Matheus Lynnong 2

​

1 La kha ïa u Jisu ha ka shnong Bethlehem ha ri Judea, mynba la long syiem u Herod. Ym slem hadien, katto katne ki stad-khlur na ri Mihngi ki la wan sha Jerusalem, 

2 bad ki la ïakylli: “Hangno la kha ïa u Khunlung Uban long syiem ki Ju? Ngi la ïohi ïa u khlur jong U ha mihngi, bad ngi la wan ban mane ïa U.” 
3 Haba ïohsngew ïa kata, u syiem Herod u la pisa jingmut, bad ki nong Jerusalem ruh kumjuh. 
4 U la khot lang ïa ki rangbah lyngdoh bad ki stad-aiñ, bad u la tohkit na ki hangno yn kha ïa u Khrist. 
5 “Ha ka shnong Bethlehem, ha Judea,” ki la jubab, “U nongïathuhlypa u la thoh kumne:
6 ‘Ma pha, ko Bethlehem, ri Judea, pham long da lei lei ka barit tam hapdeng ki bakhraw batri Juda; naba na pha Un mih u nongsynshar Uban ïalam ïa u paid Israel jong Nga.’ ”
7 Kumta u Herod u la khot jar jar ïa ki ’riewstad na mihngi bad u la kylli bniah na ki ïa ka por ba uta u khlur u la paw ha ki. 
8 Nangta u la phah ïa ki sha Bethlehem da kaba bthah kumne: “To khie leit wad bniah ïa u Khunlung, bad ynda phi shem ïa U sa pyntip lem ïa nga, ba nga ruh ngan dup leit ban mane ïa U.” 
9 Ynda kumta ki la mih. Ha lynti ki ïohi ïa u khlur—u juh uba ki la ïohi ha mihngi ba u ïaid hakhmat jong ki haduh ban un da poi bad u sangeh halor ka jaka ha kaba u Khunlung u don. 
10 Ki la kmen shikatdei haba ki la ïohi ïa u khlur. 
11 Ki la rung hapoh ïing bad ki la lap ïa u Khunlung bad ka kmie jong U ka Maria. Ki la dem ngon bad ki la mane ïa U; nangta ki la loit ïa la ki song bad ki la tyrwa ha U ïa ki jynai sngewbha: ka ksiar, ka jyniwbih, bad ka mir.
12 La maham ïa ki ha ka jingphohsniew ban ym leit phai sha u Herod; kumta ki la leit noh sha la ka ri da kawei pat ka lynti
13 Ynda ki ’riewstad ki la mih, u angel u Trai u la paw ha ka jingphohsniew ha u Joseph bad u la ong: “Khie, shim ïa u Khunlung bad ka kmie jong U bad to phet sha ri Ijipt, bad to sah hangta haduh ba ngan da ong ïa phi. U Herod u wad ïa u Khunlung ban pynïap ïa U.” 
14 Kumta u Joseph u la khie joit, u la shim ïa u Khunlung bad ka kmie jong U, bad shimiet shimiet u la phet sha Ijipt, 
15 bad u la sah hangta haduh ka jingïap u Herod. La leh ïa kane ban pyndep ïa kaba u Trai U la kren da u nongïathuhlypa, “Nga la khot ïa u Khun jong Nga na Ijipt.”
16 Ynda u Herod u la ïohi ba ki ’riewstad na mihngi ki la shukor ïa u, u la ingkhong khait. U la phah pynïap ha Bethlehem bad ha ki shnong kiba markhap ïa ki khun shynrang baroh kiba naduh ar snem shapoh—katkum ka por ba la ïathuh ha u da kita ki stad-khlur. 
17 Ha kane ka rukom la pyndep ïa kaba u Jeremiïa u la ïathuh lypa. 
18 “La ïohsngew ka sur ha Rama, ka sur jingïam briew bad jinglynñiar bakhraw. Ka Rakhel ka ïam na ka bynta la ki khun; ka ïam bad kam treh en, naba ki la ïap baroh.
19 Ynda u Herod u la ïap, u angel u Trai u la paw ha u Joseph ha ka jingphohsniew, ha Ijipt, 
20 bad u la ong: “Khie joit, to shim ïa u Khunlung bad ka kmie jong U, bad leit phai biang sha ri Israel, namar kito kiba la wad ban pynïap ïa u Khunlung ki la ïap.” 
21 Kumta u Joseph u la shim ïa u Khunlung bad ka kmie jong U bad u la leit phai biang sha ri Israel.
22 Haba u la ïohsngew ba u Arkhelaus u la long syiem ha Judea, ha ka jaka u kpa jong u, u Herod, u Joseph u la tieng ban leit shata. Ynda la bthah shuh ïa u ha ka jingphohsniew, u la leit noh sha jylla Galilea 
23 bad u la shong shnong ha Nazareth. La leh ïa kane ban pynurlong ïa kaba ki nongïathuhlypa ki la ong: “Yn khot ïa U, u nong Nazareth.”