Markus Lynnong 14

​

1 Sa ar sngi shuwa ka Paskha bad ka Jingkhawai u Kpu khlem thiat, ki rangbah lyngdoh bad ki Stad-aiñ ki ïawad lad ban kem ïa u Jisu jar jar, bad ban pynïap ïa U.

2 “Ngim dei ban leh ha ka sngi jingkhawai,” ki la ong, “ïoh u paidbah u ïakhihwin.”

3 U Jisu u la don ha Bethania ha ïing u Simon sa-’ñianglynkut. Katba U dang bam, la wan rung kawei ka kynthei kaba rah ïa ka jynsleh ba-iwbih, ka umphniang ka bakordor ha u khiew pleit. Ka la pynpait ïa u khiew bad ka la theh ïa ka jyniwbih halor ka khlieh u Jisu.

4 La don ki briew hangta kiba la sngewbitar, bad ki la ïa-ong para ma ki, “Balei yn pynlehnoh-ei ïa kane ka jyniwbih?

5 Ban da die ïa ka, yn ïoh palat laispah tyngka, bad ïa ka pisa yn ai ha ki baduk!” Bad ki la ïakhñium tyngeh ïa ka.

6 Hynrei u Jisu U la ong: “Ieh kan mat leh! Balei phi ïathlia ïa ka? Ka la leh ka kam ka babha shibun na ka bynta jong Nga.

7 Ïa ki baduk phi don barabor, bad ha kano kano ka por ba phi kwah, phi lah ban ïarap ïa ki. Ïa Nga te phin ym ïoh barabor.

8 Ka la leh kat kaba ka lah: ka la pynsleh lypa ïa ka met jong Nga na ka bynta ka jyntep.

9 To buh jingmut ïa kane: kat shaba yn ïalap ïa kane ka Gospel ha satlak ka pyrthei, yn ïathuh ruh ïa kaba kane ka la leh ban sah jingkynmaw ïa ka.”

10 Te u Judas Iskariot, uwei na ki khat-ar ngut ki synran, u la leit sha ki rangbah lyngdoh ban die noh ïa u Jisu ha ki.

11 Ki la kmen shitkatdei haba u la ong kumta, bad ki la kular ban ai tyngka ïa u. Kumta u Judas u la wad ka kabu ban die noh ïa u Jisu.

12 Ha ka sngi banyngkong jong ka Jingkhawai u Kpu khlem thiat, ka sngi ha kaba ki pynïap ïa ki khun langbrot Paskha, ki synran ki la kylli ïa u Jisu: “Hangno Me kwah ngin leit pynkhreh ïa ka jingkhawai Paskha?”

13 U Jisu U la phah ar ngut na ki, U bthah kumne: “Khie leit shapoh shnong; phin lap ïa u briew uba bah shikhiew ka um.

14 Bud ïa u haduh ka ïing ba u rung, bad sa ong ha u trai ïing: ‘U Nonghikai U phah ong, ha-ei ka kamra ha kaba ki synran jong Nga bad ma Nga ngin ïabam khawai Paskha?”

15 Un pyni ïa phi kawei ka kamra shaneng, ba la pynbeit pynbiang; hangta phin pynkhreh pynkhrum na ka bynta jong ngi.”

16 Ki synran ki la leit shapoh shnong, bad ki la lap thik kumba u Jisu U la ïathuh ïa ki; bad ki la pynkhreh ïa ka jingkhawai Paskha.

17 Ynda la kem ïongreiñ, u Jisu U la wan bad ki khat-ar ngut ki synran.

18 Katba ki dang ïashongbam, u Jisu U la ong: “Shisha shisha Nga ïathuh ïa phi, uwei na phi un sa die noh ïa Nga—uwei uba dang bam bad Nga.”

19 Ki synran ki la kulmar jingmut, bad uwei hadien uwei ki la sdang ban kylli, “Ym dei ma nga mo?”

20 U Jisu U la jubab: “U dei uwei na phi ki khat-ar ngut, uba wieh ïa u kpu ha ka pliang ryngkat bad Nga.

21 U Khun u Briew Un ïap kumba ong ki jynthoh; hynrei kordit ïa uta uban die noh ïa u Khun u Briew! Kan jin da la bha ïa uta u briew lada ym shym la kha ïa u!”

22 Katba ki dang ïabam, u Jisu U la shim ïa u kpu, U la ainguh, U la kdiah, bad U la ai ha la ki synran, U ong: “To shim, kane ka long ka met jong Nga.”

23 U la shim sa ïa ka khuri, U la ainguh ïa u Blei, U la ai ha ki; bad baroh ki la ïadih na ka.

24 “Shisha shisha” u Jisu U la ong: “Kane ka long ka snam jong Nga, ka snam jong ka jutang, ïa kaba yn pynphlei na ka bynta ki babun,

25 Nga ong ha phi, ba Ngan ym dih waiñ shuh haduh kata ka sngi ba Ngan dih ïa ka waiñ bathymmai ha ka Hima u Blei.”

26 Nangta ki ïarwai Psalm bad ki sa leit sha u lum Olib.

27 U Jisu U la ong ha ki: “Ma phi baroh phin sa ieh noh ïa Nga, kumba ong ka jynthoh, ‘Ngan tangon ïa u nongsharai, te ki langbrot kin sa saphret.’

28 Hynrei ynda Nga la mihpat Ngan leit sha Galilea ha shuwa jong phi.”

29 U Petrus u la jubab, “Wat la baroh kin ieh noh ïa Me nga te ngan ym ieh noh!”

30 “To kynmaw ïa kane!” u Jisu U la ong ha u Petrus. “Shuwa ba u syiar un kynih ar sien mynta ka miet, lai wat men len ïa Nga!”

31 U Petrus u la kren kham pyn-eh: “Wat lada nga dei ban ïap bad Me, da lei lei ngan ym len ïa Me!” Ki synran baroh ki la ïa-ong kumjuh.

32 Ki la wan sha kawei ka jaka ba khot Gethsemani, bad u Jisu U la ong ha ki synran jong U, “To ïashong hangne katba Nga dang duwai.”

33 U la ïalam ryngkat bad U ïa u Petrus, u Jakob bad u Ïoannis. U la kem tieng kynsan kynsan bad U la sngewpisa.

34 U la ong ha ki: “Nga sngewkordit la kumban ïap. To sah hangne bad ïa-ap.”

35 U la leit kham shakhmat, U la dem pyllup ha khyndew, bad U la duwai ba lada lah, Un lait, noh na kata ka por jingshitom.

36 “Ko Pa,” U la duwai, “Ko Pa jong Nga! Me lah ban leh ïa kiei kiei baroh. To shim noh ïa kane ka khuri na Nga. Pynban ym kumba Nga mon ma Nga, hynrei kumba Me mon ma Me.”

37 Te U la wan phai bad U la shem ba ki lai ngut ki synran ki ïohthiah, bad U la ong ha u Petrus, “Ko Simon, pleng phi ïohthiah? Phim lah ban peitngor wat tang shi kynta?”

38 Bad U la pynbud, “To sharai, bad to duwai, ba phin ym liat ha ka jingpynshoi. Ka mynsiem ka kloi shisha, ka doh pat ka tlot.”

39 U la leit biang ban duwai ïa kajuh ka jingduwai.

40 Te U la wan phai sha ki synran bad U la lap ba ki ïohthiah; naba ki khmat jong ki ki la ring ngai ngai. Bad kim tip aïu ban jubab ïa U.

41 Ynda U la wan phai ha ka sien ka balai, U la ong ha ki: “Phi dang ïathiah bad pynjem met mo? Keiñ noh! Ka por ka la poi! Ha peit, ïa u Khun u Briew yn sa aiti ha ka bor ki bymman.

42 To ïeng, ïa ngin ïaleit noh. Peit, uban shet kylla ïa Nga u la hajan!”

43 Katba U dang ïakren, u Judas, uwei na ki khat-ar ngut, u la poi. La don ryngkat bad u u paidbah uba ïarah la ki waitlam bad ki dieng tylli, ba la phah ïa ki da ki rangbah lyngdoh, ki Stad-aiñ bad ki tymmen ki san.

44 U nongshetkylla u la ai dak ha u paidbah: “U briew Uba ngan doh, U dei Uta keiñ. Kem ïa U, bad to da sumar haba phi ïalam ïa U.”

45 U Judas u tang shu poi, u la leit sha u Jisu bad u la ong, “Ko Nonghikai!” bad u la doh ïa U.

46 Kumta ki la kem ïa u Jisu bad ki la bat khak ïa U.

47 Hynrei uwei na kiba ïeng hajan, u la sei ïa la ka waitlam bad u la pom ïa u shakri jong u lyngdoh rangbah, bad u la mait ïa ka shkor jong u.

48 Te u Jisu U la kren jam bad U la ong ha ki: “Hato Nga long u ’riewdakaid ba phi wan kem ïa Nga da ki waitlam bad da ki dieng tylli?

49 Man ka sngi Nga la ju don ryngkat bad phi haba Nga hikai ha ka Tempyl, bad phim shym kem ïa Nga. Hynrei dei ban pyndep ïa ki jynthoh....”

50 Ki synran ki la ieh noh ïa U bad ki la phet ïap.

51 Uwei u samla, uba kup ka jaiñ linen halor ka met lyngkhuit, u la bud ïa u Jisu. Ki la pyrshang ban kem ïa u.

52 Hynrei u la ieh noh ïa kata ka jaiñ linen bad u la phet ïap phet im lyngkhuit na ki.

53 Te ki la ïalam ïa u Jisu sha ka ïing u lyngdoh rangbah; hangta ki lyngdoh baroh, ki tymmen ki san bad ki Stad-aiñ ki la ïalum.

54 U Petrus u la bud nadien haduh phyllaw ïing u lyngdoh rangbah. U shong syaid ding hangta ryngkat bad ki nongap-karod.

55 Ki rangbah lyngdoh bad ka Dorbar baroh kawei ki la pyrshang ban ïoh sabut pyrshah ïa u Jisu, khnang ban pynïap ïa U, hynrei kim shym shem satia.

56 La mih bun ki sakhi lamler pyrshah ïa u Jisu, hynrei ki sabut jong ki kim ïahap.

57 La don kiba ïeng bad kiba la mudui lamler kumne:

58 “Ngi la ïohsngew U ong, ‘Ngan pynjot ïa kane ka Tempyl ba shna ki briew, bad hadien lai sngi Ngan pynïeng da kawei pat kabym shym la thaw da ki briew.’ ”

59 Wat kine ki sabut ruh, kim ïahap kajuh.

60 U lyngdoh rangbah u la ïeng hakhmat jong ki baroh bad u la kylli ïa u Jisu: “Mem jubab ei ei ïa ka jingmudui jong kine pyrshah ïa Me?”

61 U Jisu U shu sngap, bad Um shym jubab ei ei. Sa shiwat u lyngdoh rangbah u la kylli ïa U: “Me long u Khrist, u Khun jong u Blei Balakyrkhu?”

62 “Nga long,” la jubab u Jisu, “bad phin sa ïohi ïa u Khun u Briew ba U shong ha ka kamon jong u Badonbor tam, bad ba U wan ha ki lyoh ka bneng!”

63 U lyngdoh rangbah u la kad ïa la ki jaiñ bad u la ong, “Ngi dang donkam sakhi aïu pat

64 Phi la ïohsngew ïa ka jingkren beiñ blei. Phi ïa pyrkhat kumno?” Baroh ki la pynrem ïa U, bad U dei ban ïap.

65 Don kiba sdang ban bynthiew ïa U, bad ban tap matlah ïa U bad ban kura ïa U. “Ïathuh mano?” ki la kylli. Bad ki shakri ki la thab ïa U.

66 U Petrus u la don harum ha phyllaw haba kawei ka shakri u lyngdoh rangbah ka la wan hajan.

67 Haba ka la ïohi ïa u Petrus uba syaid ding ka la peit shin ïa u bad ka la ong, “Phi ruh phi la don bad u Jisu Nazareth.”

68 Hynrei u la len da kaba ong, “Tip ruh ngam tip, sngewthuh ruh ngam sngewthuh ïa kaba phi ong!” Bad u la mih noh shabar shakhmat phyllaw. Markumta u syiar u la kynih.

69 Ka shakri ka la ïohi ïa u bad ka la sdang ban ïathuh ha kiba ïeng hangta, “Une u long uwei na ki!”

70 Hynrei u Petrus u la len biang. Katto katne hadien, kiba ïaïeng ki la kynnoh biang ïa u Petrus. “Khlem artatien phi dei uwei na ki! Phi ruh phi long u nong Galilea, ym dei?”

71 U Petrus u la sdang ban tla bitar, u la ong, “Ngam ithuh ïa une u briew uba phi ïakren!”

72 Mar kumta u syiar u la kynih biang. U Petrus u la kynmaw ïa ka ktien kaba u Jisu U la lah ong ha u, “Shuwa ba u syiar un kynih ar sien, lai wat men len ïa Nga,” Bad u la ïam kthang.