Matheus Lynnong 1

​

1 Ka kitab jinghiar pateng jong u Jisu Khrist, u khun u Dabid, u khun u Abraham.
2 U Abraham u la long u kpa u Isaak, u Isaak u kpa u Jakob, u Jakob pat u la long u kpa u Juda bad jong ki hynmen ki para jong u. 
3 U Juda u la long u kpa u Peres bad u Zera na ka Tamar. U Peres u la long u kpa u Hesron, u Hesron pat jong u Ram.
4 U Ram pat u la long u kpa u Amminadab, u Amminadab jong u Nahshon, u Nahshon pat jong u Salmon. 
5 U Salmon u la long u kpa u Boaz na ka Rahab, u Boaz pat jong u Obed na ka Ruth. U Obed u la long u kpa u Jesse, 
6 u Jesse pat jong u Dabid syiem. U Dabid u la long u kpa u Solomon, na ka kmie kaba la long ka tnga u Uria
7 U Solomon pat u la long u kpa u Rehoboam, u Rehoboam u kpa u Abija, u Abija pat jong u Asa. 
8 U Asa u la long u kpa u Jehoshaphat, u Jehoshaphat jong u Joram, u Joram pat jong u Ussia. 
9 U Ussia u la long u kpa u Jotham, u Jotham jong u Ahas, u Ahas pat jong u Hezekia. 
10 U Hezekia u la long u kpa u Manasse, u Manasse jong u Amon, u Amon pat jong u Josia. 
11 U Josia u la long u kpa u Jekhonia bad jong ki hynmen para jong u ha ka jingring mraw sha Babilon. 
12 Hadien ka jingring mraw sha Babilon, u Jekhonia u la long u kpa u Shealtiel, u Shealtiel u kpa jong u Zerubbabel, 
13 u Zerrubbabel u la long u kpa u Abiud, u Abiud jong u Eliakim, u Eliakim pat jong u Asor. 
14 U Asor u la long u kpa jong u Zadok, u Zadok jong u Akhim, u Akhim pat jong u Eliud. 
15 U Eliud u la long u kpa u Eleasar, u Eleasar jong u Matthan, u Matthan pat jong u Jakob. 
16 U Jakob u la long u kpa jong u Joseph, u tnga ka Maria, na kaba la kha ïa u Jisu, ïa uba la khot u Khrist.
17 Te kumta la don khatsaw pateng naduh u Abraham haduh u Dabid; khatsaw pateng na u Dabid haduh ka jingring mraw sha Babilon; bad sa khatsaw pateng naduh kata ka por haduh ka jingkha ïa u Khrist.
18 Ka jingkha ïa u Jisu Khrist ka long kumne. Ka kmie jong U ka Maria ka la ïateh ktien bad u Joseph, hynrei shuwa ba kin ïapoi, la shem ba ka la pun na u Mynsiem Bakhuid. 
19 Kumta u Joseph, u tnga jong ka, ba u long u bahok bad um kwah ban thadrong ïa ka, u la mut ban pyllait noh ïa ka jar jar. 
20 Hynrei katba u dang pyrkhat shaphang kane, u angel u Trai u la paw ha u ha ka jingphohsniew bad u la ong: “Ko Joseph, ko khun u Dabid, wat khaw-eit ban shim tnga ïa ka Maria. Naba Ita Iba ka la seng I long na u Mynsiem Bakhuid. 
21 Kan kha u khun bad phin khot kyrteng Jisu ïa U—namar Un pynim ïa la ki paid na ki pop jong ki.”
22 Kane baroh ka la jia ba yn pyndep ïa kaba u Trai U la lah kren da u nongïathuhlypa:  
23 “Ka theisotti kan sa pun khun bad kan sa kha ïa u khun, bad yn khot ïa u, Emanuel” (kaba mut, ‘U Blei U don bad ngi’).
24 Kumta haba u Joseph u la kyndit na bathiah, u la leh kumba u angel u Trai u la bthah ïa u, bad u la shim tnga ïa ka Maria. 
25 Hynrei um shym la ïapoi bad ka shuwa ba kan kha ïa u khun jong ka. Bad u Joseph u la ai kyrteng ïa U, Jisu.