Matheus Lynnong 6
​
1 “To sumar ban ym leh ïa ki kamhok jong phi hakhmat ki briew, ba kin dup ïohi. Lada phi leh kumta phin ym ïoh shuh ïa ka bainong na u Kpa bneng jong phi.”
2 “Kumta haba phi ai isynei ïano ïano, wat da pyrta shnong kumba leh ki arsap ha ki sinakok bad ki surok bah, ba yn dup ïaroh ki briew. Nga ong ha phi, ki la ïoh ïa la ka bainong.
3 Hynrei haba phi ai isynei, wat ai ba ka ’ti kadiang kan tip ïa kaba ka ’ti kamon jong phi ka leh.
4 To leh ïa kata ha ka barieh, bad u Kpa jong phi Uba ïohi ha ka barieh, Un siewkylliang ïa phi.”
5 “Haba phi duwai, wat long kum ki arsap! Ki ieid ban ïeng ban duwai ha ki sinakok bad ki dong jong ki surok, ba yn dup ïohi ki briew. Nga ong ha phi, ki la ïoh ïa la ka bainong!
6 Phi pat haba phi duwai, to rung ha la ka pulit. Khang ïa ka jynkhang, bad to duwai ïa u Kpa jong phi ha ka barieh. Bad u kpa jong phi Uba ïohi ha ka barieh, Un siewkylliang ïa phi.
7 “Haba phi duwai, wat bun ktien kum ki ’riewpyrthei, kiba tharai ba yn kham shah shkor ïa ki haba la bun ki ktien.
8 Te wat long kum ma ki keiñ! U Kpa jong phi U tip lypa ïa kaba phi donkam, shuwa ba phin pan.”
9 “Phin duwai kumne: ‘Ko Kpa jong ngi Uba ha bneng, kan long ka bakhuid ka kyrteng jong Me,
10 kan wan ka Hima jong Me, kan long ka mon jong Me ha ka khyndew kumba ha bneng.
11 To ai ïa ngi mynta ka jynbam jong ngi kaba ha la ka sngi.
12 Bad to map ïa ngi ïa ki ryngkang jong ngi, kumba ngi ruh ngi map ïa kiba leh sniew ïa ngi.
13 Wat tynjuh than ïa ngi, bad to da ïa ngi na u Basniew.’
14 “Naba lada phi map ïa ki pop jong kiwei pat, u Kpa bneng jong phi Un map ïa ki jong phi ruh.
15 Hynrei lada phim map ïa kiwei pat, u Kpa bneng jong phi Un ym map ïa phi.”
16 “Haba phi shah jingit, wat leh sngewsih kum ki arsap. Ki pynran ïa la ka khmut ka khmat ba kin dup paw shah jingit ha ki briew. Nga ong ha phi, ki la ïoh ïa la ka bainong!
17 Phi pat haba phi shah jingit, to bta ïa la ka khmut ka khmat bad to sad ïa la u shñiuh.
18 Kumta kiwei pat kin ym tip ba phi shah jingit—tang u Kpa jong phi Uba don ha kaba rieh. Bad u Kpa jong phi Uba ïohi ha ka barieh, Un ai bainong ïa phi.”
19 “Wat kynshew spah ha kane ka pyrthei, ha kaba ki khñiang bad ka sarang ki pynjot, bad ki nongtuh ki phrung bad ki tuh.
20 Hynrei ma phi to kynshew ka spah ha bneng, ha kaba ki khñiang bad ka sarang kim lah ban pynjot, bad ki nongtuh kim lah ban phrung bad ban tuh.
21 Naba haba don ka spah, hangta ruh ka dohnud jong phi ka don.”
22 “Ki khmat ki long ka sharak ïa ka met: lada ki khmat jong phi ki sngur, kan shai ka met jong phi baroh kawei.
23 Hynrei lada ki khmat jong phi ki jngut, ka met jong phi kan sah dum. Kumta lada shem ba ka jingshai ha phi ka long ka jingdum, katno kaba sngewshyrkhei kata ka jingdum!
24 “Ym don ba lah ban shakri ar ngut ki kynrad: un isih ïa uwei bad un ieid ïa uwei pat; ne un snoh ha uwei bad un kyntait ïa uwei pat. Phim lah ban shakri bad Blei bad spah.
25 “Na kane ka daw Nga ong ha phi: wat diaw shaphang ka bam ka dih ne ka kup ka sem. Haba pyrkhat, hato ka jingim kam kham kor ban ïa ka jynbam? Ne hato ka met kam kham kor ban ïa ka jynphong?
26 Ha peit ïa ki sim kiba her sawdong: kim ïabet, lymne kim ïa-ot, lymne kim ïalum ha ki thiar; u Kpa jong phi U bsa ïa ki! Hato phim kham kor ma phi ban ïa ki sim?
27 Mano na phi uba lah ban pynjlan ïa la ka ryta, tang da kaba khuslai shaphang jong ka?
28 “Te balei phi khuslai shaphang ka kup ka sem? Ha peit kumno ki tiewkhlaw ki khie: kim trei lymne kim thir.
29 Hynrei Nga ong ha phi ba wat u Solomon, ha la ka khor ka khriam, um shym riam itynnat wat kat uwei na kine ki syntiew.
30 Dei u Blei Uba pynriam ïa u ’langkhlaw, uba mynta u don, bad lashai la thang noh. Katno lei Un sumar ïa phi, phi ki barit jingngeit!
31 “Kumta wat diaw da kaba ong: ‘Na-ei ngan ïoh bam ïoh dih ne ïoh jaiñ ïoh nep?
32 Tang ki ’riewpyrthei ki ïanap ïa kine kiei kiei. U Kpa bneng jong phi U tip lypa ba phi donkam ïa kine kiei kiei.
33 To imsngi nyngkong ha ka Hima bad ka saiñdur u Blei, bad u Blei Un sa pynbiang ïa phi ïa kine kiei kiei baroh.
34 To namarkata wat khuslai na ka bynta kaba lashai; naba kaba lashai kan pyrkhat hi ïa lade. Ka mynta ka la don la ki jong ki jingkhuslai.”