Matheus Lynnong 4

 

1 Nangta u Mynsiem u la ïalam ïa u Jisu sha ri kynjah ba yn pynshoi da u Ksuid.

2 Ynda u la shah jingit sawphew sngi bad sawphew miet, U la thngan.

3 Te u nongpynshoi u la wan sha U bad u la ong, “Lada Me long u Khun u Blei, to hukum ïa kine ki maw ba kin kylla kpu.”

4 U Jisu U la phai ktien, “La thoh, ‘Ym tang da u kpu hi u briew u im, hynrei da ka ktien baroh kaba mih na ka shyntur u Blei.’ ”

5 Nangta u ksuid u la rah ïa u Jisu sha ka Nongbah Bakhuid, bad u la pynïeng ïa U ha kliar jong ka Tempyl,

6 bad u la ong ha U, “Lada Me long u Khun u Blei, to pynnoh ïa lade; naba la thoh, ‘U Blei Un ai hukum ha la ki angel ban sumar ïa Me; kin rah ïa Me ha la ki kti, ïoh kumno re kumno Men jynthut ha u maw.’ ”

7 Hynrei u Jisu U la jubab “Ka jynthoh ka ong ruh, ‘Men ym tynjuh ïa u Trai u Blei jong me.’ ”

8 Nangta u ksuid u la rah ïa u Jisu sha u lum bakynjang shibun, bad u la pyni ha U ïa ki hima baroh jong ka pyrthei bad ka jingkhraw jong ki.

9 “Ïa kane baroh ngan ai ha Me,” u la ong u ksuid, “lada Men dem ban mane ïa nga.”

10 Hangta u Jisu U la jubab, “Khie noh, ko Soitan! Ka jynthoh ka ong,  ‘Ïa u Trai u Blei jong me men mane, bad tang ïa U hi men shakri!’ ”

11 Kumta u ksuid u la ieh noh ïa u; bad ki angel ki la wan ban ai bam ai dih ïa u Jisu.

12 Haba u Jisu U la ïohsngew  ba la set byndi ïa u Ïoannis, U la kynriah noh sha Galilea.

13 Um shym la leit shong ha Nazareth, hynrei ha Kapernaum, ka shnong harud ka Duriaw Galilea, ha ka ilaka Zebulun bad Naphtali,

14 ban pynurlong ïa kaba u nongïathuhlypa Isaïa u la ïathuh lypa:

15 “Ko ri Zebulun, ko ri Naphtali, sha khap duriaw, sha shiliang ka Jordan, ko Galilea jentil!

16 Ki briew kiba shong ha ka jingdum kin ïohi ïa ka jingshai ka bakhraw! Ha ki briew kiba shong ha ka syrngiew jingïap, ka jingshai kan thaba!”

17 Naduh kata ka por u Jisu U la sdang ban ïalap. U la ïaiban, “To kylla ka bamut! Ka Hima u Blei ka la jan!”

18 Katba u Jisu U dang ïaid harud ka Duriaw Galilea. U la ïohi ar ngut shipara, u Simon (ïa uba la sin Petrus) bad u para jong u u Andreas, ba ki ïabret jar ha ka duriaw, naba ki la long ki nongtong dohkha

19 U Jisu U la ong ha ki, “Ale bad Nga, bad Ngan pynlong ïa phi ki nongtong briew.”

20 Markumta ki la ieh noh ïa la ki jar bad ki la bud ïa U.

21 U la leit kham shakhmat bad U la ïohi sa ïa kiwei pat ar ngut shipara, u Jakob bad u Ïoannis, ki khun u Zebedi. Ki la ïadon ha ka lieng bad u kpa jong ki u Zebedi, ban pynbeit ïa ki jar. U Jisu U la khot ïa ki;

22 markumta ki la ïeh noh ïa ka lieng bad ïa la u kpa, bad ki la bud ïa u Jisu.

23 U Jisu U la leit kylleng ka Galilea baroh, U la hikai ha ki sinakok, U la ïalap ïa ka Khubor Babha jong ka Hima, bad U la pynkoit ïa ki briew na ki jait jingpang baroh.

24 La bna shaphang jong U kylleng ka ri Siria baroh kawei, kumta ki briew ki la wan rah ïa kiba pang bad kiba ñiun har rukom: kiba shongksuid, kiba pang bhur, bad kiba pang ïapshiliang—ïa kine baroh u Jisu U la pynkoit.

25 U paidbah byllien u la bud ïa U na Galilea bad na ka Raid Shiphew Shnong, na Jerusalem, na Judea, bad na shiliang ka Jordan.