Matheus Lynnong 17

​

1 Hynriew sngi hadien, u Jisu U la wer ïa u Petrus, u Jakob bad u para jong u u Ïoannis, bad U la ïalam kyrpang ïa ki halor u lum bajrong.

2 Katba ki dang ïapeit, U la kylla dur hakhmat jong ki: ka khmat jong U ka la tyngshaiñ kum ka sngi bad ki jaiñ jong U ki la lieh phalang.

3 Kyndit kyndit ki la ïohi ïa u Moses bad u Elija ba ki ïakren bad u Jisu.

4 Te u Petrus u la ong ha u Jisu, “Ko Kynrad, ka bha ba ngin sah hangne; lada Me kwah, ngan thaw hangne lai tylli ki ïing trep, kawei ïa Me, kawei ïa u Moses, bad kawei ïa u Elija.”

5 Katba U dang kren, u lyoh u baphyrnai u la tap ïa ki, bad kawei ka sur na u lyoh ka la ong: “Une U long u Khun ba-ieid jong Nga, ïa Uba Nga sngewbha eh—to sngap ïa U!”

6 Haba ki synran ki la ïohsngew ïa kata ka sur ki la tieng her, bad ki la dem pyllup ha khyndew.

7 U Jisu U la wan bad U la ktah ïa ki. “To ïeng joit,” U la ong, “Wat sheptieng!”

8 Kumta ki la khmied bad ki la ïohi ba ym don mano mano lait tang u Jisu.

9 Katba ki dang wan hiar na u lum, u Jisu U la bidong ïa ki. “Wat ïathuh hano hano ïa kane ka jingïohi tat ynda u Khun u Briew U la mihpat na ka jingïap.”

10 Ki synran ki la kylli ïa u Jisu, “Balei ki stad-aiñ ki ong ba u Elija u dei ban wan shuwa?”

11 “U Elija u dei keiñ ban wan shuwa,” la jubab u Jisu, “bad un pynkhreh ïa kiei kiei baroh.

12 Hynrei Nga ong ha phi: u Elija u la lah wan, bad ki briew kim shym ithuh ïa u, hynrei ki la leh ïa u katba ki kwah. Ha kajuh ka rukom ïa u Khun u Briew yn sa lehbeiñ da ki.”

13 Ki synran ki la sngewthuh ba U la kren ha ki shaphang u Ïoannis Baptist.

14 Haba ki la poi hajan u paidbah, la wan uwei u briew sha u Jisu, u la dem hakhmat jong U,

15 bad u la ong, “Ko Kynrad, to isynei ïa u khun jong nga. U pang bhur, bad u khie ring jur haduh katta katta ba u kyllon bunsien ha ka ding ne ka um.

16 Nga la wanlam ïa u sha ki synran jong Me, hynrei kim lah ban pynkoit ïa u.”

17 U Jisu U la jubab, “Shisha phi long ka pateng bynriew bymngeit bad bakynriang! Sa katno Ngan im bad phi, bad Nga dei ban ïaishah ïa phi? Wan ïalam ïa u khynnah shane sha Nga!”

18 U Jisu U la jubab, “Shisha phi long ka pateng bynriew bymngeit bad bakynriang! Sa katno Ngan im bad phi, bad Nga dei ban ïaishah ïa phi? Wan ïalam ïa u khynnah shane sha Nga!”

19 Ynda kumta ki synran ki la wan sha u Jisu jar jar bad ki la kylli ïa U, “Balei ma ngi ngim shym la lah ban beh noh ïa uta u ksuid?”

20 Dei namarba phi duna jingngeit,” la jubab u Jisu. “To kynmaw ïa kane! Lada phi don ka jingngeit ka baheh kat u symbai sinapa, phi lah ban ong ha une u lum, ‘Kynriah nangne shatai!’ bad un kynriah. Bad yn ym don ei ei kaba phin ym lah.

21 Hynrei ïa kane ka jait ksuid lah ban ben tang da ka jingduwai bad ka jingshah jingit.”

22 Haba ki synran ki la ïakynduh lang ha Galilea, u Jisu U la ong ha ki: “Ïa u Khun u Briew yn sa aiti ha ki briew

23 kiban pynïap ïa U; hynrei lai sngi hadien Un sa mihpat.” Ki synran ki la leh sngewsih.

24 Haba u Jisu bad ki synran jong U ki la poi sha Kapernaum, ki nonglum ïa u synñiang Tempyl ki la wan sha u Petrus bad ki la kylli, “U Nonghikai jong phi U ju ai ïa u synñiang Tempyl?”

25 “Hooid keiñ,” u Petrus u la jubab. Ynda u Petrus u la rung hapoh ïing, u Jisu U la kren nyngkong: “Ko Simon, me pyrkhat kumno? Mano ba siew khajna ne ai musur ha ki syiem kane ka pyrthei? Ki trai shnong ne ki nongwei?”

26 “Ki nongwei,” la jubab u Petrus. “Haba kumta,” la phai ktien u Jisu, “ka mut ba ki trai shnong ki lait ban siew.

27 Hynrei ngim kwah ban pynthut ïa ki. Kumta khie sha ka duriaw ban khwai; kynjut ïa ka dohkha ba phi ngat nyngkong, pied ïa ka shyntur jong ka bad phin lap ïa ka shekel; shim ïa ka, bad leit ai ha ki nonglum synñiang na ka bynta jong Nga bad jong me.”