Matheus Lynnong 12

 

1 Ha ka ïá kaba biang, u Jisu U la ïaid lyngba ki lyngkha kew ha ka sngi sabath. Ki synran jong U, ba ki thngan, ki la sdang ban kheit ïa ki tyrjup kew bad ban bam.

2 Haba ki Pharisi ki la ïohi ïa kane, ki la ong ha u Jisu, “Ha peit, ki synran jong Me ki leh ïa kaba ym bit ban leh ha ka sabath!”

3 U Jisu U la phai ktien: “Phim pat ju pule mo aïu u Dabid u la leh mynba ma u bad ki briew jong u ki la thngan?

4 U la leit rung ha ïing u Blei; ma u bad ki briew jong u ki la bam ïa u kpu ba la tyrwa ha u Blei—ka kam kaba ym ju bit mano mano ban leh lait tang ki lyngdoh.

5 Ne phim pat ju pule ha ka Aiñ u Moses kumno ki lyngdoh kiba shakri ha ka Tempyl ki pynkheiñ ïa ka jingshongthait sabath, hynrei kim kit pop ei ei?

6 Nga ong ha phi: Don hangne Uwei Uba kham khraw ban ïa ka Tempyl.

7 Lada phi la peiphang bha ïa ka jingmut jong kane ka jynthoh, ‘Ïa ka jingieid-isynei Nga kwah, ym ïa ki jynkñia,’ phin ym da la pynrem ïa kine ki briew kiba khlem pop.

8 U Khun u Briew U long Kynrad jong ka sabath ruh.”

9 U Jisu U la mih na kata ka jaka bad U la leit sha kawei ka sinakok jong ki.

10 La don hangta u briew uba la ïap-tyrkhong ka kti. Da kaba kwah ban kem daw ïa u Jisu, ki la kylli ïa U, “Bit ban pynkoit ha ka sabath?”

11 U Jisu U la phai ktien: “Tharai lada ka langbrot jong uwei na phi ka liat ha ka thliew ha ka sabath, phin ym leit sei ïa ka? 

12 U briew u kham kor bun shah ban ïa ka langbrot! Kumta ka paw shai ba bit ban leh ka kam babha ha ka sabath.”

13 Nangta U la ong ha uta u briew, “To kner ïa la ka kti.” U la kner ïa ka, bad ka kti ka la koit bha biang kum kawei pat.

14 Markumta ki Pharisi ki la mih noh, bad ki la leit ïasylla ban pynïap ïa u Jisu.

15 U Jisu U la tip shaphang kane, kumta U la leit noh na kata ka jaka. Bun bah ki paidbah ki la bud ïa u Jisu. U la pynkoit ïa ki bapang baroh,

16 bad U la khang ïa ki ban ïathuh hano hano shaphang jong U.

17 Kane ka pyndep ïa kaba u Isaïa u la ïathuh lypa:

18 “Hakhmih u Shakri jong Nga—ong u Trai—uba Nga la jied kyrpang, u ba-ieid jong Nga, ïa uba Nga sngewbha eh, Nga la ai ha u ïa u Mynsiem jong Nga, bad Un pynbna ïa ka hok ka banylla ha ki jentil.

19 Un ym kyrkait ne un ym kyang shla, un ym jam ha ki lynti syngkien.

20 Un ym kdiah ïa u khah uba la kheiñ, yn ym pynlip ïa u ’saisharak ba dang meh ding, haduh ba Un da wanlam ïa ka hok ka sot sha ka jingjop.

21 Ki jentil kin kyrmen ha ka kyrteng jong U.”

22 Te ki la wan rah sha u Jisu ïa uwei u matlah ubym nang kren ba u shongksuid. U Jisu u la pynkoit ïa uta u briew, bad kumta u la lah ban kren bad ban ïohi.

23 Ki paidbah ki la sngewphylla, haduh ba ki la kylli, “U dei ma U u Khun u Dabid?”

24 Ynda ki Pharisi ki la ïohsngew ïa kane, ki la jubab, “U beh noh ïa ki ksuid tang namarba u rangbah jong ki, u Beelzebul, u ai bor ïa U.”

25 U Jisu U la tip aïu ki ïapyrkhat bad U la ong ha ki: “Kano kano ka hima kaba ïapait bad kaba ïaleh makynti paralok, kan ym neh slem. Bad kano kano ka shnong bad ka ïing ka sem kaba ïapait bad kaba ïaleh makynti, kan sa pra.

26 Kumjuh lada ka hima u Soitan ka ïaleh makynti, kane ka mut ba ka ïapait, bad kan sa pra shen shen!

27 Phi kynnoh hana Nga beh noh ïa ki ksuid da ka bor jong u Beelzebul. Ñiuma! Mano ba ai bor ïa ki briew jong phi ban beh noh ïa ki? Ai ma ki kin bishar ïa phi!

28 Em! Dei u Mynsiem u Blei Uba ai bor ïa Nga ban beh noh ïa ki ksuid; kata ka pynsabut ba ka hima u Blei ka la lah wan ha phi.

29 “Ym don uba lah ban rung jubor hapoh ka ïing u bakhlaiñ bad ban knieh ïa ki mar ki mata jong u, lymda u khum shuwa ïa uta u bakhlaiñ; nangta u sa lute ïa ka ïing jong u.

30 “Uta ubym long ha ka liang jong Nga, u pyrshah ïa Nga; bad uta ubym ïasnoh bad Nga, u pynpait pynpra.

31 Na kane ka daw Nga ong ha phi: lah ban map ïa kano kano ka pop bad kano kano ka jingkren beiñ blei jong ki briew; hynrei jar uba kren beiñ pyrshah ïa u Mynsiem Bakhuid, yn ym ïoh jingmap.

32 Jar uba kren pyrshah ïa u Khun u Briew un ïoh jingmap, hynrei jar uba kren pyrshah ïa u Mynsiem Bakhuid, un ym ïoh jingmap mynta ne lawei.”

33 “Na u dieng babha phi ïoh u soh u babha; na u dieng basniew phi ïoh u soh u basniew. Phin ithuh ïa u dieng na u jait soh ba u met.

34 Khun ka ’seiñpuh! Kumno phi lah ban kren kiei kiei ki babha haba phi long ki basniew? Naba ka shyntur ka kren ïa kaba phi ju pyrkhat.

35 U briew u babha, na ka khuiñ babha, u sei ïa kiei kiei ki babha; bad u briew u basniew, na ka khuiñ basniew, u sei ïa kiei kiei ki basniew.

36 “Bad Nga ong ha phi sa kane: ha ka akher ka sngi, u briew un ai jingkheiñ ïa ka ktien per baroh kaba u la kren.

37 Da ki ktien jong phi hi yn sa pynksan ne pynrem ïa phi.”

38 Katto katne ngut ki stad-aiñ bad ki Pharisi ki la kem ktien. “Ko Nonghikai,” ki la ong, “ngi kwah ïohi ka dak na Me.”

39 U Jisu U la phai ktien, “Ki briew mynta ki basniew bad khlem blei shisha! Phi pan ka dak na Nga? Em! Yn ym ai dak lait tang ka dak jong u nongïathuhlypa Jona.

40 Kumba u Jona u la sah lai sngi lai miet ha ka kpoh u ‘kha heh’, kumta ruh u Khun u Briew Un sah lai sngi lai miet hapoh ka khyndew.

41 Ha ka jingbishar, ki nong Nineve kin ïeng ban mudui ïa phi, namar ki la kylla ka bamut ha ka jingïalap u Jona; hynrei hangne phi don Uwei Uba kham khraw ban ïa u Jona!

42 Ha ka jingbishar, ka Syiem na Shathie kan ïeng ban mudui ïa phi, namarba ka la wan na jngai bah ban sngap ïa ka jingstad u Solomon; hynrei hangne don Uwei pat Uba palat ïa u Solomon!”

43 “Haba u mynsiem bymman u mih noh na u briew, u shang kylleng ki rai-eh raidam, u wad jingjahthait bad um shem.

44 Kumta u ong, ‘Ngan leit phai biang sha ka ïing ba nga la ieh noh.’ Kumta u la leit phai, bad u la shem ba ka thylli, ka khuid, bad la sar bha.

45 Kumta u leit bak nangta bad u wan ïalam sa hynñiew ngut ki mynsiem kiba kham sniew ban ïa u, bad ki wan shong duh hangta. Ka jingjot uta u briew ka kham khraw mynta ban ïa kaba mynshuwa. Kan sa urlong kumne ïa ki ’riewsniew jong ka juk mynta.”

46 Katba u Jisu U dang kren ha ki paidbah, la poi ka kmie bad ki hynmen para jong U. Ki la ïeng habar ka ïing, ki kwah ban kren bad U.

47 Uwei na ki paidbah u la ïathuh ïa U, “Ka kmie bad ki hynmen ki para jong phi ki don habar, bad ki kwah ban ïakren bad phi”.

48 U Jisu U la jubab, “Mano ita i mei jong Nga? Mano kita ki hynmen ki para jong Nga?”

49 Te U la kdew ïa la ki synran bad U la ong: “Ha peit! Kine ki long i Mei bad ki hynmen ki para jong Nga!

50 Jar uba leh ïa ka mon jong u Kpa bneng jong Nga, uta keiñ u long u para, ne ka para, ne i Mei jong Nga.”