Matheus Lynnong 27

​

1 Dang step phyrngap baroh ki rangbah lyngdoh bad ki tymmen ki san ki la ïasuh buit pyrshah ïa u Jisu ban pynïap ïa U.

2 Ki la teh ïa U, bad ki la ïalam ïa U ban aiti ha u Pilatus, u lat.

3 Haba u Judas, u nongshetkylla, u la ïohi ba la pynrem ïa u Jisu, u la babe shibun bad u la pynphai biang ïa ki laiphew sbai rupa sha ki rangbah lyngdoh bad ki tymmen ki san.

4 “Nga la leh pop da kaba die noh ïa u baluilui!” u la ong. “Kan lei ïa ngi?” ki la jubab. “Peit hi ma me keiñ!”

5 U Judas u la pret ïa kita ki sbai ha ka Tempyl, nangta u la leit noh. U la leit bad u la phasi ïa lade.

6 Ki rangbah lyngdoh ki la khar ïa kita ki sbai bad ki la ong, “Kane ka dor jong ka snam! Ym bit ban thep ïa ka ha ka jynkynshew jong ka Tempyl.”

7 Ynda ki la ïahap jingmut lang, da kita ki sbai ki la thied ïa ka lum u nongthaw khiew, ban long jaka tep ïa ki nongwei.

8 Na kata ka daw la khot ïa kata ka lum ‘Ka Lumsnam’ haduh mynta mynne.

9 Te ka la urlong kata kaba u nongïathuhlypa Jeremiïa u la ong: “Ki la shim ïa ki laiphew sbai rupa (ka dor pyllait briew hapdeng ki Israel)

10 bad da kita ki la thied ïa ka lum u nongthaw khiew, kumba u Trai U la hukum ïa nga.”

11 U Jisu U la ïeng hakhmat u lat uba la tohkit ïa U. “Me dei u syiem ki Ju?” u la kylli. “Hooid, Nga dei,” u Jisu U la jubab.

12 Hynrei ïa ki jingmudui jong ki rangbah lyngdoh bad ki tymmen ki san Um shym la jubab ei ei.

13 Kumta u Pilatus u la ong ha U, “Mem ïohsngew ïa kine kiei kiei baroh ba ki mudui ïa me?”

14 Hynrei u Jisu Um jubab wat shi kyntien ruh, haduh ba u lat u la lyngngoh ngaiñ.

15 Man la ka sngikhawai Paskha, u lat u ju pyllait uwei u koidi ïa uba ki paidbah ki pan.

16 Ha kata ka por la don uwei u koidi u babudnam, uba kyrteng Barabbas.

17 Kumta haba u paidbah u la ïalum lang, u Pilatus u la kylli ïa ki, “Ïano phi kwah ba ngan pyllait, ïa u Barabbas ne ïa u Jisu ba khot u Khrist?”

18 U la tip bha ba ki la aiti ïa u Jisu ha u namar ki bishni.

19 Katba u Pilatus u dang shong bishar, ka tnga jong u ka la phah ktien sha u. “Wat ïamushlia bad uto u briew u bahok, namarba mynta ka sngi nga la shitom jingmut shibun ha ka jingphohsniew na ka bynta jong U.”

20 Ki rangbah lyngdoh bad ki tymmen ki san ki la kynshoit ïa u paidbah ban pan na u Pilatus ban pyllait ïa u Barabbas, ïa u Jisu pat ban pynïap.

21 Kumta haba u lat u la kylli ïa ki, “Ïano na kine ki ar ngut phi kwah ba ngan pyllait?” ki la jubab. “Ïa u Barabbas!”

22 “Te ngan leh aïu ïa u Jisu ba khot u Khrist?” u Pilatus u la kylli ïa ki, “Sahnarphna ïa U!” ki la pyrta baroh.

23 Te u Pilatus u la kylli, “U la leh kam sniew aïu?” Hangta ki la kyrkait jam, “Sahnarphna ïa U!”

24 Haba u Pilatus u la ïohi ba um lah leh ei ei, pynban kumba kan mih ka jingkhih win, u la phah shim um, u la thet ïa la ki kti hakhmat u paidbah, bad u la ong. “Nga sait khuid na ka snam une u briew! To ïapeit hi ma phi!”

25 Te uta u paidbah u la pyrta baroh shar, “Ka snam jong U halor jong ngi bad halor ki khun jong ngi!”

26 Kumta u Pilatus u la pyllait ïa u Barabbas ha ki. Ïa u Jisu pat u la phah sympat, bad u la aiti ïa U ba yn sahnarphna.

27 Nangta ki shipai jong u Pilatus ki la ïalam ïa u Jisu hapoh ïing u lat, bad baroh shikynhun ki la lum sawdong ïa U.

28 Ki la loit jubor ïa ki jaiñ jong U bad ki la pynkup da ka jaiñkup saw.

29 Ynda ki la thaiñ pansngiat da ki shiah, ki la pynphong ïa ka ha ka khlieh jong U. Ki la pynbat ïa U khah ha ka kti kamon jong U, bad da kaba dem ngon hakhmat jong U, ki la rkhie beiñ ïa U, ki la ïa-ong, “Khublei, ko syiem ki Ju!”

30 Ki la bynthiew ïa U, bad da uta u khah ki la shoh ïa U na ka khlieh.

31 Ynda ki la dep rkhie beiñ, ki la weng noh ïa ka jaiñkup bad ki la pynphong ïa U da ki jaiñ lajong, nangta ki la ïalam ïa U ban sahnarphna.

32 Katba ki dang ïaleit, ki la ïakynduh ïa u briew na Kirini uba kyrteng u Simon ïa une ki la pynbor ban bah ïa ka diengphna u Jisu.

33 Ki la poi sha ka jaka ba la khot Golgotha, kaba mut ‘Ka Jaka Maloikhlieh.

34 Ki la pyndih ïa U da ka waiñ ba la khleh bad ka umksang; ynda u la mad, Um shym treh dih.

35 Ki la sahnarphna ïa u Jisu, nangta ki la ïakhalai nusib ïa ki jaiñ jong U,

36 bad ki la ïashong ap ïa U.

37 Haneng ka khlieh jong U ki la buh ka jynthoh mudui pyrshah ïa U: “Une U long u Jisu, u syiem ki Ju.”

38 Bad ki la sahnarphna ar ngut ki dakaid lang bad u Jisu, uwei sha kamon bad uwei sha kadiang.

39 Ki briew kiba ïaid lynti ki la kyrngah khlieh bad ki la kren beiñ ïa u Jisu:

40 “Hana Me Uban pyntwa ïa ka Tempyl bad ban tei biang ïa ka hapoh lai sngi! Pynim ïa lade. Lada Me dei u Khun u Blei, hiar noh na ka diengphna.”

41 Ha kajuh ka rukom ki rangbah lyngdoh bad ki Stad-aiñ bad ki tymmen ki san ki la kyniw ïa U:

42 “Ïa kiwei te U la pynim, ïa lade pat Um lah! Ym dei mo ma U u syiem Israel? Lada Un hiar na ka diengphna mynta, ngin ïangeit ïa U!

43 U la shaniah ha u Blei: to u Blei Un pyllait ïa U mynta, lada U kwah! Hato Um shym ong, ‘Nga long u Khun u Blei?’ ”

44 Wat ki dakaid ba la sahnarphna lang bad U, ki la beiñ ïa U ha kajuh ka rukom.

45 Ha ka por shiteng sngi, ka ri baroh kawei ka la dum tliw lai kynta!

46 Ha ka por lai baje u Jisu U la pyrta da kasur ka bajam, Eli, Eli, lama sabakhthani? Kaba mut, “Ko Blei jong Nga, ko Blei jong Nga, balei Me la ieh noh lyndet ïa Nga?”

47 Don na kiba ïaïeng hangta kiba la ïohsngew ïa U, bad ki la ong, “U Khot ïa u Elija!”

48 Uwei na ki u la mareh bak bak, u la shim ïa u sponj, u la wieh ïa u ha ka sirka bad u la sieh ïa u ha tduh u dieng; nangta u la pyrshang ban pyndih ïa U.

49 Hynrei kiwei pat ki la ïa-ong, “Ap! Shuh, ngin ïapeit lada u Elija un wan ban pyllait ïa U!”

50 U Jisu U la pyrta biang da ka sur ka bajam, bad U la dkut mynsiem.

51 Ka pyrda jong ka Tempyl ka la kad ar liang naduh khlieh haduh trai. Ka khyndew ka la khynñiuh, ki mawsiang ki la pdang,

52 ki jyntep ki la ang, bad bun ki ’riewhok ki la mih na ki baïap.

53 Ki la mih na ki jyntep, bad hadien ka jingmihpat jong u Jisu ki la leit sha ka Nongbah Bakhuid bad ki la paw ha bun ki briew.

54 Haba u rangbah shispah bad ki shipai jong u, kiba ïa-ap ïa u Jisu, ki la ïohi ïa u jumai bad ïa kiei kiei kiba la jia, ki la sheptieng her, ki da ong, “Da shisha Une U la long u Khun u Blei!”

55 La don shibun ki kynthei hangta, kiba ïapeit na jngai; kine ki la bud ïa u Jisu na Galilea bad ki la shakri ïa U.

56 Hapdeng jong ki la don ka Maria Magdalena, ka Maria ka kmie u Jakob bad u Joseph, bad ka kmie ki khun u Zebedi.

57 Ynda la premmiet, la wan poi uwei u briew u bariewspah na Arimathea, uba kyrteng u Joseph; une ruh u la long u synran u Jisu.

58 U la leit hakhmat u Pilatus bad u la pan ïa ka met u Jisu. U Pilatus u la pynmih hukum ba yn ai ha u.

59 Kumta u Joseph u la shim ïa ka metïap, u la spaiñ ïa ka da ka jaiñ linen bathymmai,

60 bad u la buh ïa ka ha ka jyntep lajong, kaba u dang shu dep khlong ha u mawsiang. Nangta u la pyntyllun ïa u maw heh ban khang ïa ka jyntep, bad u la leit noh.

61 Ka Maria Magdalena bad kawei pat ka Maria ki la ïadon hangta, ki ïashong pyrshah ka jyntep.

62 Kum lashai—kata ka mut hadien ka Sngi Thohdieng—ki rangbah lyngdoh bad ki Pharisi ki la ïakynduh ïa u Pilatus,

63 bad ki la ïa-ong: “Ko lat kynrad, ngi kynmaw ba Uto u nongshukor U la ong mynba u dangim, ‘Hadien lai sngi Ngan mihpat.’

64 Pynmih hukum ban ap-phira bha ïa ka jyntep haduh ka sngi ba balai, khnang ba ki synran jong U kin ym lah ban leit tuh ïa U, nangta ban ïathuh ïa ki briew, ‘U la mihpat na ka jingïap.’ Kane ka jingshukor ka bakhatduh kan kham sniew ban ïa ka banyngkong.”

65 “Phi don ki nongap,” u Pilatus u la jubab ïa ki; “khie leit phira ia ka jyntep katba phi sngewbit.”

66 Kumta ki la ïaleit, ki la pynskhem ïa ka jyntep da ka muhor ha u maw bad da kaba buh ïa ki nongap-karod.