Matheus Lynnong 20

​

1 “Ka hima bneng ka synrïem ïa u trai brisoh waiñ uba la mih dang step phyrngap ban wer nongtrei ha ka brisoh jong u.

2 Ynda u la ïakut bad ki nongbylla shi denar shi sngi, u la phah trei ïa ki ha ka brisoh.

3 U la mih biang kumba khyndai baje bad u la ïohi ïa ki briew kiba ïengkai ha ïew.

4 Te u la ong ha ki, ‘Phi ruh, leit trei ha ka brisoh waiñ, bad ngan siew ïa phi katba dei hok.’

5 Kumta ki la leit. U la leh kumjuh ha ka por khat-ar baje bad lai baje.

6 Haba la jan san baje, u la leit biang sha ïew bad u la shem ïa kiwei pat ki briew kiba ïaïengkai hangta. ‘Balei phi ïapynlut kai ïa ka por hangne baroh shisngi?’ u la kylli ïa ki.

7 Ki la jubab, ‘Bym don ba wer bylla ïa ngi.’ Te u la ong, ‘Lada kumta, khie ma phi ruh ban leit trei ha ka brisoh waiñ.’

8 Ynda la janmiet, u trai u la ong ha u sordar jong u, ‘Khie khot ïa ki nongbylla bad siew bainong ïa ki, sdang na kiba la wer khatduh haduh ki banyngkong.”

9 Ïa ki briew kiba la trei naduh san baje la siew bainong kat ka dor shisngi.

10 Kumta haba la siew ïa kiba la wer nyngkong, ki la tharai ban ïoh kham bun—hynrei ki ruh ki la ïoh kat ka dor shisngi.

11 Ki la shim ïa ka bainong bad ki la sdang ban khñium pyrshah ïa u trai.

12 Ki la ong, ‘Kine ki briew ïa kiba la wer khatduh, ki la trei tang shi kynta; ngi pat ngi la trei baroh shisngi bad ngi la shah ïa ka shit ka syang—pynban me la siew ïa ki kumba siew ïa ngi !’

13 ‘Sngap, ko lok,’ u la phai ktien u trai ha uwei na ki. ‘Ngam shym leh klop ïa phi. Phi la ïakut ne em ïa ka bainong shisngi?

14 Te shim ïa la ka bainong, bad khie leit sha ïing. Lada nga kwah ban ai ïa une u bakhatduh kumba nga ai ïa phi,

15 hato ngam don hok ban leh katba nga mon ïa la ka pisa? Ne phi bishni tang namarba nga long u bakylluid mynsiem?”

16 Bad u Jisu U la pynwai, “Kumta ki bakhatduh kin long nyngkong bad ki banyngkong kin long khatduh.”

17 Haba u Jisu U la leit kiew sha Jerusalem, U la khot kyrpang ïa ki khat-ar ngut ki synran kiba dang ïaid bad U la kren jar jar ha ki:

18 “Mynta ngi dang kiew sha Jerusalem. Hangta ïa u Khun u Briew yn sa aiti ha ki rangbah lyngdoh bad ki stad-aiñ. Kin sa pynrem ïa U ban ïap;

19 kin sa aiti ïa U sha ki jentil kiban rkhie beiñ ïa U, kin sympat ïa U bad kin sahnarphna ïa U. Hynrei ha ka sngi ka balai Un sa mihpat.”

20 Ka kmie ki khun u Zebedi ka la wan sha u Jisu bad la ki khun, ka la dem ngon hakhmat jong U, bad ka la kyrpad ei ei na U.

21 “Aïu phi kwah?” u Jisu U la kylli ïa ka. Ka la jubab, “To kular ha kine ki khun jong nga ar ngut kin shong uwei ha kamon bad uwei ha kadiang jong Me ha ka Hima jong Me.”

22 Phim tip aïu phi pan,” u Jisu U la jubab ïa ka. “Phi lah mo ban dih ïa ka khuri ba Nga dei ban dih?” Ki la ong, “Ngi lah!”

23 “Ñiuma, phin sa dih ïa ka khuri kumba dih ma Nga hynrei ym dei ma Nga Uba ai jaka sha kamon ne sha kadiang. Dei u Kpa jong Nga Uban ai jaka ïa kiba U la mang.”

24 Haba kiwei pat ki shiphew ngut ki synran ki la ïohsngew shaphang kane, ki la ingkhong ïa ki ar ngut shipara.

25 Kumta u Jisu U la khot lang ïa ki baroh bad U la ong: “Phi tip kumno, hapdeng ki ’riewpyrthei, kito kiba don ka bor synshar ki pynsngew ïa la ka bor halor jong ki, bad ki bakhraw batri ki leh traikhlieh halor jong ki.

26 Hynrei kane kam dei ban long hapdeng jong phi. Lada uno uno u kwah ban long rangbah duh, u dei ban long u shakri ïa kiwei pat.

27 Lada uno uno u kwah ban long u khlieh duh, u dei ban shakri ïa baroh.

28 Wat u Khun u Briew Um shym la wan ba yn dup shakri ïa U; U la wan ban shakri, bad ban ai ïa la ka jingim ban siewspah ïa baroh.”

29 Katba ki dang mih na Jerikho, u paidbah byllien u la bud ïa u Jisu.

30 Ar ngut ki matlah kiba ïashong harud surok ki la ïohsngew ba u Jisu U ïaid lynti nangta, kumta ki la sdang ban pyrta. “Ko Khun u Dabid! To isynei ïa ngi, ko Kynrad!”

31 Ki paidbah ki la kynhied ïa ki ba kin sngap jar. Hynrei ki la nang kham pyrta jam pynban. “Ko Khun u Dabid! To isynei ïa ngi, ko Kynrad!”

32 U Jisu U la sangeh bad U la khot ïa ki. “Aïu phi kwah ba Ngan leh ïa phi?” U la kylli.

33 Ki la jubab, “Ko Kynrad, to pynpeit ïa ki khmat jong ngi!” 34U Jisu U la isynei ïa ki bad U la ktah ïa ki khmat jong ki; markumta hi ki la imat, bad ki la ïabud ïa U.