Matheus Lynnong 15

 

1 Katto katne ngut ki Pharisi bad ki stad-aiñ ki la wan sha u Jisu na Jerusalem bad ki la kylli ïa U:

2 “Balei sha ki synran jong Me ki tamsneng ïa ka dustur jong ki longshuwa? Kim thet ïa la ki kti shuwa ban bam!”

3 U Jisu U phai ktien: “Ma phi pat balei phi tamsneng ïa ka hukum u Blei bad phi bud ïa la ka jinghikai?

4 Naba u Blei U la ong, ‘To burom ïa la u kpa bad ïa la ka kmie, bad jar uba tim ïa la u kpa ne ka kmie u dei ban shah ïap.’

5 Phi pynban phi hikai ba lada u briew u don ei ei kaba u dei ban ïarap ïa la u kpa ne ka kmie, bad u ong pynban, ‘Ïa kane nga la tyrwa ha u Blei,’

6 u lait na kaba ïarap ïa la u kpa ne ka kmie. Da kumne phi pynlehnoh-ei ïa ka ktien u Blei na ka bynta ka dustur hiar pateng jong phi.

7 Arsap! U Isaïa u la kren ïa ka badei shaphang jong phi haba u la ïathuh lypa:

8 ‘Kine ki briew—ong u Blei—ki burom ïa Nga tang da ki rymmiang shyntur, ka dohnud jong ki pat ki jngai na Nga.

9 Ki mane thala ïa Nga,  namar ki hikai ïa ki aiñ thaw briew,  kumba ki  long ki hukum  u Blei!’ ”

10 Nangta u Jisu U la khot ïa u paidbah bad U la ong ha ki: “To sngap ïa Nga, phi baroh, bad to pyrshang ban sngewthuh.

11 Ym dei kata kaba rung ha ka shyntur jong u briew kaba lah ban pyntngit ïa u; hynrei kata kaba mih na ka kaba pyntngit ïa u.

12 Te ki synran ki la wan sha U, ki da ong, “Me tip ba ki Pharisi ki la sngewmong da ki ktien jong Me?”

13 “Man la u dieng ba u Kpa jong Nga Uba ha bneng Um shym la thung, yn jynrat noh,” la jubab u Jisu.

14 “Wat salia shaphang jong ki! Ki long ki bamatlah kiba ïalam ïa ki matlah. Te lada u matlah u ïalam ïa u matlah, baroh ar ngut ki hap ha ka thliew.”

15 U Petrus u la kem ktien, “Ka mut aïu kane ka pharshi?”

16 U Jisu U la jubab ïa ki: “Phi ruh ki baluiñ jingmut kum kiwei pat mo?

17 Phim pat sngewthuh? Kat kaba rung ha ka shyntur u briew ka leit sha ka kpoh, nangta ka mih haba leit rud.

18 Hynrei kat kaba mih na ka shyntur ka wan na ka dohnud; kaba kum kata keiñ kaba pyntngit ïa u briew.

19 Naba na ka dohnud jong u ki mih ki jingpyrkhat ki basniew kiba ïalam ïa u ban pynïap briew, ban klim, ban leh awria, ban tuh, ban shukor, bad ban thadrong.

20 Ki dei kine kiei kiei kiba pyntngit ïa u briew. Hynrei ban bam khlem da thet kti, kam pyntngit ïa u briew.”

21 U Jisu U la leit sha ka thaiñ Tirus bad Sidon.

22 Kawei ka nong Kanaan, kaba la shong ha kata ka thaiñ, ka la wan sha U bad ka la kyrpad, “Ko Kynrad, ko Khun u Dabid, to isynei ïa nga! Ka khun jong nga ka shongksuid bad ka shitom jur.”

23 Hynrei u Jisu Um kren wat shi kyntien ruh. Ki synran ki la wan khroh ïa U, “Phah kan leit noh! Ka shu bud pynsalia ïa ngi!”

24 U Jisu U la jubab, “Ïa Nga la phah tang sha ki langbrot ba la jah ka ïing Israel.”

25 Hangta kata ka kynthei ka la wan shisyndon bad ka la dem khrup ha ki kjat jong U, “Ïarap ïa nga, ko Kynrad!” ka la ong.

26 U Jisu U la jubab, “Kam long ka badei ban shim ïa ka jynbam jong ki khun bad ban bret ha ki ksew ïing,”

27 “Kata kaba dei, ko Kynrad,” ka la phai ktien: “hynrei wat ki ksew ïing ki bam ïa ki lyngkhot lyngkhai kiba hap na ka miej ki kynrad jong ki.”

28 Te U Jisu U la jubab ïa ka: “Kong, shisha phi khraw ka jingngeit! Ïa kaba phi kwah, phin ïoh.” Ha kata hi ka khyllipmat ka khun jong ka ka la koit.

29 U Jisu U la mih na kata ka jaka, bad ynda U la poi harud ka duriaw Galilea U la kiew ha uwei u lum bad U la shong hangta.

30 Bunbah ki paidbah ki la wan rah sha U ïa ki badkoh, ki bamatlah, ki bakhrew, ki bymnang kren, bad bun kiwei de, bad ki la buh ïa ki ha ki kjat u Jisu: bad U la pynkoit ïa ki.

31 Ki briew ki la lyngngoh haba ki la ïohi ba ki bymnang kren ki la kren, ki bakhrew ki la koit; ki badkoh ki la ïaid, bad ki bamatlah ki la imat; bad ki la ïaroh ïa u Blei ki Israel.

32 U Jisu U la khot ïa la ki synran bad U la ong: “Nga sngewsynei ïa kine ki paidbah namar ki la ïadon bad Nga la lai sngi mynta, bad kim don ei ei ban bam, Ngam kwah ban phah jingit ïa ki sha ïing, ïoh kin ïaptyrsaw ha lynti.”

33 Ki synran ki la kylli ïa U, “Katne u paidbah, na-ei ngin ïoh jynbam haban da biang hangne ha ri kynjah?”

34 “Katno tylli ki kpu phi don?” u Jisu U la kylli. “Hynñiew tylli,” ki la jubab, “bad khyndiat ki kharit.”

35 Kumta u Jisu U la phah shong ïa u paidbah ha madan.

36 Nangta U la shim ïa ki hynñiew tylli ki kpu bad ki dohkha. U la ainguh ïa u Blei, U la kdiah ïa ki bad U la ai ha ki synran ban sam ha u paidbah.

37 Baroh ki la bam haban da kdang, bad ki synran ki la khar hynñiew shang ki lyngkhot lyngkhai kiba tam.

38 Ki rangbah kiba ïabam ki la long saw hajar ngut, khlem kheiñ ïa ki kynthei bad ki khynnah.

39 Nangta u Jisu U la phah noh ïa ki paidbah. U kiew ha ka lieng bad U la leit sha ka thaiñ Makadan.