herod tetrark u la ïohsngew shaphang ka nam u Jisu. 2 “U dei da shisha u Ïoannis Baptist uba la im biang,” u la ong ha la ki shakri. “Na kane ka daw U ïoh kat kine ki bor.” 3 Dei u Herod uba phah kem ïa u Ïoannis, phah teh bad phah set byndi ïa u na ka daw ka Herodia, ka tnga u para jong u u Phillip. 4 U Ïoannis Baptist u la ïai-ong ha u Herod, “Ym bit ba men ïashong bad ka!” 5 U Herod u la sni ban pynïap ïa u, hynrei u la tieng ïa u paidbah namar ki la ñiew ïa u Ïoannis kum u nongïathuhlypa. 6 Ha ka sngikha u Herod, ka khun ka Herodia ka la shad hakhmat ki nongshong bam. U Herod u la sngewbha haduh katta katta 7 ba u la kular ïa ka: “Nga kular ba ngan ai ïa phi kat kaba phi pan!” 8 Da ka jingbthah ka kmie jong ka, ka la ong, “Ai ïa nga kumne kumne ïa ka khlieh u Ïoannis Baptist ha ka pliang!” 9 Kane ka la pynbabe ïa u syiem, hynrei namarba u la lah kular hakhmat ki nongshong bam baroh, u la ai hukum ban leh kumba ka kwah, 10 bad u la phah khrai khlieh ïa u Ïoannis ha byndi. 11 Ïa ka khlieh la wan rah ha ka pliang, la ai ïa ka ha kata ka khynnah, ma ka pat ka la ai ha la ka kmie. 12 Ki synran u Ïoannis ki la wan shim ïa ka met jong u, bad ki la tep ïa ka; nangta ki la leit ïathuh ha u Jisu. 13 Ynda u Jisu U la ïohsngew ïa kata ka khubor, U la mih nangta da ka lieng bad U la leit weibriew sha ka jaka bakynjah. Ki paidbah ki la ïohsngew shaphang kata, ki la mih na la ki shnong bad ki la bud ïa u da ka kjat. 14 U Jisu U la hiar na ka lieng, bad haba U la ïohi ïa u paidbah babun, ka dohnud jong U ka la dap da ka jingsngewsynei ïa ki, bad U la pynkoit ïa ki bapang jong ki. 15 Ynda la kham noh ka sngi, ki synran ki la wan sha U bad ki la ong, “Mynta ka por ka la palat, sa ka jaka ruh ka bakynjah. To phah noh ïa ki paidbah, bad ieh kin mat leit thied jynbam ïa lade na ki shnong.” 16 “Kim donkam ban leit,” la jubab u Jisu. “Maphi keiñ, ai jynbam ïa ki.” 17 Ki la phai ktien, “Hangne ngi don tang san tylli ki kpu bad ar tylli ki dohkha.” 18 “Wan rah ïa ki shane ha Nga,” U la ong u Jisu. 19 U la phah ïa ki briew ban shong ha u phlang; nangta U la shim ïa ki san tylli ki kpu bad ar tylli ki dohkha, U la khmied sha bneng, bad U la ainguh ïa u Blei. U la kdiah ïa ki kpu bad U la ai ha ki synran ban sam ha ki paidbah 20 Baroh ki la bam haban da kdang. Bad ki synran ki la lum khat-ar shang ki lyngkhot lyngkhai kiba tam. 21 Ki rangbah kiba la shong bam ki la long kumba san hajar, khlem da kheiñ ïa ki kynthei bad ki khynnah. 22 Markumta u Jisu U la phah ïa ki synran ban kiew ha ka lieng, ba kin leit noh ha shuwa jong U sha shiliang ka duriaw, katba ma U pat U dang phah noh ïa u paidbah. 23 Ynda U la ai khublei ïa ki, U la leit kiew sha u lum ban duwai weibriew. Haba la premmiet, u Jisu U dang sah marwei. 24 Ka lieng ka la don hapdeng ka duriaw; ka lyer ka la beh pyrshah ïa ka bad ki dew ki la kynting ïa ka lieng. 25 Hapdeng lai bad hynriew baje mynstep u Jisu U la wan sha ki da kaba ïaid halor ka um. 26 Haba ki synran ki la ïohi ba U ïaid ha ka um, ki la sheptieng her. “Ka dei ka rngai!” ki la ong, bad ki la lynñiar da ka jingsehptieng. 27 Markumta u Jisu U la kren ha ki, “Wat tieng, wat tieng! Dei ma Nga!” 28 Te u Petrus u la jubab, “Ko Kynrad, lada dei ma Me, to hukum ba ngan wan halor ka um sha Me.” 29 “Ale!” U la phai ktien u Jisu. Kumta u Petrus u la mih na ka lieng bad u la sdang ban ïaid halor ka um sha u Jisu. 30 Hynrei haba u la sngew ïa ka lyer ba ka jur, u la tieng bad u la sdang ban ngam ha ka um. “Rap, rap, ko Kynrad!” u la pyrta. 31 Shisyndon u Jisu U la kner bad U la bat ïa u, U ong, “Balei phi artatien? Katno phi duna ka jingngeit!” 32 Bad haba ki la kiew ha ka lieng, ka lyer ka la sangeh. 33 Ki synran kiba don ha ka lieng, ki la nguh la dem ïa u Jisu. “Da shisha Me long u Khun u Blei!” ki la ong. 34 Ki la leit sha shiliang ka duriaw bad ki la wan poi sha Gennesaret. 35 Ki paidbah ki la ithuh shisyndon ïa u Jisu. Kumta ki la phah wan rah sha u Jisu ïa ki bapang na kylleng sawdong kata ka thaiñ. 36 Ki la kyrpad ïa U ban shah ba kin ktah la kumno kumno ïa ka rymmiang jaiñkup jong U. Kat kiba la ktah, ki la koit.

Markus Lynnong 9 1 U Jisu U la ong ruh: “To kynmaw ïa kane! Don na phi hangne kiban ym ïap haduh ba kin da ïohi ïa ka Hima u Blei ba ka wan da ka bor. 2 Hynriew sngi hadien, u Jisu U la khot lang bad U ïa u Petrus, u Jakob bad u Ïoannis, bad U la ïalam kyrpang ïa ki halor u lum bajrong. Katba ki dang ïapeit, U la kylla dur, 3 bad ki jaiñ jong U ki la tyngshaiñ bad ki la lieh phalang kham palat ban ïa kaba uno uno u nongsaitjaiñ u lah ban pynlieh. 4 Ki lai ngut ki synran ki la ïohi ïa u Elija bad u Moses ba ki ïakren bad u Jisu. 5 U Petrus u la ong ha u Jisu: “Ko Nonghikai, ka bha ba ngin sah noh hangne. Ngin ïathaw lai tylli ki ïing trep, kawei ïa Me, kawei ïa u Moses bad kawei ïa u Elija.” 6 Um tip aïu u ong; baroh ki la tieng haduh katta katta. 7 U lyoh u la paw bad u la kah syrngiew ïa ki, bad kawei ka sur ka la wan na uta u lyoh: “Une U long u Khun ba-ieid jong Nga—to sngap ïa U!” 8 Markumta haba ki la peit sawdong kim shym la ïohi shuh ïano ïano, lait tang ïa u Jisu. 9 Katba ki dang wan hiar na u lum, u Jisu U la bidong ïa ki ban ym ïathuh hano hano ïa kata kaba ki la ïohi, tat ynda u Khun u Briew U la mihpat na ka jingïap. 10 Ki la kohnguh ïa ka hukum jong U, hynrei para ma ki ki la ïatainia ka mut aïu kane ka ‘jingmihpat na ka jingïap.’ 11 Te ki la kylli ïa u Jisu “Balei ki Stad-aiñ ki ong ba u Elija u dei ban wan shuwa?” 12 U la jubab: “U Elija un wan shuwa keiñ ban pynkhreh ïa kiei kiei. Te balei ki jynthoh pat ki ong ba u Khun u Briew Un shah shitom shibun bad Un shah kyntait? 13 Nga ïathuh ïa phi ba u Elija u la lah wan, bad ba ki briew ki la leh ïa u kat kaba ki kwah, thik kumba ki ong ki jynthoh shaphang jong u.” 14 Haba ki la ïakynduh ïa kiwei pat ki synran, ki la ïohi ïa u paidbah byllien hangta. Ki Stad-aiñ ki ïatainia bad ki synran. 15 Ki paidbah ki tang shu ïohi ïa u Jisu, ki la kyndit thret bad ki la ïamareh ban ai khublei ïa U. 16 U Jisu U la kylli ïa ki synran jong U, “Phi ïatainia aïu bad ki?” 17 Uwei u briew napdeng u paidbah u la jubab, “Ko Nonghikai, nga la wan ïalam sha Me ïa u khun jong nga, namarba la kem ksuid ïa u bad um lait ban kren. 18 Wei ba u kem ïa u, u lympat ïa u ha khyndew, u khynnah pat u sei tyrtho na ka shyntur, u kyriat ki bniat, bad u eh ka met baroh shirynïeng. Nga la ong ïa ki synran jong Me ban beh ïa u ksuid hynrei kim lah.” 19 U Jisu U la ong ha ki: “Phi ki briew kibym don jingngeit! Sa katno Ngan dang dei ban sah bad phi? Sa katno Nga dei ban ïaishah ïa phi? Wanlam ïa u khynnah sha Nga!” 20 Ki la wanlam ïa u sha u Jisu. U ksuid u tang shu ïohi ïa u Jisu, u la pynring kyrthat ïa u khynnah haduh ba u la kyllon ha khyndew, bad u la tyllun sawdong sawdong, u da sei tyrtho ha ka shyntur. 21 “Naduh mynno u la long kumne?” u Jisu U la kylli ïa u kpa, “Naduh dang khynnah,” u la jubab. 22 “Bunsien u ksuid u la pyrshang ban pynïap ïa u da kaba lympat ïa u ha ka ding bad ha ka um. To isynei ïa ngi bad to ïarap ïa ngi, lada Me lah!” 23 “Lada Nga lah? Baroh ka long ka balah ïa uta uba ngeit!” la ong u Jisu. 24 U kpa shisyndon u la pyrta jam, da kaba jaw ummat: “Nga ngeit ko Trai, to pynkhlaiñ ïa ka jingtlot jingngeit jong nga. To ïarap seh ïa nga!” 25 U Jisu U la ïohi ba u paidbah u ïawan tur shajan, kumta U la dumok ïa u mynsiem bymman. “Ko mynsiem kyllut bad teh thylliej” U la ong, “Nga hukum ïa me: To mih noh na u khynnah bad wat rung shuh hapoh jong u!” 26 Da kaba lynñiar, u ksuid u la pynkyrthat ïa u khynnah bad u sa mih. U khynnah u la long kum u baïap, haduh ba baroh ki la ong, “U la ïap!” 27 Hynrei u Jisu U la shim ïa u khynnah na ka kti, U la khyllie ïa u, bad une u la ïeng. 28 Ynda u Jisu U la rung hapoh ïing, ki synran ki la kylli ïa u jar jar: “Balei ma ngi ngim shym lah ban beh noh ïa u ksuid?” 29 U Jisu U la jubab: “ïa kane ka jait ksuid ym lah ban beh satia da-ei da-ei, lait tang da ka jingduwai (bad ka jingshah jingit).” 30 Ki la mih na kata ka jaka bad ki la leit lyngba ka Galilea. U Jisu Um shym kwah ba ki briew kin tip ha-ei U don, 31 namar U la dang hikai ïa la ki synran: “Ïa u Khun u Briew yn sa aiti ha kito kiban pynïap ïa U; hynrei lai sngi hadien, Un sa mihpat.” 32 Kim shym sngewthuh ka mut aïu kane ka jinghikai, bad ki la khaw-eit ban kylli ïa U. 33 Ki la wan poi sha Kapernaum, bad ynda ki la rung hapoh ïing, u Jisu U la kylli ïa la ki synran: “Phi ïasaid aïu ha lynti?” 34 Hynrei kim treh ban jubab ïa U, namar ha lynti ki la ïasaid para ma ki u-ei u bakhraw tam 35 U Jisu U la shong, U la khot ïa ki khat-ar ngut ki synran bad U la ong ha ki: “Jar uba kwah ban long u banyngkong, u dei ban kheiñ ïa lade u bakhatduh eh bad ban long u shakri ïa baroh.” 36 U la shim ïa uwei u khynnah bad U la pynïeng ïa u hakhmat jong ki. Nangta U la piam ïa u bad U la ong ha ki, 37 “Jar uba pdiang sngewbha ïa uwei na kine ki khynnah rit ha ka kyrteng jong Nga, u pdiang ïa Nga; jar uba pdiang ïa Nga, um pdiang tang ïa Nga, hynrei ïa Uta ruh Uba la phah ïa Nga.” 38 U Ïoannis u la ong ha u Jisu, “Ko Nonghikai, ngi la ïohi ïa u briew uba beh ksuid ha ka kyrteng jong Me, bad ngi la khang ïa u namar um dei u jong ngi.” 39 “Wat khang ïa u,” u Jisu U la jubab, “namar ym don u briew uba leh kam phylla ha ka kyrteng jong Nga, uba, ha kajuh ka por, un kren sniew artat ïa Nga. 40 Jar ubym long pyrshah ïa ngi, u long bad ngi. 41 Uno uno uba ai ïa phi ka um ban dih namarba phi dei ki jong u Khrist, un ym pep ban ïoh ïa la ka bainong. 42 “Shaphang kine ki khynnah rit kiba ngeit ha Nga—kan kham bha ïa u briew ba yn teh da u maw tylliat ha ka ryndang jong u bad ba yn pynnoh hapoh duriaw, ban ïa kaba un pynthut ïa uwei uba kum kine. 43 Kumta lada ka kti jong phi ka pynleh pop ïa phi, to ot noh ïa ka! Ka kham bha ïa phi ban rung dkoh ha ka jingim, ban ïa kaba don ar tylli ki kti ban leit sha dujok, sha ka ding bymjulip 45 Bad lada ka kjat jong phi ka pynleh pop ïa phi, to ot noh ïa ka! Ka bha ïa phi ban rung dkoh ha ka jingim ban ïa kaba don ar tylli ki kjat ban shah bret sha dujok. 47 Bad lada ka khmat jong phi ka pynleh pop ïa phi, to khlaw noh ïa ka! Ka kham bha ïa phi ban rung ha ka Hima u Blei tang shiliang ka khmat, ban ïa kaba don ar tylli ki khmat ban shah bret sha dujok, 48 ha kaba u ksaiñ jong ka um ïap bad ka ding kam lip. 49 “Ïa uwei pa uwei yn pynkyllan mluh da ka ding. 50 Ka mluh ka bha. Hynrei lada ka mluh ka kylla blad, da-ei yn pynbang pat ïa ka? To don mluh ha la ka dohnud, bad phin ïasuk para ma phi.” <

< Markus Lynnong 11 1 Haba ki la poi ha ki shnong Bethphaje bad Bethania ha u lum Olib, hajan Jerusalem, u Jisu U la phah ar ngut ki synran jong U shakhmat, 2 U da ong: “Khie sha katai ka shnong hamar pyrshah jong phi. Phi tang shu rung hangta, phin lap ïa u khun kada ba la teh ha uba ym pat ju shong briew. Loit ïa u bad wan ïalam ïa u shane. 3 Lada don uba kylli ïa phi, ‘Balei phi leh kumne?’ to ong ïa u, ‘U Kynrad U donkam ïa u, bad Un phah noh ïa u shisyndon shane.’ ” 4 Kumta ki la leit, ki la lap ïa u khun kada ba teh hakhmat phalor ha lynti. Katba ki dang loit ïa u, 5 kiba ïaïeng hangta ki la kylli, “Phi leh aïu? Phi loit lei ïa u khun kada?” 6 Ki la jubab thik kumba u Jisu U la bthah ïa ki, kumta kita ki briew ki la shah ba kin leit. 7 Ki la wan ring ïa u khun kada sha u Jisu, ki la pynkup ïa u mrad da ki jaiñ, bad U Jisu U la shong halor jong u. 8 Bun ki briew ki la siang ïa la ki jaiñkup ha lynti, kiwei pat ki la khyllad ïa ki tnat dieng na lyngkha bad ki la siang ha lynti. 9 Ki paidbah kiba ïaid hakhmat bad kiba bud nadien ki la sdang ban ïapyrta, “Hosanna ! Long ba la kyrkhu uta uba wan ha ka kyrteng jong u Trai! 10 Suk ka hima u kpa jong ngi u Dabid kaba wan! Hosanna sha jrong tam!” 11 U Jisu U la rung ha Jerusalem, U la leit sha ka Tempyl, bad U la peit bniah baroh sawdong. Sa ba la premmiet artat, u la leit noh sha Bethania ryngkat bad ki khat-ar ngut. 12 Kum lashai pat, haba ki la wan phai na Bethania, u Jisu U la thngan. 13 U la ïohi na jngai ïa u dieng dymbur uba don sla, kumta U la leit ban peit lada don soh ei ei ha u. Hynrei haba U la poi, U la lap ba u don tang ki sla, namar kam dei ka aïom soh. 14 U Jisu U la ong ha u dieng dymbur; “Horkit, yn ym don ba bam soh shuh na me!” Ki synran ki la ïohsngew ïa kane. 15 Ynda ki la poi ha Jerusalem, u Jisu U la leit sha ka Tempyl bad U la sdang ban beh noh ïa kiba ïadie ïathied hangta. U la theh khongpong ïa ki miej jong ki nongïapeiñ pisa bad ïa ki lyngknot jong ki nongdie paro, 16 bad Um shah ïano ïano ban rah ei ei lyngba ki phyllaw ka Tempyl. 17 Nangta U la hikai ïa ki paidbah, “Hato ym shym la thoh: ‘ïa ka ïing jong Nga yn khot ka ïing jingduwai na ka bynta ki jait bynriew baroh.’ Hynrei ma phi pat phi la pynkylla ïa ka ka krem ki nongtuh!” 18 Ki rangbah lyngdoh bad ki Stad-aiñ ki la ïohsngew ïa kane, kumta ki la sdang ban ïasylla ban pynïap ïa u Jisu. Ki la khaw-eit ïa U namarba ki paidbah baroh ki la sngewbang bad sngewphylla ïa ka jinghikai jong U. 19 Ynda la kem ïongreiñ, u Jisu bad ki synran jong U ki la mih na ka nongbah. 20 Kum lashai dang step, katba U dang ïaid ha lynti, ki la ïohi ïa uta u dieng dymbur. U la ïap naduh dyngkhong. 21 U Petrus u la kynmaw ïa kaba la jia bad u la ong ha u Jisu, “Ha peit, ko Nonghikai, u dieng dymbur ba Me la tim u la ïap!” 22 U Jisu U la phai ktien ïa ki: “To buh jingmut ïa kane! Lada phi don ka jingngeit ha u Blei, 23 phi lah ban ong ha une u lum, ‘To ïeng bad to noh ha duriaw.’ Lada phim artatien ei ei ha la ka dohnud, hynrei phi ngeit ba kata kaba phi ong kan sa urlong, kan sa urlong shisha ha phi. 24 Na kane ka daw Nga ong ha phi: Haba phi duwai bad phi kyrpad ei ei, to ngeit ba phin ïoh pdiang, bad yn sa ai baroh ha phi. 25 Bad haba phi ïeng ban duwai, to map lada phi don ei ei pyrshah ïano ïano, kumta u Kpa jong phi Uba ha bneng Un map ïa ki pop jong phi.” 27 Kumta ki la wan phai sha Jerusalem. Katba u Jisu U dang ïaid ha ka Tempyl, ki rangbah lyngdoh, ki Stad-aiñ bad ki tymmen ki san ki la ïawan sha U 28 bad ki la kylli: “Da ka bor ka iktiar aïu Me la leh ïa kine kiei kiei? 29 U Jisu U la phai ktien: “Ngan kylli ïa phi tang kawei ka jingkylli, bad lada phi jubab ïa Nga, Ngan ïathuh ïa phi da ka bor aïu Nga leh ïa kine kiei kiei. 30 Ha ïathuh ïa Nga: Nangno ka wan ka baptisma jong u Ïoannis, na u Blei ne na u briew?” 31 Ki la sdang ban ïatwad jingmut para ma ki; “Ngin ong kumno? Lada ngi ong, ‘Na u Blei,’ Un ong, ‘Te balei phim shym ngeit ha u Ïoannis?’ 32 Hynrei lada ngi ong, ‘Na u briew...’ ” (Ki la khaw-eit ïa u paidbah namar man la u briew u la tip skhem ba u Ïoannis u la long u Nongïathuhlypa bashisha.) 33 Kumta ki la jubab ïa u Jisu, “Ngim tip.” Bad u Jisu U la phai ktien, “Nga ruh Ngam ïathuh ïa phi da ka bor aïu Nga leh ïa kine kiei kiei.”

CONTACT Holy Redeemer Renewal Centre, Siejlieh-Mawkhlam Rd, Mawkhlam, Nongstoin, Meghalaya 793119, India Email: salesfrancisdemawkhlam@gmail.com Rev. Fr. Joby Mathew Kurikilamkat, MSFS Director Email: jobymsfs13@gmail.com Mobile: +919383296356 Bah Marcel Myrthong Email: marcelmyrthong@gmail.com Mobile: +918794751376 Submit Thanks for submitting!

Markus Lynnong 6 1 U Jisu U la leit noh nangta bad U la leit phai sha shnong lajong, ryngkat bad ki synran jong U. 2 Ha ka sngi sabath U la sdang ban hikai ha ka sinakok. La don shibun ki briew hangta bad haba ki la ïohsngew ïa U ki la sngewphylla. “Nangno U la ïoh ïa kane baroh?” ki la kylli, “Ka jingstad aïu kat kane kaba U la ïoh? Da kumno U la lah ban leh kine ki kam phylla? 3 Hato Um dei u misteri dieng, u khun ka Maria, shipara bad u Jakob, u Joses, u Judas bad u Simon? Hato ki para kynthei jong U kim shong hangne?” Te kumta ki la thut noh bad ki la kyntait ïa U. 4 U Jisu U la ong ha ki: “U nongïathuhlypa u ïoh burom kylleng sawdong, lait tang ha shnong lajong bad hapdeng la ki kur ki jait.” 5 Um shym lah ban leh kam phylla ei ei hangta, lait tang ba U la buh ïa la ki kti ha kiba pang katto katne ngut bad U la pynkoit ïa ki. 6 Haduh katta U la sngewlyngngoh bad sngewdiaw, namar ka jingbymngeit jong ki. Nangta u Jisu U la leit kylleng sawdong ki nongrit ban hikai ïa ki briew. 7 U Jisu U la khot lang ïa ki khat-ar ngut ki synran bad U la phah ïa ki ar ngut ar ngut. U la ai bor ïa ki halor ki mynsiem bymkhuid 8 bad U la hukum ïa ki: “Wat rah ei ei bad phi haba leit jingleit lait tang u diengduh; lymne ruti, lymne ïarong, lymne pisa ha u saipan. 9 To phong da ki khulom, bad wat phong ar tylli ki sopti.” 10 U la ïathuh ruh ïa ki: “Haba phi rung ha kawei ka ïing, to sah bad ki hangta haduh ba phin da mih noh nangta. 11 Lada phi poi ha kawei ka jaka ba ki briew kim sngewbha ïa phi ne kim sngap ïa phi, mih noh nangta bad kynther ïa u pum pum na ki kjat jong phi. Kane kan long ka jingpynrem ïa ki!” 12 Kumta ki la leit bad ki la ïalap ba ki briew kin kylla ka bamut. 13 Ki la beh bun ki ksuid, ïa bun ki bapang ki la pynsleh da ka umphniang, bad ki la pynkoit ïa ki. 14 Te u syiem Herod u la ïohsngew shaphang u Jisu, namar ka nam jong U ka la phriang kylleng. Don ki briew kiba ong, “U Ïoannis Baptist u la im biang! Na kane ka daw u ïoh kat kane ka bor.” 15 Kiwei pat de ki la ong, “U dei u Elija.” Sa kiwei pat ki la ong, “U dei u nongïathuhlypa, uba kum ki nongïathuhlypa hyndai.” 16 Haba u Herod u ïohsngew ïa kata u la ong, “Dei u Ïoannis Baptist ïa uba nga la phah khrai khlieh, u la im pat!” 17 Dei u Herod uba la phah kem ïa u Ïoannis, phah teh bad phah set byndi ïa u, na ka daw ka Herodias ïa kaba u la ïashong sang namar ka long ka tnga u para jong u u Philip. 18 U Ïoannis Baptist u la ïai-ong ha u Herod: “Ym bit ba men ïashong bad ka tnga u para jong me!” 19 Kumta ka Herodias ka la sni ïap ïa u Ïoannis bad ka la kwah ban pynïap ïa u, hynrei kam ïoh dong namar ba u Herod 20 u la tieng eh ïa u Ïoannis naba u la tip ba u long u bahok bad u bakhuid, kumta u ïada ïa u. U la sngewbha ban sngap ïa u, wat la u la sngewlyngkhum jingmut haba u ïohsngew ïa u, la katta ruh u la sngewbha ban sngap ïa u. 21 Khatduh khatwai ka Herodias ka la ïoh kabu. Ka la long ka sngi kha u Herod, haba u la khawai ïa ki rangbah sorkar, ïa ki rangbah shipai, bad ïa ki bakhraw batri ka Galilea. 22 Ka khun ka Herodias ka la wan rung bad ka la shad, bad ka la pyngsngewbha ïa u Herod bad ïa ki nongshongbam lang. Kumta u syiem u la ong ha kata ka khynnah, “Phi kwah ban ïoh aïu? Ngan ai ïa phi katba phi kwah.” 23 U la smai ruh ha ka, “Nga kular ba ngan ai ïa phi katba phi pan, wat shiteng ka hima jong nga!” 24 Kumta kata ka khynnah ka la mih bad ka la kylli ïa la ka kmie, “Ngan pan aïu?” “Ïa ka khlieh u Ïoannis Baptist,” ka la jubab. 25 Kata ka khynnah ka la leit bak bak sha u syiem bad ka la dawa, “Nga kwah ba phin ai ha nga kumne kumne ïa ka khlieh u Ïoannis Baptist, ha ka pliang!” 26 Kane ka la pynbabe shibun eh ïa u syiem; hynrei um lah ban kyntait ïa ka, namarba u la smai hakhmat ki nongshongbam. 27 Kumta u la phah ïa uwei u shipai ban wan rah ïa ka khlieh u Ïoannis. U nongkhrai khlieh u la leit bad u la khrai khlieh ïa u Ïoannis ha byndi. 28 Nangta u la wan rah ïa ka khlieh ha ka pliang bad u la ai ïa ka ha kata ka khynnah, ka khynnah pat ka la ai ïa ka ha ka kmie. 29 Ynda ki synran u Ïoannis ki la ïohsngew shaphang kane ki la ïawan shim ïa ka met jong u bad ki la tep ïa ka. 30 Ki apostol ki la wan phai bad ki la ïakynduh ïa u Jisu, bad ki la ïathuh aïu ki la leh bad la hikai. 31 La don shibun bah ki briew kiba ïawan ïaleit haduh ba u Jisu bad ki synran jong U kim ïoh por shuh ban bam. Kumta U la ong ha ki, “Ïa ngin ïakynriah sha ka jaka kynjah ba ngin ïadon hi, bad phin sa aram khyndiat.” 32 Kumta ki la mih da ka lieng tang para ma ki sha ka jaka ka bakynjah. 33 Lajar katta, bun ki briew ki la ïohi ba ki leit, bad ki la tip antad shano; te ki la ïamih na ki shnong baroh bad ki la mareh sha kata ka jaka, ki la poi ha shuwa u Jisu bad ki synran jong u. 34 Haba u Jisu U la hiar na ka lieng, U la ïohi ïa une u paidbah babun, bad ka dohnud jong U ka la dap da ka jingsngewsynei ïa ki, namar ki i kum ki langbrot kibym don nongsharai. Kumta U la hikai ïa ki bun kiei kiei. 35 Haba ka sngi ka la sdang ban noh, ki synran ki la ïawan sha U bad ki la ong, “Kane ka long ka jaka kynjah, bad mynta ka por ruh ka la palat. 36 To phah noh ïa ki, bad ieh kin mat leit sha ki nongbah bad ki nongrit bamarkhap ban thied jynbam ïa lade.” 37 “Ma phi keiñ ai jynbam ïa ki,” la ong u Jisu. Ki la kylli, “Me kwah ba ngin leit thied ruti bad pynlut arspah denar ban ai bam ïa ki?” 38 “Katno tylli ki kpu phi don?” la kylli u Jisu. “Khie leit peit.” Haba ki la tip, ki la ong, “San tylli ki kpu bad ar tylli ki dohkha.” 39 Te u Jisu U la phah ïa ki synran ban pynshong ïa ki briew lynnong lynnong ha u phlang bajyrngam. 40 Kumta ki la ïashong ter ter, shispah shispah bad sanphew sanphew. 41 Nangta u Jisu U la shim ïa ki san tylli ki kpu bad ki ar tylli ki dohkha. U la khmied sha bneng, U la ainguh ïa u Blei U la kdiah ïa ki kpu bad U la ai ha la ki synran ban sam ha ki paidbah U la sam ruh ha ki baroh ïa kita ki ar tylli ki dohkha. 42 Baroh ki la bam haban da kdang. 43 Ki synran ki la lum khat-ar shang ki lyngkhot lyngkhai kiba tam na ki kpu bad ki dohkha. 44 Kiba la ïabam kpu ki la long san hajar ngut ki rangbah. 45 Mar kumta u Jisu U la phah ïa ki synran ban kiew ha ka lieng ba kin leit noh shuwa ïa U sha shiliang ka Duriaw sha Bethsaida, katba ma U pat U la phah noh ïa u paidbah. 46 Ynda U la ai khublei ïa ki, U la leit kiew sha u lum ban duwai. 47 Haba la premmiet, ka lieng ka la don hapdeng ka Duriaw, u Jisu pat marwei ha ryngkew. 48 U la ïohi ba ki synran ki shitom ban king ïa ka lieng, namarba ka lyer ka beh pyrshah ïa ki. Kumta hapdeng lai bad hynriew baje mynstep, U la wan sha ki da kaba ïaid halor ka um. U la leh kumban ïaid lait ïa ki. 49 Hynrei haba ki la ïohi ba U ïaid halor ka um, ki la tharai ba ka dei ka rngai, kumta ki la lynñiar. 50 Baroh ki la ïohi ïa U bad ki la sheptieng her. Mar kumta u Jisu U la kren ha ki, “Wat tieng! Sngewshngaiñ! Dei ma Nga!” 51 Te U la kiew ha ka lieng ryngkat bad ki, bad ka lyer ka la sangeh. Ki synran ki la lyngngoh ngaiñ bad ki la dum buit jlang. 52 Kim pat shym sngewthuh shaphang ki kpu; kim pei jingmut satia. 53 Ki la leit sha shiliang ka Duriaw bad ki la wan poi sha Gennesaret, bad ki la teh ïa ka lieng hangta. 54 Katba ki nanghiar na ka lieng, ki paidbah ki la ithuh shisyndon ïa u Jisu. 55 Kumta ki la leit kyrkieh kylleng sawdong kata ka thaiñ, bad ki la wan rah ïa kiba pang ha ki jynthiah ha ki jaka ba U don. 56 Kat shaba U leit, sha ki nongrit, ki nongbah, ne ki lad, ki briew ki la rah ïa kiba pang sha ki jaka ïew bad ki la kyrpad ïa U ban shah ba kin ktah la kumno kumno ïa ka rymmiang jaiñkup jong U. Kat kiba la ktah, ki la koit. <

Ka Sakhi ba ïoh Jingkoit na ka jingpang khyllai: Ka Sakhi/ Witness Jong i Sister Judith, SABS (Sisters of the Adoration of the Blessed Sacrament): Ka Bor jong ka jingduwai Rosari. "Shisien myn haba nga dang khynnah bad nga dang don ha ïing, ha kawei ka miet ngi la ïadon tang i Mei, ma nga bad i para kynthei. Ki hynnmen shynrang baroh arngut kim shym la don ha ïing. Ka la long ka miet badum bad u slap bajur u la hap. Ha kata ka ïong ngit ïongngaiñ, la wan uwei u briew uba la buaid (nga sngewthuh na ka rukom hylla bad kren jong u). Da ka jinghylla bad jingbyrngem jong u ngi la sngew sheptieng haduh katta bad i mei i pyrta jingïarap na ki para marjan namar ngi ïadon tang para kynthei, hynrei ym don ba la ïohsngew ba jur eh u slap. Uta u briew u la byrngem ban pynpait ïa ka jynkhang jong ka ïing jong ngi. Hangta lei lei ngi la nang sheptieng shuh shuh, namar ka ïing jong ngi kam long ka babha bad baskhem bad ki jynkhang ruh ki long kiba tlot. Te uta u briew u la shim uwei u dieng thang bad u la bom ban pynpra ïa ka jynkhang ïing jong ngi. Ha kata ka jingtieng ngam nang ban leh kumno kumno. Nga la tip tang ban duwai ïa u Rosary, ïa kiwei ki jingduwai ngam tip re. Te kumta nga la duwai jur bha ha kata ka por. Slem slem uta u briew u la phet noh bad hadien katto katne por ki para marjan ruh ki la wan. Ynda ngi la mih shabar, ngi la shem ba uta u briew u la pyndonkam da u dieng uba heh bha, kham palat ban ïa kaba ngi la mutdur mynshuwa, ba u pyndonkam da u diengthang, bad da une u dieng ka jin da la long kaba suk bha ban pynpra ïa ka jynkhang ïing jong ngi. Phewse, kam shym la pra. Hangne nga sngewthuh, ba dei ka jingïada ka Maria kaba ngi la ïoh da kaba nga la duwai ïa u Rosari. Ka Maria kam ju iehnoh ïa nga mynno mynno ruh. Ki bun ki khep ba nga la don ha ki jingma, hynrei da ka jingduwai Rosari nga la ïoh jingïarap. Ka Maria ka ju ïarap bad ïasaid na ka bynta jong ngi, te katno lei lei haba ngi da kyrpad ïa ka. Leit sha ka Maria bad kan ïalam ïa phi sha u Jisu, ka Ktien jong u Blei. Ka Maria ka don ka bor, namar ka don ïa ka Ktien u Blei. Ka Bor jong ka jingïaroh da ka ba pynbna ïa ka Ktien u Blei haba duwai. Ka Sakhi/ Witness Jong i Sister Judith, SABS (Sisters of the Adoration of the Blessed Sacrament): "Shisien ha u snem ba-lai bad bakut artad jong ka jingkhreh ban long 'riewniam jong ka Seng SABS, i Directress i la phah ïa nga ryngkat bat ki paralok jong nga ban leit ban duwai na kabynta uwei u briew ba pang ïap shilliang bad une u la shu thiah beit ha jingthiah. Nga sngewlyngkhum jingmut kumno ban duwai namar nga nang ban duwai tang ïa u Rosary bad jingduwai ïaroh. Ngam nang ban duwai katba pyrsad u Mynsiem. Kumta nga la shu ong ïa ki paralok jong nga ba kin nang duwai ïaroh bad nga la thmu ba ngan pynbna ïa ki dkhot Baibyl kiba ïadei bad ka jingpynkhiah ïa kiba nga la lah lyndet. Te ki la sdang ban duwai bad katba ki dang duwai kumta nga la sdang ban pynbna ïa ka Ktien u Blei. Ynda ngi la kut kata ka jingduwai, ngi la leh ïa ka dak ka Diengphna bad ngi la leit phai noh sha jaka sah. Une u briew da ka jingpang jong u um shym la lah shuh ban leit sha Ïingmane lah slem. Hynrei ha kawei ka Sngi u Trai ngi la ïohi ïa u ba u la poi sha Ïingmane, khlem donkam nongïarap. Kumta nga la sngewthuh ïa ka bor jong ka Ktien u Blei bad nga la ïathuh ïa kane ha ka Novice Mistress jong ngi." Ka Bor jong U Kynjri Rosary: Sa Kawei Ka Sakhi/ Witness Jong i Sister Judith, SABS (Sisters of the Adoration of the Blessed Sacrament): "Shisien ha wei u snem ba nga dang shong Class V, i Mei, ma nga, i para kynthei, bad i para shynrang ngi la shu ïaid sharum shaneng shabar jong ka ïing jong ngi ha kawei ka janmiet. Ngim shym la ïoh rung hapoh ïing lajong namar ym shym la shah ïa ngi. 'Balei?' phin kylli. Ka daw ka long ba i pa jong ngi i ju leh kumne man haba i la buaid. I ju hylla ïa ngi bad i beh ïa ngi sha bar. Te i la leh kumta ha kane ka janmiet ruh. Ka la dum, shabar mynta, ngi dang ïaid sharum shaneng. Ngim shym la sngew jingsawa ne sur, la jar jar. Te ngi leit rung sor sor shapoh ïing, hynrei katba ngi dang ïaid, shuwa ban poi ha syngkup nga la ïoh sngew ba don mano mano re ba bud, nga sngewthuh katkum ki khana ba ki tymmen ki ju ïathuh ba dei ki kynja ksuid. Te ki tymmen ki ju ong ha kum kine ki khep lada bynthiew dadien kin ym pynwit shuh. Nga ruh nga la phah ïaid ïa i Mei na khmat duh bud sa ki para baroh arngut bad ïalade nadien. I Mei i la kylli balei nga la leh kumne, hynrei nga shu ong ïa i ym lei lei, 'ïa ïaid ma phi shakhmat ngan ïaid ma nga nadien duh'; bad nga bynthiew shi bynthiew katba nga la ïaid dadien. Ynda ngi la ïoh rung jar jar, shapoh ïing ngim shym la ïoh rung shuh sha kamra thiah namar i pa i la khang. Te ngi la rung ha kamra shet bad ngi la sdang ban sliew ding. Hadien shiphang, i Mei bad ki para baroh arngut ki la ïohthiah dashong. Katto katne por hadien i para shynrang i pymih sur ba kham pher bha, bad hadien shiphang sa i para kynthei i la lynñiar kliang, la kyndit thiah sa i Mei bad ma i ruh i la lynñiar kliang, bad nga la kylli ïa ki balei ki la leh kumta. I para kynthei i la ïathuh ba i la ïohi ïa ki ksuid barit barit ba ki ïa krih hangta ha kamra shet bad i mei pat i la shu kdew sha ka jynkhang heh ba ngi la rung. Te nga la peit shata bad hangta la ïeng uwei u briew baïong uba lyngkhuid. Ha kata ka por nga la kynmaw ba nga don u Rosary ha pla, nga la sei bad nga la rah sha jrong, nga la ong Une u dei u Rosary, mih shisyndon; bad uta u ksuid bad kita ki wei ruh ki la mihnoh na ïing jong ngi. Phi ïohi? Ka bor jong ka jingduwai Khublei ko Maria, ka long kum ka jingbuh nar-saw halor ka khlieh u soitan bad kan sa ing shisyndon. Wat nym klet ban pyndonkam ïa kane ka bor kaba la ai ha phi." Kumne ko hynmen ko para ha u Trai Jisu Khrist, bor jong u Rosary ba la dep kyrkhu da u Lyngdoh haba ngi pyndonkam ha ka rukom kaba dei u don ïa ka bor. Te kumta, da pyndonkam bha, ym ban shu deng ne ban shu wah ha ïing ne ha ki kali.

hrrcmawkhlam.com, Mawkhlam, Na ka bynta ka jingpynkoit, Family Tree Healing, counselling, Healing service, Nongstoin, Nongpyndeng, Retreat Centre Mawkhlam, Fr Joby Mathew Kurikilamkat, etc. Jingpynbna 20210930_075126[1] 20220514_103819 Peter Marie Mermier 20210930_075126[1] 1/6 Sakhi/ Witness WELCOME TO HOLY REDEEMER RENEWAL CENTRE MAWKHLAM NONGSTOIN "To wan sha Nga phi baroh kiba shitom bad kiba khia jingkit, bad Nga Ngan pynjahthait ïa phi" Mt. 11:28 Katba ngi ïaid shaphrang ha ka jingim, bun sien ngi klet ba dei u Trai Uba ri Uba sumar ïa ngi la ha suk ne ha ka raieh. Ba ngi im, ka lah dei lypa ka jingaiei u Trai. Ka jingthmu jong ka hrrcmawkhlam.com ka long: ban ïarap bad pynshlur ïa kiba pule bad wad jingtip ïa kiba phi lah ban ïoh lyngba kane ka Centre kum - Ki jinghikai, ki jingduwai, Jingrwai, bad kino kino kiba dei shaphang ka jingroi ha ka jingim mynsiem. Get In Touch All Videos All Videos Play Video Share Whole Channel This Video Facebook Twitter Pinterest Tumblr Copy Link Link Copied Search video... Now Playing Kato ka Shi Kurim ki phah weng noh ia ki dak shin U Jisu, Ha Ka Kyrteng u Jisu , te phin sa ïoh 01:15:35 Play Video Now Playing Ka jingpang ñianglyngkut ha ka imlang ka sahlang jong ngi ki long ... | Fr Nicholas Maïong MSFS 09:08 Play Video Now Playing Da ka jingdon u Jisu, ka tnum ïing ka la jot, tangba ... | Fr Joby Mathew MSFS 12:06 Play Video CONTACT Holy Redeemer Renewal Centre, Siejlieh-Mawkhlam Rd, Mawkhlam, Nongstoin, Meghalaya 793119, India Email: salesfrancisdemawkhlam@gmail.com Rev. Fr. Joby Mathew Kurikilamkat, MSFS Director +919383296356 jobymsfs13@gmail.com Bah Marcel Myrthong marcelmyrthong@gmail.com +918794751376 Tyrwa Mass/ Jingkylli/Jingai jingmut Submit Thanks for submitting! Phah Pisa

Kitab Matheus Lynnong 21 1 Haba ki la poi hajan Jerusalem, ki la rung ha Bethphaje ha u lum Olib. Nangta u Jisu U la phah ar ngut ki synran jong U shakhmat, 2 U da ong: “Khie leit sha katai ka shnong hamar pyrshah jong phi, bad phin lap shisyndon kawei ka kada ba la teh, ryngkat bad u khun jong ka. Loit ïa ki bad ïalam ïa ki sha Nga. 3 Lada don ba ong ei ei ïa phi, ïathuh ba u Kynrad U donkam ïa ki; bad un shah ba kin wan shisyndon.” 4 Kane ka la jia ban pynurlong ïa kaba u nongïathuhlypa u la lah ong: 5 “To ïathuh ha ka nongbah Zion: Mynta u Syiem jong pha U wan sha pha. U long U bajemnud bad U shong halor ka kada, halor u khun kada, u khun jong ka mrad kit jynkit.” 6 Kumta ki synran ki la leit bad ki la leh kumba u Jisu U la bthah ïa ki. 7 Ki la wanlam ïa ka kada bad u khun, ki la tap ïa ki da la ki jaiñkup, bad u Jisu U la kiew ban shong. 8 U paidbah babun u la ïasiang ïa la ki jaiñ ha lynti, kiwei pat ki la khyllad da ki tnat dieng bad ki la siang ïa ki ha lynti. 9 Ki paidbah kiba ïaid hakhmat u Jisu bad kiba ïaid hadien, ki la ïaipyrta, “Risa ïa u Khun u Dabid! Ïaroh jam ïa Uta Uban wan ha ka kyrteng jong u Trai! Risa ïa u Blei shajrong!” 10 Haba u Jisu U la rung ha Jerusalem, ka nongbah baroh kawei ka la khynwin jlang. Ki briew ki la kylli, “Uei sha Une?” 11 Ki paidbah ki la jubab, “U dei u Jisu, U nongïathuhlypa na Nazareth Galilea.” 12 U Jisu U la leit rung ha ka Tempyl bad U la beh noh ïa kiba ïadie ïathied hangta. U la theh khongpong ïa ki miej jong ki nongïapeiñ sbai bad ïa ki lyngknot jong ki nongdie paro. 13 U la ong ha ki: “Ngi shem ha ka Jynthoh ba u Blei U la ong, ‘Ïa ka ïing jong Nga yn khot ka ïing jingduwai. Hynrei ma phi pat phi la pynkylla ïa ka ka krem ki nongtuh!’ ” 14 Ki bamatlah bad ki badkoh ki la wan sha U ha ka Tempyl, bad U la pynkoit ïa ki. 15 Ki rangbah lyngdoh bad ki Stad-aiñ ki la bitar haba ki la ïohi ïa ki kam phylla ba U leh, bad ba ki khynnah ki la pyrta ha ka Tempyl, “Risa ïa u Khun u Dabid!” 16 Kumta ki la ong ha u Jisu, “Me ïohsngew aïu ki ong?” “Hooid keiñ!” la jubab u Jisu. “Phim pat ju pule ïa ki Jynthoh kiba ong, ‘Na ka shyntur jong ki khynnah bad ki khunlung Me la sei ka jingïaroh ka bajanai?’” 17 U Jisu U la mih nangta bad U la leit sha shnong Bethania ban sah miet hangta. 18 Kum lashai, haba ki la wan phai sha ka nongbah, u Jisu U la thngan, 19 U la ïohi ïa u dieng dymbur harud surok bad U la leit sha u, hynrei Um shem soh ei ei lait tang ki sla. Kumta U la ong ha u dieng, “Men yn met soh shuh!” Te kumta kumta hi u dieng dymbur u la ïaptram. 20 Ki synran ki la ïohi ïa kane bad ki la sngewphylla ki ong, “kumno u dieng dymbur u la tram shisyndon?” 21 “To kynmaw ïa kane!” u Jisu U la jubab. “Lada phi ngeit bad phim artatien, phi lah ban leh kumba Nga la leh ïa une u dieng dymbur. Ym tang kane: phin lah ban ong wat ha une u lum, ‘To ïeng bad to noh sha duriaw, bad un noh.’ 22 Lada phi ngeit, phin ïoh katba phi pan da ka jingduwai.” 23 U Jisu U la wan phai sha ka Tempyl; katba U dang hikai, ki rangbah lyngdoh bad ki tymmen ki san jong u paidbah ki la wan sha U ban kylli, “Me don hok aïu ban leh ïa kine kiei kiei? Mano ba la ai ha Me ïa kane ka bor?” 24 U Jisu U la phai ktien: “Nga ruh Ngan kylli ïa phi kawei ka jingkylli, bad lada phi jubab ïa Nga, Ngan ïathuh ïa phi da ka bor aïu Nga leh ïa kine kiei kiei. 25 Ha ïathuh ïa Nga, nangno ka wan ka bor u Ïoannis ban pynbaptis: na u Blei ne na ki briew?” Ki la sdang ban ïatwad jingmut para ma ki: “Ngin ong kumno? Lada ngi ong, ‘Na u Blei,’ Un ong ha ngi, ‘Te balei phim shym ngeit ha u Ïoannis?’ 26 Hynrei lada ngi ong, ‘Na u briew,’ ngi khaw-eit ïa u paidbah, namar baroh ki ñiew ïa u kum U nongïathuhlypa.” 27 Kumta ki la jubab ïa u Jisu, “Ngim tip.” Bad u Jisu U la phai ktien ha ki, “Nga ruh Ngam ïathuh ïa phi da ka bor aïu Nga leh ïa kine kiei kiei.” 28 “Phi pyrkhat kumno shaphang kane? Uwei u briew u la don ar ngut ki khun. U la leit sha u banyngkong, u la ong, ‘Ko khun, khie leit trei mynta ka sngi ha ka brisoh waiñ.’ 29 ‘Ngam treh,’ u la jubab, hynrei hadien u la babe bad u la leit trei. 30 Nangta u kpa u leit sha uwei pat u khun, bad u la ong kumjuh. U khun u la jubab, ‘Ngan leit pa,’ hynrei um shym leit. 31 Uno na kine ki ar ngut u la leh ïa ka mon jong u kpa?” “U banyngkong,” ki la jubab. Te u Jisu U la ong ha ki: “Kynmaw ïa kane: ki nongkhrong khajna bad ki nuti kin rung shuwa ïa phi ha ka Hima u Blei. 32 Namar u Ïoannis Baptist u la wan ban kdew ha phi ïa ka lynti ka hok, bad phim ngeit ha u, hynrei ki nongkhrong khajna bad ki nuti ki la ngeit ha u. Wat ynda phi ïohi ïa kane, phim shym kylla ka bamut bad ngeit ha u.” 33 “Sngap sa kane kawei ka pharshi,” u Jisu U la ong. “La don u trai khyndew uba la thung ka brisoh waiñ; u la ker ïa ka baroh sawdong; u la tih thliew na ka bynta ka kor tylliat, bad u la tei ka kut. Nangta u la ai wai ïa ka brisoh ha ki nongrep bhura bad u la leit jingleit. 34 Haba la poi ka por kheit soh, u la phah ïa la ki shakri sha ki nongrep bhura ban shim ïa la ka bynta. 35 Ki nongrep bhura ki la kem ïa ki shakri, ki la shoh ïa ki, ki la pynïap ïa uwei, bad ki lynthem maw ïa uwei pat. 36 Uta u briew u la phah da kiwei pat ki shakri, kham bun ban ïa mynshuwa, bad ki nongrep bhura ki la leh ïa ki kumjuh. 37 Khatduh eh u la phah ïa la u khun, namar u la pyrkhat, ‘Khlem pep kin burom ïa u khun jong nga.’ 38 Hynrei haba ki nongwai ki la ïohi ïa u khun, ki la ïa ong para ma ki, ‘Une u long u nongïoh pateng. Ïa ngin ïapynïap noh ïa u, bad ngin ïoh ei ïa ka khyndew jong u !’ 39 Kumta ki la kem ïa u khun, ki la shop ïa u shabar ka brisoh bad ki la pynïap ïa u. 40 “Te haba u trai ka brisoh waiñ un wan, un leh aïu ïa kito ki nongrep?” la kylli u Jisu. 41 “Khlem pep un pynïap ïa kito ki ’riewsniew,” ki la jubab, “bad un ai wai ïa ka brisoh ha kiwei pat ki nongrep, kiban ai ïa ka bynta kaba hap ha u, ha ka por ka badei.” 42 U Jisu U la ong ha ki, “Phim pat ju pule aïu ki Jynthoh ki ong? ‘U maw ïa uba ki nongtei ki la kyntait kum u bymlarkam, u la kylla long u mawdong. Dei u Trai Uba la leh ïa kane. Katno ka long ka baphylla!’ 43 Te kumta Nga ong ha phi, la pynbud u Jisu, “Ïa ka hima u Blei un shim noh na phi bad yn ai ha ki briew kiban pynmih ki soh ki badei. 44 (Jar uba hap ha une u maw, un kheiñ lyngkhot lyngkhai; bad lada une u maw u hap hano hano, un pynlwet thiaw ïa u.)” 45 Ki rangbah lyngdoh bad ki Pharisi ki la ïohsngew ïa ki pharshi u Jisu, bad ki la tip ba U la kren shaphang jong ki. 46 Kumta ki la pyrshang ban kem ïa U. Hynrei ki la sheptieng ïa ki paidbah kiba la ñiew ïa u Jisu kum u Nongïathuhlypa.

Markus Lynnong 14 1 Sa ar sngi shuwa ka Paskha bad ka Jingkhawai u Kpu khlem thiat, ki rangbah lyngdoh bad ki Stad-aiñ ki ïawad lad ban kem ïa u Jisu jar jar, bad ban pynïap ïa U. 2 “Ngim dei ban leh ha ka sngi jingkhawai,” ki la ong, “ïoh u paidbah u ïakhihwin.” 3 U Jisu u la don ha Bethania ha ïing u Simon sa-’ñianglynkut. Katba U dang bam, la wan rung kawei ka kynthei kaba rah ïa ka jynsleh ba-iwbih, ka umphniang ka bakordor ha u khiew pleit. Ka la pynpait ïa u khiew bad ka la theh ïa ka jyniwbih halor ka khlieh u Jisu. 4 La don ki briew hangta kiba la sngewbitar, bad ki la ïa-ong para ma ki, “Balei yn pynlehnoh-ei ïa kane ka jyniwbih? 5 Ban da die ïa ka, yn ïoh palat laispah tyngka, bad ïa ka pisa yn ai ha ki baduk!” Bad ki la ïakhñium tyngeh ïa ka. 6 Hynrei u Jisu U la ong: “Ieh kan mat leh! Balei phi ïathlia ïa ka? Ka la leh ka kam ka babha shibun na ka bynta jong Nga. 7 Ïa ki baduk phi don barabor, bad ha kano kano ka por ba phi kwah, phi lah ban ïarap ïa ki. Ïa Nga te phin ym ïoh barabor. 8 Ka la leh kat kaba ka lah: ka la pynsleh lypa ïa ka met jong Nga na ka bynta ka jyntep. 9 To buh jingmut ïa kane: kat shaba yn ïalap ïa kane ka Gospel ha satlak ka pyrthei, yn ïathuh ruh ïa kaba kane ka la leh ban sah jingkynmaw ïa ka.” 10 Te u Judas Iskariot, uwei na ki khat-ar ngut ki synran, u la leit sha ki rangbah lyngdoh ban die noh ïa u Jisu ha ki. 11 Ki la kmen shitkatdei haba u la ong kumta, bad ki la kular ban ai tyngka ïa u. Kumta u Judas u la wad ka kabu ban die noh ïa u Jisu. 12 Ha ka sngi banyngkong jong ka Jingkhawai u Kpu khlem thiat, ka sngi ha kaba ki pynïap ïa ki khun langbrot Paskha, ki synran ki la kylli ïa u Jisu: “Hangno Me kwah ngin leit pynkhreh ïa ka jingkhawai Paskha?” 13 U Jisu U la phah ar ngut na ki, U bthah kumne: “Khie leit shapoh shnong; phin lap ïa u briew uba bah shikhiew ka um. 14 Bud ïa u haduh ka ïing ba u rung, bad sa ong ha u trai ïing: ‘U Nonghikai U phah ong, ha-ei ka kamra ha kaba ki synran jong Nga bad ma Nga ngin ïabam khawai Paskha?” 15 Un pyni ïa phi kawei ka kamra shaneng, ba la pynbeit pynbiang; hangta phin pynkhreh pynkhrum na ka bynta jong ngi.” 16 Ki synran ki la leit shapoh shnong, bad ki la lap thik kumba u Jisu U la ïathuh ïa ki; bad ki la pynkhreh ïa ka jingkhawai Paskha. 17 Ynda la kem ïongreiñ, u Jisu U la wan bad ki khat-ar ngut ki synran. 18 Katba ki dang ïashongbam, u Jisu U la ong: “Shisha shisha Nga ïathuh ïa phi, uwei na phi un sa die noh ïa Nga—uwei uba dang bam bad Nga.” 19 Ki synran ki la kulmar jingmut, bad uwei hadien uwei ki la sdang ban kylli, “Ym dei ma nga mo?” 20 U Jisu U la jubab: “U dei uwei na phi ki khat-ar ngut, uba wieh ïa u kpu ha ka pliang ryngkat bad Nga. 21 U Khun u Briew Un ïap kumba ong ki jynthoh; hynrei kordit ïa uta uban die noh ïa u Khun u Briew! Kan jin da la bha ïa uta u briew lada ym shym la kha ïa u!” 22 Katba ki dang ïabam, u Jisu U la shim ïa u kpu, U la ainguh, U la kdiah, bad U la ai ha la ki synran, U ong: “To shim, kane ka long ka met jong Nga.” 23 U la shim sa ïa ka khuri, U la ainguh ïa u Blei, U la ai ha ki; bad baroh ki la ïadih na ka. 24 “Shisha shisha” u Jisu U la ong: “Kane ka long ka snam jong Nga, ka snam jong ka jutang, ïa kaba yn pynphlei na ka bynta ki babun, 25 Nga ong ha phi, ba Ngan ym dih waiñ shuh haduh kata ka sngi ba Ngan dih ïa ka waiñ bathymmai ha ka Hima u Blei.” 26 Nangta ki ïarwai Psalm bad ki sa leit sha u lum Olib. 27 U Jisu U la ong ha ki: “Ma phi baroh phin sa ieh noh ïa Nga, kumba ong ka jynthoh, ‘Ngan tangon ïa u nongsharai, te ki langbrot kin sa saphret.’ 28 Hynrei ynda Nga la mihpat Ngan leit sha Galilea ha shuwa jong phi.” 29 U Petrus u la jubab, “Wat la baroh kin ieh noh ïa Me nga te ngan ym ieh noh!” 30 “To kynmaw ïa kane!” u Jisu U la ong ha u Petrus. “Shuwa ba u syiar un kynih ar sien mynta ka miet, lai wat men len ïa Nga!” 31 U Petrus u la kren kham pyn-eh: “Wat lada nga dei ban ïap bad Me, da lei lei ngan ym len ïa Me!” Ki synran baroh ki la ïa-ong kumjuh. 32 Ki la wan sha kawei ka jaka ba khot Gethsemani, bad u Jisu U la ong ha ki synran jong U, “To ïashong hangne katba Nga dang duwai.” 33 U la ïalam ryngkat bad U ïa u Petrus, u Jakob bad u Ïoannis. U la kem tieng kynsan kynsan bad U la sngewpisa. 34 U la ong ha ki: “Nga sngewkordit la kumban ïap. To sah hangne bad ïa-ap.” 35 U la leit kham shakhmat, U la dem pyllup ha khyndew, bad U la duwai ba lada lah, Un lait, noh na kata ka por jingshitom. 36 “Ko Pa,” U la duwai, “Ko Pa jong Nga! Me lah ban leh ïa kiei kiei baroh. To shim noh ïa kane ka khuri na Nga. Pynban ym kumba Nga mon ma Nga, hynrei kumba Me mon ma Me.” 37 Te U la wan phai bad U la shem ba ki lai ngut ki synran ki ïohthiah, bad U la ong ha u Petrus, “Ko Simon, pleng phi ïohthiah? Phim lah ban peitngor wat tang shi kynta?” 38 Bad U la pynbud, “To sharai, bad to duwai, ba phin ym liat ha ka jingpynshoi. Ka mynsiem ka kloi shisha, ka doh pat ka tlot.” 39 U la leit biang ban duwai ïa kajuh ka jingduwai. 40 Te U la wan phai sha ki synran bad U la lap ba ki ïohthiah; naba ki khmat jong ki ki la ring ngai ngai. Bad kim tip aïu ban jubab ïa U. 41 Ynda U la wan phai ha ka sien ka balai, U la ong ha ki: “Phi dang ïathiah bad pynjem met mo? Keiñ noh! Ka por ka la poi! Ha peit, ïa u Khun u Briew yn sa aiti ha ka bor ki bymman. 42 To ïeng, ïa ngin ïaleit noh. Peit, uban shet kylla ïa Nga u la hajan!” 43 Katba U dang ïakren, u Judas, uwei na ki khat-ar ngut, u la poi. La don ryngkat bad u u paidbah uba ïarah la ki waitlam bad ki dieng tylli, ba la phah ïa ki da ki rangbah lyngdoh, ki Stad-aiñ bad ki tymmen ki san. 44 U nongshetkylla u la ai dak ha u paidbah: “U briew Uba ngan doh, U dei Uta keiñ. Kem ïa U, bad to da sumar haba phi ïalam ïa U.” 45 U Judas u tang shu poi, u la leit sha u Jisu bad u la ong, “Ko Nonghikai!” bad u la doh ïa U. 46 Kumta ki la kem ïa u Jisu bad ki la bat khak ïa U. 47 Hynrei uwei na kiba ïeng hajan, u la sei ïa la ka waitlam bad u la pom ïa u shakri jong u lyngdoh rangbah, bad u la mait ïa ka shkor jong u. 48 Te u Jisu U la kren jam bad U la ong ha ki: “Hato Nga long u ’riewdakaid ba phi wan kem ïa Nga da ki waitlam bad da ki dieng tylli? 49 Man ka sngi Nga la ju don ryngkat bad phi haba Nga hikai ha ka Tempyl, bad phim shym kem ïa Nga. Hynrei dei ban pyndep ïa ki jynthoh....” 50 Ki synran ki la ieh noh ïa U bad ki la phet ïap. 51 Uwei u samla, uba kup ka jaiñ linen halor ka met lyngkhuit, u la bud ïa u Jisu. Ki la pyrshang ban kem ïa u. 52 Hynrei u la ieh noh ïa kata ka jaiñ linen bad u la phet ïap phet im lyngkhuit na ki. 53 Te ki la ïalam ïa u Jisu sha ka ïing u lyngdoh rangbah; hangta ki lyngdoh baroh, ki tymmen ki san bad ki Stad-aiñ ki la ïalum. 54 U Petrus u la bud nadien haduh phyllaw ïing u lyngdoh rangbah. U shong syaid ding hangta ryngkat bad ki nongap-karod. 55 Ki rangbah lyngdoh bad ka Dorbar baroh kawei ki la pyrshang ban ïoh sabut pyrshah ïa u Jisu, khnang ban pynïap ïa U, hynrei kim shym shem satia. 56 La mih bun ki sakhi lamler pyrshah ïa u Jisu, hynrei ki sabut jong ki kim ïahap. 57 La don kiba ïeng bad kiba la mudui lamler kumne: 58 “Ngi la ïohsngew U ong, ‘Ngan pynjot ïa kane ka Tempyl ba shna ki briew, bad hadien lai sngi Ngan pynïeng da kawei pat kabym shym la thaw da ki briew.’ ” 59 Wat kine ki sabut ruh, kim ïahap kajuh. 60 U lyngdoh rangbah u la ïeng hakhmat jong ki baroh bad u la kylli ïa u Jisu: “Mem jubab ei ei ïa ka jingmudui jong kine pyrshah ïa Me?” 61 U Jisu U shu sngap, bad Um shym jubab ei ei. Sa shiwat u lyngdoh rangbah u la kylli ïa U: “Me long u Khrist, u Khun jong u Blei Balakyrkhu?” 62 “Nga long,” la jubab u Jisu, “bad phin sa ïohi ïa u Khun u Briew ba U shong ha ka kamon jong u Badonbor tam, bad ba U wan ha ki lyoh ka bneng!” 63 U lyngdoh rangbah u la kad ïa la ki jaiñ bad u la ong, “Ngi dang donkam sakhi aïu pat 64 Phi la ïohsngew ïa ka jingkren beiñ blei. Phi ïa pyrkhat kumno?” Baroh ki la pynrem ïa U, bad U dei ban ïap. 65 Don kiba sdang ban bynthiew ïa U, bad ban tap matlah ïa U bad ban kura ïa U. “Ïathuh mano?” ki la kylli. Bad ki shakri ki la thab ïa U. 66 U Petrus u la don harum ha phyllaw haba kawei ka shakri u lyngdoh rangbah ka la wan hajan. 67 Haba ka la ïohi ïa u Petrus uba syaid ding ka la peit shin ïa u bad ka la ong, “Phi ruh phi la don bad u Jisu Nazareth.” 68 Hynrei u la len da kaba ong, “Tip ruh ngam tip, sngewthuh ruh ngam sngewthuh ïa kaba phi ong!” Bad u la mih noh shabar shakhmat phyllaw. Markumta u syiar u la kynih. 69 Ka shakri ka la ïohi ïa u bad ka la sdang ban ïathuh ha kiba ïeng hangta, “Une u long uwei na ki!” 70 Hynrei u Petrus u la len biang. Katto katne hadien, kiba ïaïeng ki la kynnoh biang ïa u Petrus. “Khlem artatien phi dei uwei na ki! Phi ruh phi long u nong Galilea, ym dei?” 71 U Petrus u la sdang ban tla bitar, u la ong, “Ngam ithuh ïa une u briew uba phi ïakren!” 72 Mar kumta u syiar u la kynih biang. U Petrus u la kynmaw ïa ka ktien kaba u Jisu U la lah ong ha u, “Shuwa ba u syiar un kynih ar sien, lai wat men len ïa Nga,” Bad u la ïam kthang. <