Markus Lynnong 3

 

1 U Jisu U la leit biang sha ka sinakok, bad la don hangta uwei u briew uba dkoh ka kti.

2 La don ruh hangta ki briew kiba la kwah ban kem daw ïa u Jisu; kumta ki la thap ïa U najan ban ïohi lada Un pynkoit ïano ïano ha ka sabath.

3 U Jisu U la ong ha uta u briew uba dkoh ka kti, “Ale shane shakhmat.”

4 Nangta U la kylli ïa ki paidbah: “Ka Aiñ jong ngi ka shah ban leh aïu ha ka sabath? Ban leh bha ne ban leh sniew? Ban pyllait ïa ka jingim u briew, ne ban pynduh ïa ka?” Ki pat ki la sngap la ka sngap.

5 U Jisu U la bitar haba U la peit sawdong ïa ki, bad U la sngewsih artat ïa ka jingmutlop bad ka jingmatlah jong ki. Te U la phai sha uta u briew, “To kner ïa la ka kti.” Une u la kner, bad ka kti ka la koit.

6 Kumta ki Pharisi ki la mih na ka sinakok bad ki la ïakynduh bad ki Herodian ban ïasylla kumno ban pynïap ïa u Jisu.

7 U Jisu bad ki synran jong U ki la kynriah noh sha ka Duriaw Galilea, bad bun byllai ki ïabud ïa U. Ki la wan na Galilea, na Judea,

8 na Jerusalem, na ka thaiñ Idumea, na shiliang ka Jordan, bad naduh ki thaiñ Tirus bad Sidon. Une u paid byllien u la wan sha u Jisu namarba u la ïohsngew ïa kaba U la leh. Haduh katta u bun u paid, ba u Jisu U la phah ïa ki synran ban pynkhreh kawei ka lieng, ïoh ki paidbah ki ïathynñian ïa U;

10 namarba U la pynkoit bun ki briew, bad baroh kiba pang ki la ïatur ban ïoh ktah ïa U.

11 Kiba shongksuid, ki tang shu ïohi ïa U, ki la ïadem khrup hakhmat jong U bad ki la kyrkait. “Me long u Khun u Blei!”

12 U Jisu U la maham tyngeh ïa ki mynsiem bymman ban ym pynpaw ïa U.

13 Te u Jisu U la kiew sha u lum bad U la khot sha lade ïa ki briew kiba U mon, bad ki la wan sha U.

14 U la thung khat-ar ngut ba kin dup ïadon lem bad U, bad ba Un dup ïoh phah ïa ki ban ïalap.

15 U la ai bor ruh ha ki ban beh noh ïa ki ksuid.

16 (Kine ki long ki khat-ar ngut ba U la thung): u Simon (ïa uba u Jisu U la khot Petrus);

17 u Jakob bad u para jong u, u Ïoannis, ki khun u Zebedi (ïa kiba u Jisu U la khot Boanerjes, kaba mut, ‘Ki Khun u Pyrthat’):

18 U Andreas, u Philip, u Batholomeus, u Matheus, u Thomas, u Jakob u khun u Alpheus, u Thaddeus, u Simon Kananeus,

19 bad u Judas Iskariot, u nongshetkylla.

20 U Jisu U la leit phai sha ïing, bad u paidbah u la lum lymbung ïa u Jisu bad ïa ki synran jong U haduh ba kim ïoh lad shuh ban bam.

21 Haba ki kur jong U ki la bna shaphang kane, ki la wan ban ïalam noh ïa U, namar don ba ong ba U la lamwir.

22 Ki Stad-aiñ kiba la ïawan naduh Jerusalem ki la ïa-ong, “U Beelzebul u shong ha U, bad dei da u rangbah ki ksuid ba U ïoh ka bor ban beh ïa kiwei pat ki ksuid,”

23 Kumta u Jisu U la khot ïa ki briew bad U la kren ha ki da ki pharshi: “Kumno u Soitan u lah ban beh noh ïa u Soitan?

24 Lada ka hima ka ïapait bad ka ïaleh makynti paralok, kata ka hima kan sa pra.

25 Bad lada ka ïing ka ïapait bad ka ïaleh makynti paralok kata ka ïing kan sa pra.

26 Kumjuh lada ka hima u Soitan ka ïapait, kam lah ban neh, hynrei kan sa pra bad kan sa kut ïawai.

27 “Ym don ba lah ban rung jubor hapoh ka ïing u bakhlaiñ bad ban knieh ïa ki mar ki mata jong u, lymda u khum shuwa ïa uta u bakhlaiñ; nangta u sa lute ïa ka ïing jong u.

28 “Shisha Nga ong ha phi ba ïa ki pop baroh jong ki khun bynriew bad ïa ki jingkren beiñ blei katba ki kren yn map noh.

29 Hynrei uno uno uban kren beiñ pyrshah ïa u Mynsiem Bakhuid un ym ïoh jingmap lano lano ruh; un kit pop junom bhor.”

30 U Jisu U la kren kumne namar ki la ong ba U don ïa u mynsiem bymkhuid.

31 Ka kmie bad ki hynmen ki para u Jisu ki la wan. Ki la ïeng habar ka ïing bad ki la phah khot ïa U.

32 U paidbah u ïashong tawiar ïa u Jisu, bad ki la ïathuh ha U, “Ka kmie bad ki hynmen ki para jong Me ki don habar, bad ki donkam ïa Me.”

33 U Jisu U la jubab, “Mano ka kmie jong Nga? Mano ki hynmen ki para jong Nga?”

34 U la peit ïa kita ki briew kiba shong tawiar ïa U bad U la ong, “Kine ki long ka kmie bad ki hynmen ki para jong Nga!

35 Jar uba leh ïa ka mon u Blei, uta keiñ u long u para, ne ka para, ne ka kmie jong Nga.”