Markus Lynnong 2

 

1 Katto katne sngi hadien u Jisu U la leit phai sha Kapernaum, bad la bna ba U don ha ïing.

2 Kumta bun ki briew ki la tur haduh ba ym don jaka shuh, wat hakhmat jynkhang. U Jisu U dang ïalap ha ki ïa ka Ktien u Blei

3 haba ki wan rah sha U ïa uwei u briew u bapang ïapshiliang—saw ngut ki bah ïa u.

4 Namar ba bun briew, kim lah ban poi hajan u Jisu. Kumta ki la lied ïa ka tnum hamar ka jaka ba don u Jisu. Ynda ki la pyllait thliew, ki la pynhiar ïa u bapang ryngkat bad ka palong.

5 U Jisu U ïohi ïa ka jingngeit jong ki, bad U la ong ha u bapang ïapshiliang. “Ko khun, la map ïa ki pop jong phi.”

6 La don ki Stad-aiñ kiba ïashong hangta bad kiba ïapyrkhat.

7 “Balei sha Une U kren kumne? U kren beiñ blei ! Mano ba lah ban map pop lait tang u Blei !”

8 U Jisu U la tip shisyndon ïa ki jingpyrkhat jong ki, kumta U la ong ha ki: “Balei phi pyrkhat kumne ha lade?

9 Hato ka khamjem ban ong ha une u bapang ïapshiliang, ‘La map ïa ki pop jong phi,’ ne ban ong, ‘Khie joit, to rah ïa la ka jynthiah bad to ïaid?’

10 Ngan pynsabut ha phi ba u Khun u Briew U don ka bor ha ka pyrthei ban map pop.” Kumta U la ong ha u bapang ïapshiliang,

11 ”Nga hukum ïa phi: Ïeng joit, to rah ïa la ka jynthiah bad khie leit sha la ïing !

12 Katba baroh ki dang ïapeit, uta u briew u la ïeng bad markumta u la rah ïa la ka jynthiah bad u la mih bak. Baroh ki la lyngngoh ngaiñ bad ki la ïaroh ïa u Blei, ki da ong,”Ngim pat ju ïohi kum kane mynno mynno !”

13 U Jisu U la leit phai biang sharud ka Duriaw Galilea. U paid byllien u la wan sha U, bad U la sdang ban hikai ïa ki.

14 Katba U nangïaid, U la ïohi ïa u Lebi, u khun u Alpheus, ba u shong ha ka ïingkhrong musur jong u. U Jisu u la ong ha u, “To bud ïa Nga.” U Lebi u la ïeng joit bad u la bud ïa U.

15 Kham hadien, haba U shongbam ha ïing u Lebi, bun ki nongkhrong musur bad ki nongpop ki la ïashong lang bad u Jisu bad ki synran jong U. Ki la ïadon shibun kiba ïabud ïa u.

16 Haba ki Stad-aiñ, kiba la long na ki Pharisi, ki la ïohi ba u Jisu U ïabam lang bad kine ki ’riew be-aiñ bad ki nongkhrong musur, ki la kylli ïa ki synran jong U, “Balei sha U ïabam lang bad ki nongkhrong musur, bad ki nongpop?”

17 U Jisu U la ïohsngew tiak ïa ki bad U la phai ktien: “Kiba koit bakhiah kim donkam ïa u nongpynkhiah, hynrei tang kiba pang keiñ. Ngam shym la wan ban khot ïa ki bahok, hynrei ïa ki ba pop.”

18 Te ki synran u Ïoannis Baptist bad ki Pharisi ki ju shah jingit. La don kiba wan sha u Jisu ban kylli, “Balei ki synran u Ïoannis Baptist bad ki jong ki Pharisi ki ïashah jingit, ki jong Me pat kim leh kumta?”

19 U Jisu U la jubab: “Lah mo ba ki balawer sha ka jingkhawai shongkurim kin shah jingit? Da lei lei ruh em! Katba u nongleitkurim u dang don bad ki, kim lah ban shah jingit.

20 Hynrei kan poi ka por haba ïa u nongleitkurim yn shim noh na ki; ha kata ka sngi te kin sa shah jingit.

21 “Ym don uba syrdep da ka lyngkhot jaiñ thymmai ïa ka jaiñkup barim. Lada kumta ka lyngkhot thymmai kan tar ïa ka barim, bad ka jingpei kan sa kham heh.

22 Ym ju don uba buh ïa ka waiñ thymmai ha ki lwasnieh barim. Lym kumta ka waiñ kan pynbthei ïa ki lwasnieh, bad ka waiñ bad ki lwasnieh kin duh ei baroh ar. Em! Ka waiñ bathymmai ha ki lwasnieh bathymmai keiñ !”

23 Katba u Jisu U dang ïaid lyngba ki lyngkha kew ha ka sngi sabath, ki synran kiba ïadon ryngkat bad U ki la sdang ban kheit ïa ki tyrjup kew.

24 Kumta ki Pharisi ki la ong ha u Jisu, “Ha peit, balei ki leh ïa kaba ym bit ha ka sabath?”

25 U Jisu U la phai ktien: “Phim pat ju pule mo aïu u Dabid u la leh mynba u la donkam jynbam, namar ma u bad ki briew jong u ki la thngan?

26 Kumno u la rung ha ïing u Blei bad u la bam ïa u kpu ba la tyrwa ha u Blei? Kane ka la jia mynba u Abiathar u la long u lyngdoh rangbah. Katkum ka Aiñ jong ngi tang ki lyngdoh ki lah ban bam ïa une u kpu—hynrei u Dabid u la bam hi bad u la ai lem ha ki briew jong u.”

27 Bad u Jisu U la pynbud, “Ïa ka sabath la buh na ka bynta u briew, ym ïa u briew na ka bynta ka sabath.

28 Kumta u Khun u Briew U long Kynrad wat ïa ka sabath ruh.”