Matheus Lynnong 9

​

1 U Jisu U la kiew ha ka lieng, U la leit phai sha shiliang ka duriaw bad U la wan sha ka shnong lajong.

2 Don kiba wan rah ha U ïa uwei u briew u bapang ïap shiliang, uba thiah ha ka palong. Haba u Jisu U la ïohi ïa ka jingngeit jong ki U la ong ha uba pang ïap shiliang, “Wat khuslai ei ei, ko khun! La map ïa ki pop jong phi!”

3 Te katto katne ngut ki stad-aiñ ki la pyrkhat, “Une u briew U kren beiñ Blei!”

4 U Jisu U la tip aïu ki ïapyrkhat bad U la ong: “Balei phi ïapyrkhat sniew kumne?

5 Hato ka kham jem ban ong, ‘La map ïa ki pop jong phi,’ ne ban ong, ‘Khie joit bad to ïaid?’

6 Ngan pynsabut ha phi ba u Khun u Briew U don ka bor ha ka pyrthei ban map pop.” Kumta U la ong ha u bapang ïap shiliang, “ïeng joit, rah ïa la ka jynthiah, bad khie sha ïing!”

7 Uta u briew u la ïeng bad u la leit sha la ïing.

8 Haba ki briew ki la ïohi ïa kata, ki la sngewphieng, bad ki la ïaroh ïa u Blei ba U la ai kat kane ka bor ha ki briew.

9 U Jisu U la mih nangta, bad katba U nangïaid, U la ïohi ïa u briew uba kyrteng u Matheus, ba u shong ha ka ïing apkhrong musur jong u. U la ong ha u, “To bud ïa Nga.” U Matheus u la ïeng joit, u la bud ïa U.

10 Katba u Jisu U dang shong bam ha ïing jong u, bun ki nongkhrong khajna bad ki nongpop ki la wan ïashong lang bad U bad ki synran jong U.

11 Ki Pharisi ki la ïohi ïa kane bad ki la ong ha ki synran jong U. “Balei sha u Nonghikai jong phi U ïabam lang bad ki nongkhrong khajna bad ki nongpop?” 

12 U Jisu U la ïohsngew liak ïa ki bad U la phai ktien” “Kiba koit bakhiah kim donkam ïa u nongpynkhiah, hynrei tang kiba pang keiñ.

13 Khie wad ka mut aïu kane ka jynthoh. ‘Ïa ka jingieid-isynei Nga kwah, ym ïa ka jynkñia.’ Naba Ngam shym la wan ban khot ïa ki bahok, hynrei ïa ki bapop.”

14 Te ki synran u Ïoannis Baptist ki la wan sha u Jisu ban kylli, “Balei sha ma ngi bad ki Pharisi ngi shah jingit bunsien, hynrei ki synran jong Me kim shah jingit satia?”

15 U Jisu U la jubab” “Phi khmih lynti ba kiba la shah wer sha ka jingkhawai poikha poiman kin leh sngewsih katba u nongleitkurim u dang don bad ki? Da lei lei ruh em! Hynrei kan poi ka por haba ïa u nongleitkurim yn shim noh na ki; ha kata ka sngi te kin sa shah jingit.

16 Ym don uba syrdep da ka lyngkhot jaiñ thymmai ïa ka jaiñkup barim; lada kumta, ka lyngkhot thymmai kan tar ïa ka barim, bad ka jingpei kan sa kham heh.

17 Lymne, ym ju don uban buh ïa ka waiñ thymmai ha ki lwasnieh barim. Lym kumta ki lwasnieh kin bthei, ka waiñ kan hoit bad ki lwa kin duh ei. Em, ka waiñ bathymmai ha ki lwasnieh bathymmai, bad baroh ar kin neh.”

18 Katba u Jisu U dang ong ïa kane, uwei u rangbah sinakok u la wan sha U, u la dem khrup hakhmat jong U, bad u la ong, “Ka khun jong nga ka dang shu ïap. To wan seh ban buh ïa ki kti jong Me halor jong ka, bad kan sa im.”

19 Kumta u Jisu U la ïeng bad U la bud ïa u, bad ki synran ki la leit ryngkat bad U.

20 Kawei ka kynthei, kaba la pang mihsnam jur la khat-ar snem, ka la wan na shadien u Jisu bad ka la ktah ïa ka rymmiang jaiñ jong U.

21 Ka la ong ha lade, “Lada nga ïoh ktah ïa ka jaiñkup jong U, ngan koit.”

22 U Jisu U la phai shisyndon bad U la ïohi ïa ka, bad U la ong, “Wat tieng, ko khun! Ka jingngeit jong phi ka la pynkoit ïa phi.” Ha kata hi ka khyllipmat kata ka kynthei ka la koit.

23 Te u Jisu U la poi ha ïing u rangbah sinakok. Haba U la ïohi ïa ki duhalia bad ïa u paidbah uba ïawin,

24 U la ong, “Ïakynriah, ïakynriah baroh! Ka khynnah kam shym ïap—ka shu ïohthiah!” Ki la sdang ban rkhie beiñ ïa U.

25 Tang shu pynmih ïa u paidbah, u Jisu U la leit rung ha kamra kata ka khynnah, U la shim ïa ka na ka kti, bad ka la khie joit.

26 Ka khubor shaphang kane ka la phriang kylleng kata ka thaiñ.

27 U Jisu U la mih na kata ka jaka, bad katba U dang ïaid, ar ngut ki matlah ki la ïabud ïa U, “To isynei ïa ngi, ko Khun u Dabid!” ki la pyrta.

28 Ynda u Jisu U la rung hapoh ïing, kita ki matlah ar ngut ki la wan sha U, bad U la kylli ïa ki, “Phi ngeit ba Nga lah ban leh ïa kane?” “Hooid, Kynrad!” ki la jubab.

29 Te u Jisu U la ktah ïa ki khmat jong ki bad U la ong, “To kan long kumba phi ngeit!”

30 Bad ki la imat biang. U Jisu pat U la maham ïa ki, “Sumar ban ym don ba tip ïa kane

31 Ma ki pat ki la leit bad ki la pynphriang ïa ka nam u Jisu kylleng kata ka ri baroh.

32 Ki tang shu leit kita ki briew, la wanlam sha u Jisu ïa uwei u briew ubym nang kren namarba u shongksuid.

33 Mar ïapynmih ïa u ksuid, uta u briew u la sdang ban kren. Baroh ki la lyngngoh ngaiñ. “Ngim pat ju ïohi kum kane ha Israel!” ki la ïa-ong.

34 Hynrei ki Pharisi ki la ong, “Dei u rangbah jong ki ksuid uba ai bor ïa U ban beh noh ïa ki.”

35 Kumta u Jisu U la leit jngoh ïa ki nongbah bad ki nongrit kylleng sawdong. U la hikai ha ki sinakok jong ki, U la ïalap ïa ka Khubor Babha jong ka Hima, bad U la pynkoit ïa ki briew na ki jingpang bad jingkhrew har rukom.

36 Haba U la ïohi ïa u paidbah U la sngewlem ha ka dohnud na ka bynta jong ki, namarba ki la sohsat bad sah rangli la kum ki langbrot khlem nongsharai.

37 Kumta U la ong ha la ki synran, “Ka jingot te ka bun shisha, hynrei ki nongtrei ki khyndiat.

38 To kyrpad ïa u Trai jong ka jingot ba Un phah kham bun ki nongtrei ban lum ïa la ka jingot.”