Matheus Lynnong 10
1 U Jisu U la khot ïa ki khat-ar ngut ki synran jong U bad U la ai ha ki ïa ka bor ban beh noh ïa ki mynsiem bymman bad ban pynkoit baroh ki jingpang bad ki jingkhrew.
2 Kine ki kyrteng jong ki khat-ar ngut ki apostol: nyngkong, u Simon ïa uba la khot Petrus, bad u para jong u u Andreas; u Jakob bad u para jong u u Ïoannis, ki khun u Zebedi;
3 u Philip bad u Bartholomeus; u Thomas bad u Matheus, u nongkhrong khajna; u Jakob, u khun u Alpheus, bad u Thaddeus;
4 u Simon Rangieid ri bad u Judas Iskariot, uba la die noh ïa u Jisu.
5 U Jisu U la phah ïa kine ki khat-ar ngut da kaba bthah kumne: “Wat leit ha kano kano ka thaiñ jentil ne kano kano ka shnong Samaria.
6 Hynrei phin leit wad ïa ki langbrot ba la jah jong ka ïing Israel.
7 Khie leit bad to ïalap, “Ka Hima u Blei ka la jan!”
8 To pynkoit ïa kiba pang, pynim ïa kiba ïap, pynkhuid ïa kiba sa-’ñianglyngkut, beh noh ïa ki ksuid. Phi la ïoh ei, phi ruh to ai ei.
9 Wat thep ksiar, rupa ne pisa tyngka ei ei ha ki saipan jong phi
10 wat rah pla haba leit jingleit, lymne ar tylli ki sopti, lymne ki juti, lymne u diengduh. Naba ka dei ïa u nongtrei ban ïoh la ka bam.
11 “Haba phi poi ha ka nongbah ne nongrit, to wad ïa u briew uba phi lah ban shaniah, bad to sah bad u haduh ba phin da mih na kata ka jaka.
12 Haba phi rung ha kano kano ka ïing to ong, ‘Ka jingsuk ha phi!’
13 Lada kiba ha ïing ki long ki babit, ka jingkyrkhu jong phi kan sah; lada kim long ki babit, ka jingkyrkhu kan phai biang sha phi.
14 Bad lada don ka ïing ne ka shnong kabym pdiang sngewbha ne shah shkor ïa phi, mih noh na kata ka jaka bad kynther ïa u pum pum na ki kjat jong phi.
15 Nga ong ha phi: ha ka akher ka sngi u Blei Un kham leh jem ïa ki Sodom bad ki Gomorra ban ïa ki briew jong kata ka shnong.”
16 “Da kynmaw, Nga phah ïa phi kum ki langbrot hapdeng ki suri. To long namarkata ki basian kum ki bseiñ bad ki baluilui kum ki paro.
17 To sumar, naba yn don ki briew kiban kem ïa phi bad ring sha ka ïing bishar, bad kin sympat ïa phi ha ki sinakok jong ki.
18 Kin sa tian bishar ïa phi hakhmat ki lyngskor bad ki syiem, kumta phin long sakhi ïa Nga ha ki bad ha ki jentil.
19 Haba ki tian bishar ïa phi, wat khuslai aïu ne kumno phin kren; ynda poi kata ka por, yn sa ai ha phi ïa kaei ban kren bad kumno ban kren.
20 Naba ki ktien ba phi kren kin ym long ki jong phi; kin wan na u Mysiem jong u Kpa jong phi Uba kren ha phi.
21 “Ki briew kin aiti ïa la ki para sha ka jingïap, kumjuh ki kpa kin leh ïa la ki khun; ki khun ruh kin ïeng pyrshah ïa la ki kmie ki kpa bad kin phah pynïap ïa ki.
22 Man la u briew un isih ïa phi namar jong Nga, hynrei u briew uba ïaineh haduh bakut, un lait-im.
23 Haba kin lehbeiñ ïa phi ha kawei ka shnong to phet noh sha kawei pat. Nga ong ha phi, phin ym lah pyndep lut ïa ki shnong Israel, shuwa ba Un wan u Khun u Briew.
24 “U synran um long kham khraw ïa u nonghikai jong u; u shakri um long kham khraw ïa u kynrad la jong.
25 U synran u dei ban hun ban kylla long kum u nonghikai jong u, bad u shakri kum u kynrad lajong. Lada ïa u kpa jong ka ïing la khot Beelzebul, katno lei lei kin khot ïa kiba ha ïing ha sem jong u!”
26 “Wat shah pyntieng ha ki briew. Ïa kaba la set, yn sa pynpaw; ïa kaba la buhrieh, yn sa sei madan.
27 Ïa kiba Nga ïathuh ïa phi ha ka badum, to kren ha ka bashai, bad ïa kaba phi ïohsngew ha ka shkor to ïalap nalor ïing.
28 Wat tieng ïa kito kiba pynïap ïa ka met, hynrei kibym lah ban pynïap ïa ka mynsiem; pynban to kham sheptieng ïa u Blei Uba lah ban pynjot bad met bad mynsiem ha dujok.
29 Hato kim die ïa ki sim ïing ar tylli shi pisa? Hynrei wat kawei na ki kam noh kjat ha khyndew khlem da mon u Kpa jong phi.
30 Wat ïa ki shñiuh khlieh jong phi baroh la ñiew.
31 Kumta wat khaw-eit: kham kor ma phi ban ïa ki sim ïing!”
32 Uta uba phla ïa Nga hakhmat ki briew, Nga ruh Ngan phla ïa u hakhmat u Kpa jong Nga Uba ha bneng.
33 Uta pat uban len ïa Nga hakhmat ki briew, Nga ruh Ngan len ïa u hakhmat u Kpa jong Nga Uba ha bneng.”
34 “Wat tharai ba Nga la wanlam ïa ka jingsuk ha ka pyrthei; em, Ngam shym la wanlam ïa ka jingsuk, hynrei ïa ka waitlam.
35 Nga la wan ban pynïashut ïa ki khun shynrang bad la ki kpa, ïa ki khun kynthei bad la ki kmie, ïa ki pyrsa kurim bad la ki kiaw kurim.
36 Ki nongshun ki basniew tam jong u briew kin long kiba ha ïing ha sem jong u.
37 “Uta uba kham ieid ïa la u kpa ne la kmie ban ïa Nga, um dawa ban long u jong Nga. Uta uba kham ieid ïa la u khun ne ka khun ban ïa Nga, um dawa ban long u jong Nga.
38 Uta ubym bah ïa la ka diengphna bad ubym bud ïa Nga, um dawa ban long u jong Nga.
39 Jar uba tyngkai ïa la ka jingim, un duh ïa ka; jar uba pha ïa la ka jingim na ka bynta jong Nga, un tyngkai ïa ka.”
40 “Uta uba pdiang ïa phi, u pdiang ïa Nga; bad uta uba pdiang ïa Nga, u pdiang ïa Uta Uba la phah ïa Nga.
41 Uta uba pdiang ïa u nonglam ktien u Blei namarba u long u nonglam ktien u Blei, un ïoh ka bainong jong u nonglam ktien u Blei. Uta pat uba pdiang ïa u ’riewhok namarba u long u ’riewhok, un ïoh ka bainong jong u ’riewhok.
42 Uta uba pdiang ïa u nonglam ktien u Blei namarba u long u nonglam ktien u Blei, un ïoh ka bainong jong u nonglam ktien u Blei. Uta pat uba pdiang ïa u ’riewhok namarba u long u ’riewhok, un ïoh ka bainong jong u ’riewhok.