Matheus Lynnong 7
​
1 “Wat bishar ïa kiwei, ba u Blei Un ym bishar ïa phi.
2 U Blei Un bishar ïa phi kumba phi bishar ïa kiwei, bad Un thew ïa phi kumba phi thew ïa kiwei.
3 Te balei phi peit ïa u thngiat ha ka khmat u para jong phi, bad phim ïohi ïa u khung ha ka khmat la jong?
4 Kumno phi nud ban ong ha la u para, ‘Shuh, ngan weng ïa u thngiat na ka khmat jong phi,’ haba phi don u khung ha ka khmat la jong?
5 Arsap! Weng nyngkong ïa u khung na la ka khmat, nangta phin sa lah ban ïohi bad ban weng ïa u thngiat na ka khmat u para jong phi.
6 “Wat ai ïa kaba kyntang ha ki ksew, lymne wat bret ïa ki mawlynnai ha ki sniang, ïoh kin kyrdem ïa ki hapoh kjat, bad kin phai kylla ban patar ïa phi.”
7 “Pan, bad phin sa ïoh; wad, bad phin sa shem; tied, bad yn sa plie ïa phi.
8 Namar kat uba wad un shem bad ïa uba tied yn plie.
9 Hato don u kpa uban ai ïa la u khun da u maw haba u wan pan kpu?
10 Ne phin ai ïa u da u bseiñ haba u wan pan dohkha?
11 La phi sniew katno katno ruh, phi tip ban ai da kiei kiei ki babha ïa la ki khun. Katno lei lei u Kpa bneng jong phi Un ai ïa kiei kiei ki babha ïa kito kiban wan pan na U!”
12 “Leh ïa kiwei kumba phi kwah ba kiwei kin leh ïa phi: kane ka kynthup lang ïa ka Aiñ u Moses bad ka jinghikai ki nongïathuhlypa.”
13 “To bsut na ka khyrdop ka bakhim, naba ka kylluid ka khyrdop bad ka suk ka lynti kaba ïalam sha dujok, bad ki bun kiba ïaid na ka.
14 Hynrei ka khim ka khyrdop bad ka eh ka lynti kaba ïalam sha ka jingim, bad khyndiat ngut kiba shem ïa ka.”
15 “To sumar na ki nongïathuhlypa balamler; ki wan sha phi kum ki langbrot, phewse ki long ki suri bapynjot.
16 Na ki soh jong ki phin ithuh ïa ki. Ki dieng shiah kim met da ki soh waiñ, lymne ki ñiut shiah ki met da ki soh dymbur.
17 U dieng u babha u met ki soh ki babha, hynrei u dieng u basniew u sei ki soh ki basniew.
18 U dieng u babha um lah ban sei ki soh ki basniew, bad u dieng u basniew um lah ban sei ki soh ki babha.
19 Man la u dieng ubym met u soh u babha yn khet noh, bad yn bret ha ka ding.
20 Nga ong biang, phin ithuh ïa ki nongïathuhlypa balamler na ki kam jong ki.”
21 “Ym kat uba ong ha Nga. ‘Ko Trai, ko Trai! Un rung ha ka Hima bneng, hynrei kito keiñ kiba leh ïa ka mon u Kpa jong Nga.
22 Ynda poi kata ka sngi, bun kin ïa ong ha Nga, ‘Ko Trai, ko Trai! Ngi la ïalap ha ka kyrteng jong Me; ha ka kyrteng jong Me ngi la beh noh ïa ki ksuid bad ngi la leh bun ki kam phylla!
23 Te Ngan jubab ïa ki, “Ngam ju ithuh ïa phi. Khie noh na Nga, phi ki nongkam bymman!”
24 “Namarkata jar uba sngap ïa kine ki ktien jong Nga bad uba leh ïa ki, u long kum u briew u basian uba la tei ïa la ka ïing halor u mawsiang.
25 Te u slap u la hap, ki wah ki la shlei, bad ki lyer ki la beh bad ki la paswut ïa kata ka ïing. Hynrei kam shym kyllon, namarba la tei ïa ka halor u mawsiang.
26 Jar uba ïohsngew ïa kine ki ktien jong Nga hynrei ubym leh ïa ki, u long kum u briew u babiej uba tei ïa la ka ïing ha u shyiap.
27 Te u slap u la hap, ki wah ki la shlei, ki lyer ki la paswut ïa kata ka ïing bad ka la khyllem, bad ka la jot thiaw.”
28 Ynda u Jisu U la dep kren, ki paidbah ki la sngewphylla ïa ki jinghikai jong U.
29 Naba Um shym la hikai kum ki stad-aiñ jong ki, hynrei kum uba don ka bor ka iktiar.