Matheus Lynnong 5

 

1 Haba u Jisu U la ïohi ïa ki paidbah, U la kiew sha u lum bad U la shong hangta. Ki synran jong U ki la ïalum sawdong ïa U.

2 Te U la sdang ban hikai ïa ki:

3 “Suk ki baduk ha ka mynsiem, naba ka Hima bneng ka long ka jong ki.

4 Suk kiba ïam, naba yn pyntngen ïa ki.

5 Suk ki bajemnud, naba kin ïoh ïa ka khyndew ka shyiap.

6 Suk kiba thngan bad kiba sliang ïa ka hok, naba yn pynkdang ïa ki.

7 Suk kiba isynei, naba yn isynei ïa ki,

8 Suk kiba khuid ka dohnud, naba kin ïohi ïa u Blei.

9 Suk kiba pynïasuk naba yn khot ïa ki ki khun jong u Blei.

10 Suk kiba shah bánbeiñ na ka bynta ka hok, naba ka Hima bneng ka long ka jong ki.

11 Suk ma phi haba kin tim bad lehbeiñ ïa phi, bad kin kren thadrong har rukom pyrshah ïa phi namar phi long ki nongbud jong Nga.

12 To kmen bad to risa, naba ka bainong jong phi ha bneng ka long ka bakhraw. ha kajuh ka rukom ki la lehbeiñ ïa ki nongïathuhlypa kiba ha shuwa jong phi.”

13 “Phi long ka mluh jong ka pyrthei. Hynrei lada ka mluh ka blad noh, da-ei yn pynbang pat ïa ka? Kam larkam ei ei shuh, sa tang ban shu bret noh shabar bad ba yn ïuh ki briew.

14 “Phi long ka jingshai jong ka pyrthei. Ym lah ban buhrieh ïa ka nongbah ba la tei halor u lum.

15 Ym don uba thang ïa ka sharak bad buh ïa ka hapoh ka pyrha; hynrei u buh ïa ka halor ka diengpynïeng sharak, khnang ba kan ai jingshai ïa baroh hapoh ïing.

16 Kumjuh to ai ba ka jingshai jong phi kan tyngshaiñ hakhmat ki briew, ba kin dup ïohi ïa ki kam babha jong phi bad kin dup pyndonburom ïa u Kpa bneng jong phi.”

17 “Wat tharai ba Nga la wan ban pynduh pyndam noh ïa ka aiñ u Moses bad ïa ka jinghikai ki nongïathuhlypa. Ngam wan ban pynduh pyndam ïa ki, hynrei ban pynbiang janai ïa ki.

18 Nga ïathuh shisha ha phi: katba dang sah ka bneng bad ka khyndew, yn ym pynduh wat iwei i dak rit jong ka Aiñ, tat ynda la pyndep baroh.

19 Namarkata, jar uba pynkheiñ wat ïa ka hukum ka barit tam bad u hikai ïa kiwei ban leh kumjuh, yn ñiew ïa u u barit tam ha ka Hima bneng. Hynrei jar uba kohnguh ïa ka Aiñ bad uba hikai ban leh kumjuh, un long u bakhraw ha ka Hima bneng.

20 Nga ong ha phi te ba phin ïoh rung ha ka Hima bneng tang lada ka jingleh hok jong phi ka palat ïa ka jong ki stad-aiñ bad ki Pharisi.

21 “Phi la ïohsngew ba la ong ha ki longshuwa jong ngi. ‘Wat pynïap; bad jar uba pynïap, un shah bishar.’

22 Nga pat nga ong ha phi: Kat uba bitar ïa la u para, un shah bishar, kat uba kynnoh ïa la u para ‘Me u pohjait pohrati! Un shah tian bishar ha ka Dorbar; bad kat uba khot ‘khlem-blei’ ïa la u para, u don ha jingsyier ban hap ha ka dujok ding.

23 “Kumta lada phi wan tyrwa jynai ha ka duwan, bad phi kynmaw ba u para jong phi u don ei ei pyrshah ïa phi,

24 to ieh noh hangta hakhmat ka duwan ïa la ka jynai, bad to leit ban ïasuk shuwa bad la u para; nangta sa wan biang ban tyrwa ïa la ka jynai ha u Blei.”

25 “To ïasuk noh kloi bad u nongmudui jong phi, katba phi dang leit ryngkat bad u sha ïing bishar; ïoh u nongmudui u aiti ïa phi ha u nongbishar, u nongbishar pat ha ki pulit, bad kine ki set byndi ïa phi.

26 Phin shah set hangta, Nga maham ïa phi, haduh ba phin da siew dep ïa ka kuna.”

27 “Phi la ïohsngew ba la ong ha ki longshuwa jong ngi, ‘Wat klim’,

28 Nga pat Nga ong ha phi: Jar uba peit ïa ka kynthei, bad u kwah brai ïa ka, u la lah klim lypa ïa ka ha la ka dohnud.

29 Kumta lada ka khmat kamon jong phi ka pynleh pop ïa phi, to khlaw noh ïa ka bad to pret noh! Ka kham bha ba phin duh kawei ka dkhot met, ban ïa kaba ka met jong phi baroh kawei kan shah bret hapoh dujok.

30 Lada ka kti kamon jong phi ka pynleh pop ïa phi, to ot noh ïa ka bad pret noh! Ka kham bha ba phin duh kawei ka dkhot met, ban ïa kaba ka met jong phi baroh kawei kan shah bret hapoh dujok.”

31 “La ong ruh, ‘Kat uba pyllait noh ïa la ka tnga, un ai ha ka ïa ka kot ïapyllait.’

32 Nga pat Nga ong ha phi: lada uno uno u briew u pyllait noh ïa la ka tnga—Ngam kren hangne shaphang kito kiba shu ïashong—u pynklim ïa ka; bad uta uba ïapoi bad kata kaba la ïapyllait, u klim.”

33 “Phi la ïohsngew ba la ong ruh ha ki ’riewhyndai, “Wat smai thala, hynrei to pyndep ïa kata kaba phi la smai ha u Trai.’

34 Nga te Nga ong ha phi: wat smai da ka bneng namarba ka long ka khet u Blei;

35 lymne da ka khyndew, namar ka long ka jingïuh kjat jong U; lymne da ka Jerusalem, namar ka long ka nongbah u Syiem bakhraw.

36 Wat smai wat da ka khlieh jong phi, namar phim lah ban pynlieh ne pynïong ïa uwei u ’ñiuhkhlieh.

37 Shu ong ‘Hooid’ ne ‘Em’; palat ïa kane ka wan na u bymman.”

38 “Phi la ïohsngew ba la ong, ‘Ka khmat namar ka khmat, ka bniat namar ka bniat.’

39 Nga pat Nga ong ha phi: wat pynhiar kput ïa uno uno uba leh bymdei ïa phi. Lada uno uno u thab ïa phi na ka ngab kamon, to pynshah ha u sa ïa kawei pat ka ngab.

40 Lada uno uno u mudui pharep ban ïoh ïa ka sopti jong phi, ieh un mat ïoh ïa ka soptilor ruh.

41 Lada uno uno u ring bor ïa phi ban kit jingkit shi mer, to kit ar mer.

42 Haba don ba pan ei ei na phi, to ai ïa u; haba don ba pan kylliang, wat kyntait ïa u.”

43 “Phi la ïohsngew ba la ong, ‘To ieid ïa la ki lok, to isih ïa ki nongshun jong phi.’

44 Nga pat Nga ong ha phi” To ieid ïa ki nongshun jong phi bad to duwai na ka bynta kito kiba lehbeiñ ïa phi,

45 kumta ba phin dup long ki khun u Kpa bneng jong phi. Naba U pynmih ïa ka sngi ha kiba sniew bad ha ki babha kumjuh, bad U pynslap ha ki bahok bad ha ki bymhok.

46 Phi khmih lynti ban ïoh bainong aïu, lada phi ieid tang ïa ki briew kiba ieid ïa phi? Wat ki nongkhrong khajna ki leh kajuh!

47 Bad lada phi kren tang ïa la ki lok, hato phi la leh ei ei ka baphylla? Wat ki jentil ki leh ïa kata!

48 Phi dei ban long ki bajanai, kumba u Kpa bneng jong phi U long u bajanai.”