Markus Lynnong 16
1 Ynda la lah ka sabath, ka Maria Magdalena, ka Maria ka kmie u Jakob, bad ka Salome, ki la thied jingpynsleh iwbih ban leit kyllan ïa ka met u Jisu.
2 Dang step ha ka sngi nyngkong jong ka taïew, mar ïamih ka sngi, ki la leit sha jyntep.
3 Ha lynti ki la ïa-ong para ma ki, “Mano keiñ ban pyntyllun ïa u maw na jynkhang jyntep na ka bynta jong ngi?”
4 Haba ki la ïapeit, ki la shem ba ïa u maw la lah pyntyllun. (Bad u la long u maw u baheh shibun).
5 Kumta ki la rung ha jyntep, bad ki la ïohi ïa u samla uba shong ha kamon bad u riam lieh—bad ki la tieng her.
6 “Wat sheptieng,” u la ong. “Phi ïawad ïa u Jisu Nazareth ïa Uba la sahnarphna. Um don hangne. U la mihpat: ha peit ka jaka ha kaba ki la buh ïa U.
7 Mynta khie leit ai ïa kane ka khubor ha ki synran jong U bad ha u Petrus: ‘U la leit sha shuwa jong phi sha Galilea; phin lap ïa U hangta, kumba U la ïathuh ïa phi.’ ”
8 Kumta ki la mih bad ki la mareh bak bak na ka jyntep; ki la tieng ym don pyrthei shuh! Te kim shym ïathuh hano hano namarba ki la khaw-eit eh.
9 Ynda u Jisu U la mihpat na ka jingïap, dang step ha ka sngi nynkong jong ka taïew, U la paw nyngkong ha ka Maria Magdalena na kaba u la beh hynñiew ngut ki ksuid.
10 Ka la leit ïathuh ha ki lok jong U. Ki dang ïaïam sngewsih;
11 bad haba ki la ïohsngew ba u dang im bad ba ka la ïohi ïa U, kim shym ngeit ïa ka.
12 Nadien kane, u Jisu U la paw ha kawei pat ka dur ha ki ar ngut na ki synran katba ki dang ïaleit sha nongkyndong.
13 Ki la leit phai ban ïathuh ha kiwei pat, hynrei kita kim treh ban ngeit.
14 Khatduh eh, u Jisu U la paw ha ki khatwei ngut ki synran katba ki dang ïabam. U la mai ïa ka jingbymngeit jong ki, namarba ki la pyn-eh dukhi ban ngeit ïa kito kiba la ïohi ïa U hadien ba U la mihpat.
15 U la ong ha ki: “Khie leit satlak ka pyrthei bad to ïalap ïa ka Khubor Babha ha ki jynthaw baroh.
16 Jar uba ngeit bad uba ïoh baptisma un lait im; jar ubym ngeit, yn pynrem.
17 Kine ki dak kin ïaid synran ïa ki bangeit: ha ka kyrteng jong Nga kin beh noh ïa ki ksuid; kin kren ki ktien bathymmai;
18 lada kin rah ïa ki bseiñ ne kin dih ïa ka bih, kan ym pynsniew ïa ki; kin buh ïa ki kti ha ki bapang, bad kito kin koit khran.”
19 Hadien ba u Trai Jisu U la lah ïakren bad ki, U la kiew sha bneng bad U la shong ha ka kamon u Blei.
20 Ki synran ki la ïaleit ïalap kylleng sawdong, bad u Trai U la trei lang bad ki, U la pynskhem ïa ka jingïalap jong ki da ki kambah kiba bud.