Matheus Lynnong 28

 

1 Ynda la lah ka sngi sabath, dang shai byrngut byrnget ha ka sngi nyngkong jong ka taïew, ka Maria Magdalena bad kawei pat ka Maria ki la leit peit ïa ka jyntep.

2 Kynsan kynsan la khih u jumai u bajur; u angel u Trai u la wan hair na bneng, u la pyntyllun ïa u maw bad u la shong halor jong u.

3 Ka dur ka dar jong u la kum ka leilieh bad ki jaiñ jong u ki lieh kum ka ïor.

4 Ki nongap-karod ki la tieng haduh katta katta bad ki la khynñiuh, bad ki la long kum ki baïap.

5 U angel u la kren ha ki kynthei, “Phim dei ban sheptieng” u la ong. “Nga tip ba phi ïawad ïa u Jisu ba la sahnarphna.

6 Um don hangne; U la mihpat kumba U la ong. Ale shane, bad peit ïa ka jaka ha kaba la pynthiah ïa U.

7 Khie mynta bran bran ban ïathuh ha ki synran jong U, ‘U la mihpat na ka jingïap, bad U dang leit mynta sha Galilea ha shuwa jong phi: phin lap ïa u hangta!’ Kane ka khubor ba nga wan rah ha phi.”

8 Kumta ki kynthei ki la mih khynrat na jyntep, lamtieng hynrei dap da ka jingkmen, bad ki la mareh ban rah ïa kane ka khubor babha ha ki synran jong U.

9 Kyndit kyndit u Jisu U la paw ha ki, bad U la ong, “Khublei!” Ki la wan shajan, ki la bat ïa ki kjat jong U, bad ki la mane ïa U.

10 “Wat sheptieng,” u Jisu U la ong ha ki. “Khie leit ïathuh ha ki para jong Nga ban leit sha Galilea; hangta kin sa ïohi ïa Nga.”

11 Katba ki kynthei ki leit phai, katto katne ngut ki shipai kiba ap ïa ka jyntep, ki la wan sha ka nongbah bad ki la ïathuh ha ki rangbah lyngdoh kat kaba la jia.

12 Ki rangbah lyngdoh ki la ïakynduh bad ki tymmen ki san, bad ki la ïasuh buit: ki la ai tyngka shikatdei ïa ki shipai

13 bad ki la bthah kumne, “Phi dei ban ong ba ki synran jong U ki la wan mynmiet bad ki la tuh ïa ka met jong U katba phi dang ïohthiah.

14 Lada u lat un tip ïa kane, ngin sa pynngeit ïa u, bad phim dei ban khuslai ei ei.”

15 Ki nongap ki la shim ïa kata ka pisa bad ki la leh kumba la ai buit ïa ki. Ïa kane ka khana kai ki dang ïathuh haduh mynta mynne hapdeng ki Ju.

16 Ki Khatwei ngut ki synran ki la leit sha u lum ha Galilea ha uba u Jisu U la bthah ba kin leit.

17 Haba ki la ïohi ïa U, ki la mane ïa U wat la don ruh kiba la artatien.

18 U Jisu U la leit hajan bad U la ong ha ki: “Ïa Nga la ai ka bor baroh ha bneng bad ha khyndew.

19 Khie leit, namarkata, sha ki jait bynriew baroh bad to pynlong ïa ki ki synran jong Nga. Pynbaptis ïa ki ha ka kyrteng u Kpa, bad u Khun, bad u Mynsiem Bakhuid.

20 To hikai ïa ki ban rakhe ïa ki hukum jong Nga baroh. Bad to tip skhem ba Ngan don ryngkat bad phi barabor, haduh kaba wai noh ka pyrthei.”