Markus Lynnong 5

 

1 Kumta ki la poi sha ki thaiñ Gadara, sha shiliang ka Pung Galilea.

2 U Jisu, U tang shu hiar na ka lieng, U la ïakynduh ïa u briew uba la mih na ki krem lum jyntep.

3 Une u briew u la shongksuid bad u la shong hapdeng ki jyntep. Ym don ba lah ban khum shuh ïa u wat da ki kynjri

4 Bunsien la teh ïa u bad kti bad kjat, hynrei u la bthat ïa ki kynjri, bad u la pynkheiñ ïa ki narkjat. Ym don ba lah ïa U!

5 Bad sngi bad miet u shang kylleng ki jyntep bad ki lum, u kyrkait bad u tar ïa lade da ki maw.

6 U la long kham pajih haba u la ïohi ïa u Jisu; kumta u la mareh, u la dem khohsiew hakhmat jong U,

7 bad u la pyrta jam “Ko Jisu, ko Khun u Blei Bahalor tam! Me donkam aïu bad nga? Nga kyrpad ïa Me ha ka kyrteng u Blei, wat pynsaja ïa nga!”

8 (U la ong kumne namar u Jisu U la dang kren ha u, “Ko mynsiem bymkhuid, to mih noh na une u briew!”)

9 Kumta u Jisu U la kylli ïa u, “Me kyrteng uei?” Uta u briew u la jubab, “Nga kyrteng ‘Paid’—ngi ïabun bah!”

10 Bad u la ïaikyrpad ïa u Jisu ban ym beh noh ïa ki na kata ka thaiñ.

11 Hajan hangta la don shikynhun bah ki sniang kiba ïabam ha ranab lum.

12 Ki ksuid ki la kyrpad ïa u Jisu, “Phah ngin rung hapoh ki sniang.”

13 Te U la shah ïa ki. Kita ki mynsiem bymkhuid ki la mih na uta u briew bad ki la rung ha ki sniang. Baroh shikynhun—kumba ar hajar tylli—ki la noh khongpong sha ka riat ha ka pung bad ki la ïap jyllop.

14 Ki briew kiba ap ïa ki sniang ki la phet ïap bad ki la rah khubor sha nongbah bad sha nongkyndong. U paidbah u la ïamih ban peit ka la jia aïu.

15 Ki la wan sha U Jisu bad ki la ïohi ïa u briew uba la shah shitom ha u paidksuid; u la shong hangta, u la kup jaiñ bad u la tipbriew bha—bad baroh ki la tieng her.

16 Kiba la ïohi, ki la ïathuh ha u paidbah ïa kaba la jia ha uta u briew uba shongksuid, bad shaphang ki sniang.

17 Kumta ki la sdang ban kyrpad ïa u Jisu ban mih noh na ka thaiñ jong ki.

18 Katba u Jisu U dang kiew ha ka lieng, uta u briew uba la shongksuid mynshuwa, u la kyrpad ïa U, “Shah seh ngan leit bad Me!”

19 Hynrei u Jisu Um shah ïa u. Pynban U la ong, “Khie noh sha ïing sha la ki kur, bad ïathuh ha ki katno u Trai U la leh sbun bad U la leh isynei ïa phi!”

20 Te uta u briew u la leit bad u la pynbna ha ki Shiphew Shnong aïu u Jisu U la leh na ka bynta jong u; bad baroh kiba la ïohsngew ïa kata ki la lyngngoh ngaiñ.

21 Haba u Jisu U la leit phai biang da ka lieng sha shiliang, u paidbah u la ïalum sawdong ïa U harud ka Duriaw.

22 U Jairus, u rangbah sinakok u la wan bad, haba u la ïohi ïa u Jisu, u la dem khrup ha ki kjat jong U,

23 u da kyrpad ïa U: “Ka khun rit jong nga ka pang jur. Wan seh ban buh ïa ki kti jong Me halor jong ka, ba kan dup koit bad im!”

24 U Jisu U la leit ryngkat bad u, bad u paidbah babun u ïabud bad u ïaphngian shajan jong u.

25 La don kawei ka kynthei kaba la shitom jur na ka jingmihsnam la khatar snem,

26 wat la ka shah sumar ha bunbah ki nongai dawai. Ka la lut baroh ka pisa tyngka jong ka, khlem ïoh bor ei ei; bad ka la nangjur pynban.

27 Ka la ïohsngew shaphang u Jisu, kumta ka la bud ïa U nadien u paidbah.

28 “Lada ngan ktah ïa ka jaiñkup jong U,” ka la ong ha lade, “ngan koit,”

29 ka la ktah ïa ka jaiñkup jong U bad ka jingmihsnam ka la sangeh shisyndon; ka la sngew ha la ka met ba ka la koit na kata ka jingpang.

30 Markumta u Jisu U la sngew ba ka bor ka la mih na U. Kumta U la phai sawdong uta u paid bad U la kylli, “Mano ba ktah ïa ki jaiñ jong Nga?”

31 Ki synran jong U ki la jubab, “Me ïohi ba ki briew ki ïaphngian ïa Me, balei Me kylli mano ba ktah ïa Me?”

32 Hynrei u Jisu U la nangpeit sawdong ban ïohi ïa kata ka kynthei kaba la leh ïa kane.

33 Ka kynthei ka la sngewthuh aïu ka la jia ha ka; kumta ka la wan da ka jingkhynñiuh tieng, ka la dem khrup hakhmat jong U bad ka la phla lut.

34 U Jisu U la ong ha ka, “Ko khun, ka jingngeit jong phi ka la pynkoit ïa phi. Khie leit suk leit saiñ, bad to koit noh.”

35 Katba u Jisu U dang kren, la wan poi kiba rah khubor na ïing u Jairus, ki ong, “Ka khun jong phi ka la ïap. Balei phin pynsalia shuh ïa u Nonghikai?”

36 U Jisu Um patiaw ïa kane ka khubor, bad U la ong ha u, “Wat sheptieng, shu ngeit.”

37 Nangta Um shym shah ïano ïano ban bud ïa U lait tang ïa u Petrus, u Jakob bad u para jong u u Ïoannis.

38 Ki la poi ha ïing uta u rangbah; hangta u Jisu U la shem ïa ka jingkhynwin ba ki briew ki ïaïam bad ïalynñiar.

39 U la leit rung bad U la ong, “Balei katne ka jingkhynwin? Balei phi ïaïam? Ka khynnah kam shym ïap—ka shu ïohthiah!”

40 Ki la sdang rkhie beiñ ïa U, kumta U la pynmih ïa ki baroh. U la khot ïa ki kmie ki kpa kata ka khynnah, ïa ki synran jong U lai ngut, bad U la leit rung hapoh ka kamra ba thiah ka khynnah.

41 U la shim ïa ka na ka kti bad U la ong ha ka: “Talitha, koum!” (kaba mut, “Ko Hep, khie joit!”)

42 Ka khynnah, kaba khat-ar snem ka ryta, ka la khie joit, bad ka la sdang ban ïaid sawdong. Ki la lyngngoh ngaiñ ïa kane ka jingjia.

43 Te u Jisu U la adong tyngeh ban ym ïathuh briew; bad U la ong ha ki, “Ai kan bam kan dih.”