Matheus Lynnong 18

​

1 Ha kata ka por ki synran ki la wan sha u Jisu, ki la kylli, “Uei u bakhraw tam ha ka Hima bneng?”

2 U Jisu U la khot ïa uwei u khynnah bad U la pynïeng ïa u hakhmat jong ki,

3 U da ong: “To kynmaw ïa kane! Lymda phi kylla long kum ki khynnah rit, phin ym ïoh rung ha ka hima bneng.

4 U ba khraw tam ha ka hima bneng u long uta uba pynrit ïa lade kum une u khynnah.

5 Jar uba pdiang sngewbha ïa kum une u khynnah ha ka kyrteng jong Nga, u pdiang ïa Nga.”

6 “Shaphang kine ki khynnah rit kiba ngeit ha Nga—kan kham bha ïa u briew ban teh da u maw tylliat ha ka ryndang jong u bad ban pynnoh hapoh duriaw, ban ïa kaba un hikai bakla ïa uwei na kine.

7 Kordit ïa ka pyrthei namar ki jingpynthut! Ha ka jingshisha ym lah lait na ki jingpynthut—hynrei kordit ïa uto na uba kata ka jingpynthut ka wan!”

8 “Lada ka kti ne ka kjat jong phi ka pynleh pop ïa phi, to ot noh ïa ka bad to pret noh! Ka kham bha ïa phi ban rung ha ka jingim khlem ka kti ne ka kjat, ban ïa kaba don ar tylli ki kti bad ki kjat ban shah bret ha ka ding bymjulip.

9 Lada ka khmat jong phi ka pynleh pop ïa phi, to khlong noh ïa ka bad to pret noh! Ka kham bha ïa phi ba phin rung ha ka jingim tang shiliang ka khmat, ban ïa kaba don ar tylli ki khmat ban shah bret sha ka ding dujok.”

10 “Peit ban ym ibeiñ ïa uwei na kine ki barit.

11 Nga ong ha phi, ki angel jong ki ha bneng ki ïohi barabor ïa ka khmat u Kpa jong Nga Uba ha bneng.

12 “Kumno phi pyrkhat shaphang kane: Uwei u briew u don shispah tylli ki langbrot, bad kawei na ki ka jah; hato un ym ieh noh ïa ki khyndaiphew khyndai ha lum ban leit wad ïa kaba la sakma?

13 Lada u lap ïa ka, Nga ong ha phi, un kham sngewkmen ïa kane kawei ban ïa ki khyndaiphew khyndai kibym shym sakma.

14 Ha kajuh ka rukom u Kpa jong phi uba ha bneng Um kwah ba wat iwei na kine ki barit in jot noh.”

15 “Lada u hynmen u para jong phi u leh bymdei, khie leit sneng ïa u, hynrei to leh jar jar tang para ma phi. Lada u shah shkor ïa phi, phi la pynbha ïa la u hynmen u para.

16 Hynrei lada um treh sngap ïa phi, to ïalam uwei ne ar ngut ki briew lem bad phi, ba ka sakhi jong ki ar ne lai ngut kan kyrshan ïa ka jingkynnoh jong phi.

17 Hynrei lada um treh sngap ïa ki, te ïathuh ïa ka kam baroh ha ka Balang. Bad lada um sngap ïa ka Balang ruh, to leh ïa u kum ïa u jentil ne u nongkhrong khajna.

18 “Nga ong ha phi: kat kaba phin teh ha ka pyrthei, la lah teh ruh ha bneng; kat kaba phin pyllait ha ka pyrthei, la lah pyllait ha bneng ruh.”

19 “Sa kane ruh Nga ong ha phi: lada ar ngut na phi ha kane ka pyrthei, phi ïahap jingmut lang ban pan ei ei, u Kpa jong Nga Uba ha bneng Un ai ha phi.

20 Haba ar ne lai ngut ki ïadon lang ha ka kyrteng jong Nga, Nga Nga don ryngkat bad ki.”

21 U Petrus u la wan sha u Jisu bad u la kylli, “Ko Kynrad, haduh katno sien u hynmen u para jong nga un leh bymdei ïa nga, bad nga ngan map ïa u? Haduh hynñiew sien?”

22 “Em, ym dei tang hynñiew sien,” la phai ktien u Jisu, “hynrei haduh hynñiewphew sien hynñiew.

23 Namar ka Hima bneng ka long kum u syiem uba la rai ban shim jingkheiñ jingdiah na ki shakri jong u.

24 U tang shu sdang ban leh kumta, la wan ïalam sha u ïa uwei uba kit ram na u da ki phew hajar tyngka.

25 Um don lad ban siew ïa ka ram jong u, kumta u kynrad jong u u la hukum ba yn die mraw ïa u bad tnga bad khun, bad baroh katba u don, ban dup siew ïa ka ram.

26 U shakri u la dem khrup hakhmat u kynrad jong u, bad u la kyrpad, ‘Ai por ïa nga, bad ngan siew dep ïa phi!’

27 U kynrad u la sngewsynei ïa u, u la map ïa ka ram bad u la pyllait ïa u.

28 “Uta u briew u tang shu mih, u la ïakynduh ïa uwei na ki para shakri jong u uba la kit ram ïa u khyndiat tyngka. U la shkiah ïa u bad u la sdang ban khñiot ïa u. “Siew noh ïa kaba me dei ban siew!” u la ong.

29 Uta u para shakri u la nguh la dem ïa u, bad u la kyrpad, ‘Ai por seh ïa nga, bad ngan siewdep ïa phi!’

30 U pat um patiaw; pynban u la phah set byndi ïa u haduh ba un da siew ïa ka ram.

31 Haba kiwei pat ki shakri ki la ïohi ïa kata kaba la jia, ki la sngewsih shibun, bad ki la leit ïathuh ha u kynrad nadong shadong.

32 Kumta u kynrad u la khot ïa uta u shakri. ‘Me u shakri bymman!’ u la ong. ‘Nga la map ïa ka ram jong me baroh, namarba me la kyrpad ïa nga.

33 Hato mem shym la dei ban isynei ïa la u para shakri kumba nga la leh isynei ïa me.

34 U kynrad u la ingkhong khait, bad u la phah pynsasti ïa u haduh ba un da siew dep ïa ka ram baroh.

35 “ Kumjuh u Kpa jong Nga Uba ha bneng Un leh ïa phi lada ma phi baroh phim map naduh ka dohnud ïa la u hynmen u para.”