Matheus Lynnong 24

​

1 Haba u Jisu U la mih na ka Tempyl, katba U dang leit, ki synran ki la wan sha U ban pyni ïa ki jyntei jong ka.

2 “Hooid”, U la ong, “peit-thuh bha ïa kine ki jyntei baroh. Nga ong ha phi: yn ym ieh noh hangne ïa u maw halor u maw; yn sa pyntwa lut khoit.”

3 Katba u Jisu U dang shong ha u lum Olib, ki synran ki la wan jar jar sha U, bad ki la kylli, “Ha ïathuh ïa ngi lano kane kan sa urlong? Kaei ka dak jong ka jingwan jong Me bad ka jingwai ka pyrthei?”

4 U Jisu U la jubab: “To husiar bha ïoh don ba thok ïa phi.

5 Bun ki briew kin wan ha ka kyrteng jong Nga da kaba ong. ‘Dei ma nga u Khrist!’ bad kin shukor bun ngut.

6 Phin ïohsngew shaphang ki thma bad ki hamsaïa jong ki thma: hynrei wat ïasngewdik. Kine kiei kiei ki dei ban jia, hynrei ym pat dei ka bakut.

7 Phin ïohsngew shaphang ki thma bad ki hamsaïa jong ki thma: hynrei wat ïasngewdik. Kine kiei kiei ki dei ban jia, hynrei ym pat dei ka bakut.

8 Kine baroh ki long kum ki jingsuh khun kiba dang sdang.

9 “Ki briew kin kem ïa phi, kin aiti ban pynshitom, bad kin sa pynïap ïa phi. Ki jait bynriew baroh kin isih ïa phi namar jong Nga.

10 Bun ngut kin len ïa la ka niam; kin ïashet kylla bad ïa-isih para ma ki.

11 Kin mih bun ki nongïathuhlypa lamler, bad kin shukor bun ngut.

12 Haduh katta kan jyllei ka jingsniew, ba ka jingieid jong bun ki briew kan pjah.

13 Hynrei uto uba ïaineh haduh ka bakut, un lait im.

14 Ïa kane ka Khubor Babha shaphang ka Hima yn ïalap ha satlak ka pyrthei kum ka sakhi ha ki jait bynriew baroh. Tang hadien kata kan wan ka jingkut.”

15 “Phin sa ïohi ïa ka jingleh sang bashyrkhei ba ka ïeng ha ka jaka kyntang, kumba la kren u nongïathuhlypa Daniel. (Jar uba pule to un sngewthuh!)

16 Kito kiba don ha Judea ki dei ban phet ïap sha ki lum.

17 U briew uba don ha tnum ïing um dei ban pynlut por ban leit shim ei ei napoh ïing.

18 U briew uba don ha lyngkha, um dei ban leit phai sha ïing ban shim ïa la ka jaiñkup.

19 Katno ka jingkordit ha kito ki sngi ïa ki kynthei kiba pun khun bad kiba ai buiñ!

20 To duwai ha u Blei ba kine kiei kiei kin ym jia myntlang ne ha ka sabath!

21 Naba ki jinglanot ha kito ki sngi kin palat liam ïa kano kano naduh basdang ka pyrthei haduh mynta, bad yn ym don shuh kum kine.

22 Lada u Blei Um shym la pynlyngkot ïa kito ki sngi, yn ym don ba lait im. Hynrei na ka bynta ki Balajied jong U, Un pynlyngkot ïa kito ki sngi.

23 “Te lada uno uno u ong ha phi, ‘Ha peit, u Messiïa U don hangne!’ ne ‘U don hangtai!’—wat ngeit ïa u.

24 Naba kin ïapaw byllai ki Messiïa bad ki nongïathuhlypa lamler; kin leh bun ki dak bad ki jingphylla ban shukor, lada lah, wat ïa ki Balajied jong u Blei.

25 Te to da sumar bha! Nga la ïathuh lypa ha phi.

26 “Kumta lada ki briew kin ong ha phi, ‘Hakhmih, U don ha ri kynjah !’—wat leit shata; ne lada ki ong, ‘Hakhmih, U rieh hapoh ïing!’—wat ngeit satia.

27 Naba u Khun u Briew Un wan kum ka leilieh kaba thaba ha ka suiñ bneng na mihngi shaduh sepngi.

28 “Kat haba don ka metïap, ki pukni kin ïalum.”

29 “Hadien ka jingjynjar jong kito ki sngi, ka sngi kan sa dum, u bnai un ym shai shuh, ki khlur kin hap na sahit bneng, bad ki bor ka mariang kin sa kulmar.

30 Nangta ka dak u Khun u Briew kan sa paw ha suiñ; te baroh ki jait briew jong ka pyrthei kin ïaïam haba kin ïohi ïa u Khun u Briew ba U wan ha ki lyoh ka bneng da ka bor bad ka burom bah.

31 Un phah ïa la ki angel da ka jingput turoi bajam, bad kin lum lang ïa ki Balajied jong U na ki sawlyer, na bakut sha bakut ka bneng.”

32 “To u dieng dymbur un ai jinghikai ïa phi: Haba ki tnat jong u ki la jyrngam bad ki la khie lung, bad ki la sdang ban sei sla, phi tip ba ka lyïur ka la jan.

33 Kumjuh haba phi ïohi ïa kine kiei kiei, phin tip ba ka por ka la jan, ha jynkhang.

34 Nga ïathuh ha phi ba kane ka pateng kan ym ïap noh, shuwa ba yn urlong kine kiei kiei.

35 Ka bneng bad ka khyndew kin duh noh, hynrei ki ktien jong Nga kin ym duh noh.”

36 “Ym don ba tip ïa ka sngi ne ka por—lymne ki angel ha bneng, lymne u Khun; U tip tang u Kpa.

37 Ka jingwan u Khun u Briew kan syrïem ïa kaba la jia ha ka por u Noa.

38 Kumba ha ki sngi shuwa ka jingshlei, ki briew ki la ïabam ïadih, ki la ïapoikha ïapoiman, top haduh ka sngi ba u Noa u la leit rung hapoh ka ïinglieng—

39 bad kim shym la tip, tat haduh ynda la wan ka jingshlei bad ka la rong noh ïa ki baroh—kumta kan sa jia haba wan u Khun u Briew.

40 “Ha kata ka por kin don ar ngut ha lyngkha: ïa uwei yn shim noh, ïa uwei pat yn ieh noh.

41 Kin don ar ngut ki kynthei kiba tylliat kew: ïa kawei yn shim noh ïa kawei pat yn ieh noh.

42 Te to sharai naba phim tip ha kano ka sngi u Trai jong phi Un wan.

43 Kynmaw ïa kane: lada u trai ïing u la tip ïa ka por ba u nongtuh un wan, un jin da la ap, bad un ym da la shah ïa u nongtuh ban prong hapoh ïing.

44 Na kane ka daw, phi ruh phi dei ban long barabor kiba la khreh lypa, namar u Khun u Briew Un wan haba phim khmih lynti satia.”

45 “Haba kumta, uei u shakri u bahusiar bad uba lah ban shaniah? Dei uta ïa uba u trai ïing u la thung rangbah halor ka ïing ka sem, ban peit ïa ka bam ka sa ha ka por ka babiang.

46 Suk uta u shakri, lada lap ba u dang leh ïa la ka kamram, haba u kynrad jong u u wan phai!

47 Da shisha Nga ong ha phi, uta u kynrad un thung rangbah ïa uta u shakri halor ka spah ka hajar jong u baroh.

48 Hynrei lada uta u long u shakri basniew, un pyrkhat, ‘U kynrad jong nga u dang slem ban wan,’

49 bad un sdang ban shoh ïa la ki para shakri, bad ban ïabam ïadih bad ki buaid.

50 U kynrad uta u shakri un wan phai ha ka sngi ba um khmih lynti bad ha ka por ba um tip.

51 Te u kynrad un bidai ïa u bad un phah ïa u lang bad ki arsap. Hangta un lynñiar bad un kyriat bniat.”