Matheus Lynnong 16

​

1 Ki Pharisi bad ki Sadusi ki la wan sha u Jisu. Ki la kwah ban riam ïa U, kumta ki la kyrpad ïa U ban leh kam phylla ban pyni ïa ka jingmynjur u Blei.

2 Hynrei u Jisu U la jubab: “Haba ka sngi ka sep phi ong ‘Kan rang, naba ka suiñ bneng ka saw.’

3 Mynstep pat phi ong, ‘Kan sa slap namar ka suiñ bneng ka sawjngut.’ Phi lah ban batai ïa ki dak ka suiñ bneng, hynrei phim nang ban batai ïa ki dak jong ki por ki ïá!

4 Kane ka jait bynriew bymman bad khlem blei ka wad ïa ka dak ka shin, hynrei yn ym ai dak ai shin ei ei lait tang ka dak u Jona!” Mar kumta U la phai wak bad U la leit noh.

5 Haba ki synran ki la jam sha shiliang ka duriaw, ki la klet ban rah kpu.

6 U Jisu U la ong ha ki, “To da sumar bad to kiar na u thiat jong ki Pharisi bad ki Sadusi,”

7 Ki la sdang ban ïapyni para ma ki, “U ong kumne namarba ngim shym rah kpu ei ei!”

8 U Jisu U la tip aïu ki ïakren, kumta U la kylli ïa ki: “Balei phi ïasaid thma hana ym don kpu ei ei? Phi kiba rit jingngeit!

9 Phim pat sngewthuh? Phim kynmaw mynba nga la kdiah ïa ki san tylli ki kpu na ka bynta san hajar ngut ki briew? Katno shang phi la lum?

10 Bad shaphang ki hynñiew tylli ki kpu na ka bynta ki saw hajar ngut ki briew? Katno shang phi la khar?

11 Kumno phim pat pei phang ba Ngam shym kren satia shaphang u kpu, hynrei ba Nga maham ïa phi ban husiar na u thiat jong ki Pharisi bad ki Sadusi?”

12 Te ki synran ki la sngewthuh ba Um shym ïathuh ïa ki ban kiar na u thiat kpu, hynrei na ka jinghikai ki Pharisi bad ki Sadusi.

13 U Jisu U la leit sha ki shnong sawdong ka Kaisarea Philippi, bad U la kylli ïa la ki synran, “Ïa u Khun u Briew ki ong U dei Uei?”

14 ”Don kiba ong, u Ïoannis Baptist” ki la jubab. “Kiwei pat, u Elija, sa kiwei pat, u Jeremiïa ne uno uno u nongïathuhlypa.”

15 “Phi pat?” U la kylli ïa ki “Phi ong Nga long Uei?”

16 U Simon Petrus u la jubab, “Me long u Khrist, u Khun u Blei ba-im!”

17 U Jisu U la phai ktien: “Suk ma phi ko Simon, khun u Jona! Ym dei u briew uba la pynpaw ha phi ïa kane ka jingshisha, hynrei u Kpa jong Nga Uba ha bneng keiñ.

18 Te kumta Nga ong ha phi: phi long u Mawsiang (‘U Petrus’) bad halor une u Mawsiang Ngan tei ïa ka balang jong Nga, bad ki bor ka dujok kin ym lah ïa ka.

19 Ngan ai ha phi ïa ki shabi jong ka hima bneng: kat ïa kaba phin teh ha ka pyrthei, la lah teh ha bneng ruh; bad kat ïa kaba phin law ha ka pyrthei, la lah law ha bneng ruh.”

20 Te u Jisu U la mana tyngeh ïa la ki synran ba kin ym ïathuh briew ba U long u Khrist.

21 Naduh kata ka por u Jisu U la sdang ban kren shai ha ki synran lajong: “Nga dei ban leit sha Jerusalem bad ban shah shitom shibun na ki tymmen ki san, ki rangbah lyngdoh, bad ki stad-aiñ. Ngan shah pynïap, bad ha ka sngi ka balai yn sa pynmihpat ïa Nga.”

22 U Petrus u la khot ïa U sharud bad u la pyrshang ban ïa pyni nia bad U. “Da lei lei ruh em, ko Kynrad!” u la ong. “Kane kam dei ban jia satia ïa Me!”

23 U Jisu U la phai sha u Petrus, U ong, “Jngai bak na Nga, ko soitan! Me long u diengpynkiang ïa Nga. Namar me pyrkhat kum u briew, ym kumba pyrkhat u Blei!”

24 Te U Jisu U la ong ha ki synran jong U: “Lada uno uno u kwah ban bud ïa Nga, to un len ïa lade, un bah ïa la ka diengphna bad un bud ïa Nga,

25 Naba uta uba kwah ban pynim ïa la ka jingim, un duh noh ïa ka: hynrei uta uba duh noh ïa la ka jingim na ka bynta jong Nga, un shem ïa ka.

26 Kan myntoi aïu ïa u briew lada u ïoh ïa ka pyrthei baroh kawei, hynrei u duh ei ïa la ka jingim? Da ei u briew un ïapeiñ na ka bynta la ka jingim?

27 U Khun u Briew Un sa wan ha ka burom u Kpa jong U bad la ki angel, bad Un ai bainong ha uwei pa uwei katkum ki jingleh jong u.

28 Nga ong ha phi: ba don na kiba ïeng hangne kiban ym mad ïa ka jingïap shuwa ba kin ïohi ïa u Khun u Briew ba U wan ha la ka Hima.”