Markus Lynnong 13
1 Haba u Jisu U la mih na ka Tempyl, uwei na ki synran u la ong, “Ha peit, ko Nonghikai! Katno ka jingitynnat ki maw bad ka jingishongkun ki jyntei!”
2 U Jisu U la phai ktien” “Phi ïohi ïa kine ki jyntei ki bakhraw? Yn ym sah wat uwei u maw ha la ka jaka; ïa uwei pa uwei yn pyntwa.”
3 U Jisu U la shong halor u lum Olib, mar pyrshah ïa ka Tempyl, haba u Petrus, u Jakob, u Ïoannis, bad u Andreas ki la ïawan jar jar sha u.
4 “Ha ïathuh ïa ngi lano kane ka sa urlong,” ki la kylli; “bad ka dak kaba kumno kan paw haba yn sa pyndep ïa kine kiei kiei baroh.”
5 U Jisu U la sdang ban hikai ïa ki: “To sumar ïoh don ba shukor ïa phi.
6 Bun ki briew kin wan ha ka kyrteng jong Nga da kaba ong, ‘Dei ma nga!’ bad kin shukor bun ngut.
7 Bad wat khuslai haba phi ïohsngew ïa ka jingkhynwin ki thma hajan ne ïa ki khubor thma shajngai. Kum kine kiei kiei ki dei ban jia, hynrei kam mut ba ka bakut ka la wan.
8 Kawei ka ri kan ïaleh ïa kawei pat; kawei ka hima kan hiar thma ïa kawei pat. Yn don ki jumai kylleng sawdong, wat ki ’nemsniew ruh. Kine ki long kum ki jingsuh khun ba dang sdang.
9 “Phi ïa lade to sumar. Namar ki briew kin kem ïa phi bad kin aiti ha ka jingbishar. Phin shah shoh ha ki sinakok; phin ïeng hakhmat ki lat bad ki syiem na ka bynta jong Nga, ban sakhi ïa ka Khubor Babha.
10 Ïa ka Khubor Babha dei ban ïalap shuwa ha ki jait bynriew baroh.
11 Bad haba ki kem ïa phi bad ki ring ïa phi sha ka jingbishar, wat leit khuslai aïu phi dei ban kren; ynda poi ka por, sa ong ïa kata kaba yn sa pyrsad mynsiem ha phi. Namar ki ktien ba phi kren kin ym long ki jong phi; kin wan na u Mynsiem Bakhuid.
12 Ki briew kin aiti ïa la ki hynmen ki para sha ka jingïap, kumjuh ki kpa kin leh ïa la ki khun; ki khun ruh kin ïeng pyrshah ïa la ki kmie ki kpa bad kin phah pynïap ïa ki.
13 Man la u briew un isih ïa phi namar jong Nga. Hynrei u briew uba ïaineh haduh ka bakut, un lait im.”
14 “Phin sa ïohi ïa Ka Jingijli Bashyrkhei ba ka ïeng ha ka jaka ba kam dei ban don. (Jar uba pule to un sngewthuh!) Te ha kata ka por, kiba don ha Judea ki dei ban phet ïap sha ki lum.
15 U briew uba don ha tnum ïing un ym pynlut por ban leit shim ei ei napoh ïing.
16 U briew uba don ha lyngkha um dei ban leit phai sha ïing ban shim ïa la ka jaiñkup.
17 Katno ka jingkordit ha kito ki sngi ïa ki kynthei kiba pun khun bad kiba ai buiñ!
18 To duwai ha u Blei ba kine kiei kiei kin ym jia myntlang!
19 Naba ki jinglanot ha kito ki sngi kin palat liam ïa kano kano naduh basdang ka pyrthei mynba u Blei U la thaw ïa ka, haduh mynta mynne, bad yn ym don shuh kum kane.
20 Lada u Trai Um shym la pynlyngkot ïa kito ki sngi, yn ym don ba lait-im. Hynrei na ka bynta ki balajied jong U, U la pynlyngkot ïa kito ki sngi.
21 “Te lada uno uno u ong ha phi, ‘Ha peit, u Khrist: U don hangne!’ ne, ‘Ha peit, U don hangtai!’ —wat ngeit ïa u.
22 Naba kin ïapaw byllai ki khrist bad ki nongïathuhlypa lamler. Kin leh ki dak bad ki jingphylla ban shukor, lada lah, wat ïa ki balajied jong u Blei. 23Te to da sumar bha! Nga la ïathuh lypa ha phi.”
23 Te to da sumar bha! Nga la ïathuh lypa ha phi.”
24 “Bad ha kito ki sngi, hadien kito ki jingjynjar, ka sngi kan sa dum, u bnai un ym shai shuh,
25 ki khlur kin hap na sahit bneng, bad ki bor ka mariang kin sa kulmar.
26 Nangta u Khun u Briew Un sa paw ha ki lyoh da ka borbah bad ka burom.
27 Un phah ïa ki angel sha ki sawlyer ban lum ïa ki balajied jong u Blei, na bakut ka pyrthei sha bakut ka bneng.”
28 To u dieng dymbur un ai jinghikai ïa phi. Haba ki tnat jong u ki sdang khielung, bad ki sei sla, phi tip ba ka lyïur ka la jan.
29 Kumjuh, haba phi ïohi ïa kine ki jingjia phin tip ba u lajan, u la don ha ka khyrdop.
30 Nga ïathuh ïa phi ba kane ka pateng kaba mynta kan ym leit noh, shuwa ba yn urlong kine kiei kiei.
31 Ka bneng bad ka khyndew kin duh noh, hynrei ki ktien jong Nga kin ym duh noh satia.”
32 Ym don ba tip lano kata ka sngi ne ka por kan wan—lymne ki angel ha bneng, lymne u Khun; U tip tang u Kpa.
33 To sumar bad to sharai, naba phim tip lano kan long kata ka sngi.
34 Kan long kum u briew uba mih ban leit jingleit, bad u ieh noh ïa la ka ïing ha ki shakri, uwei pa uwei ba un leh la ka kam ka kam; u bthah ïa u nongap khyrdop ban sharai.
35 Te to ïaisharai, namar phim tip lano u trai ïing un wan—janmiet ne shiteng synñia, haba kynih syiar ne mynstep.
36 Lada u wan kyndit kyndit um dei ban lap ba phi ïohthiah!
37 Kaba Nga ong ha phi, Nga ong ha baroh: to sharai to peit ngor!”